योहेजकेल 35

एदोम काजे परमेश्वरोन डोन

1योहोवान यो बुल मारे यां पुग्यो: 2हे मानसोन ओवलीयाद, आपसो मुय सेईर बोयड़ा भेनी कोरीन हेरा वीरुद् भोगवानो वोगे गोथी वात कोर, 3आरु हेनासी कोव परमेश्वर योहोवा ओसु कोवे:

हे सेईर बोयड़ा, हांव तारे वीरुद् छे;

आरु आपसो हात तारे वीरुद् वोदाड़ीन तुसेक उजाड़ुत उजाड़ कोर दिस।

4हांव तारा सोहोर काजे नास कोर दीस, आ

रु तुमु उजाड़ होय जासु;

तोत्यार तु जान लीस की हांव योहोवा छे।

5काहाकी तु इसराएलीयो सी ठेटकुन दुसमोन राखे, आरु हेंदरा काठला टेम जोत्यार पापन डोनोन टेम पुग्यो, तोत्यार हेनुक तोलवार सी मोरने कोरीन आप देदो। 6कोरीन परमेश्वर योहोवान यो बुल छे: मारी जीवायीन वायदु, की हांव तुमुक मोरने जाने जुगु तीयार कोरीस आरु लुहुय तारे पोछोळ पोड़से; तु ते लुहुय सी नी घाड़ाये, ओस कोरीन लुहुय तारे पोछोळ पोड़से। 7ऐने रीते हांव सेईरयोन बोयड़ाक उजाड़ुत उजाड़ कोर दिस, आरु जो हेरेम आवे जाय, हांव तीनाक नास कोरीस। 8हांव हेरा बोयड़ाक मोरलान धोड़ो सी ढाक दिस। होये धोड़ तुमरा आखा बोयड़ा, घाटी आरु तुमरा आखा खुदराम तोलवार सी मार भोराय जासे। 9हांव तुसेक जोलोम जोलोम जुगु उजाड़ कोर दिस, आरु तारो सोहोर ओळी नी वोससे। तोत्यार तुमु जान लेसु की हांव योहोवा छे।

10काहाकी तु कोवलु छे, ये दुयु देस आरु ये दुयु देस मार होयसे; आरु हामु हेनका आपना बोनाय लेसु। पुन योहोवा होंया होतो। 11ओस कोरीन परमेश्वर योहोवान यो बुल छे, मारी जीवायीन आन, तारी रीसोन ओनसारे, आरु रीस तु हेनु पोर आपसी रीसोक कोरता कोरलु छे, हेरेत ओनसारे हांव तारे सी वेवहार कोरीस, आरु जोत्यार हांव तारो नियाव कोरीस, तोत्यार तुमरेम आपसाक देखाड़ीस। 12तु जानसे की हांव योहोवा तारी आखी ओबरान वात सोमळ्यो, जो तु इसराएलोन बोयड़ान वाराम कोयो, होये ते उजोड़ गोया, होये हामुत काजे आपला छे की हामु हेनुक खाय जाजे। 13तुमु आपसा मुयो कोरीन मारे वीरुद् मोटी मोटी वात कोर्या आरु मारे वीरुद् बेसकी वात कोवला छे; इनाक हांव सोमोवलु छे।

14परमेश्वर योहोवा ओसु कोवे: जोत्यार धोरती भोर मा खुशी होयसे, तोत्यार हांव तारो उजाड़ कोरीस। 15तु इसराएलोन घोरानान आपसा वाटाक उजाड़ कोरने सी खुश्शी होयो, कोरीन हांव वी तारेसी तोसोत कोरीस; हे सेईर बोयड़ा, हे एदोमोन आखा देस, तु उजड़ी जायीस। तोत्यार होये जान लेसे की हांव योहोवा छे।