योहेजकेल 12

कागळ्यान गुलामी मा जानेन सोहलानी

1ओळतेन योहोवा क यो बुल मार पास पुग्यो, 2“हे मानुस नु ओवलीयाद,” तु लोड़ाय कोरनेवाळा घराना क वीच मा रोहे छे, जेनका देखने क लीय डुळा ते छे, पुन नी देखे, आरु समळने क लीय कानटा ते छे पुन नी समळे; काहकी त्या लोड़ाय कोरनेवाळा घरानान छे।

3“एकालीय हे मानुसोन ओवलीयाद, दिसु बाँदायीन सोमान तीयार कोरीन हेनका देखतात उठ जाजी, हेनका देखतात आपसा जागाक छुड़ीन दीसरे जागे जाजी। कदाम त्या लोड़ाय कोरनेवाळा घरानान छे तीवी पाको छे की त्या धियान देये। 4ओतरान कोरीन तु दाहड़ा क देखतात बाँदाय क सोमान क जोसो आपसो सोमान निकाळजी, आरु ती तु साँतो बाँदाय मा जानेवाळ क जोसो हेनका देखतात उठ जाजी। 5हेनका देखतात भितड़ा क फुड़ीन ओकाज सी आपसो सोमान निकाळजी। 6हेनका देखतात हेको आपसा खाँदा पोर चुटीन आँदारलाम निकाळजी, आरु आपसो मुय ढाँक रोहजी की धरती तुसे नी देखा पोड़े; काहकी हांव तुसे इसराएल क घराना क लीय एक सोहलानी बोनावला छे।”

7हेकी हुकुमन ओनसारे हांव तसोह कोर्‌यो। दिसु हांव आपसो सोमान बाँदाय क सोमाज क जोसो निकाळ्यो, आरु साँतो आपसा हात सी भितड़ा क फुड़्यो; ओळतेन आँदरलाम सी सोमान निकाळीन, हेनका देखतात आपसा खाँदा पोर चुटीन चाली गुयो।

8संदारे योहोवा क यो बुल मार पास पुग्यो, 9“हे मानुस नु ओवलीयाद,” काय इसराएल क घराना न उना लोड़ाय कोरनेवाळा घराना न तुसे यो नी पुछ्या, यो तु काय कोर रोयु? 10तु उना सी कोव, पोरबु योहोवा असो कोवे छे: यो ताकोतवाळो बुल योरुसालेम क डाहला मानुस आरु इसराएल क आखा घरानान वाराम छे जेका वीच मा त्या रोहे छे। 11तु उनासी कोव, हांव तुमरा लीय सोहलानी छे; जसो हांव न कोर्‌यो छे, तसोज इसराएली लोगहन सी वी कोर्‌यो जाए; हेनको चुटीन बाँदाय मा जानो पोड़से। 12हेनका वीच मा जे डाहला छे, त्या आँधारला मा आपसा खाँदा पोर भार चुटीन निकळसे, त्या आपसा सोमान निकाळने क लीय भितड़ तुड़से, आरु आपसा मुय ढाँक रोहसे की हेको जागा नी देखा पोड़े। 13हांव उना पोर आपसी जाळ खोव्‌वीस, आरु त्या मार फांदा मा फोस जासे; आरु हांव उना कोसदियो क देस क बेबीलोन शोहोरोम मा पुगाड़ दिस; कदाम त्या उना सोहोर मा मोर जासे, तेवी हेको ओनी देखाड़से। 14जोतरा हेनका सहायक हेका आड़े धोड़े होयसे, हेनको आरु हेनकी आखी टुळीक हांव आखे छोमकीर वेरवी दीस; आरु तलवार हापकीन हेनका पछळ चालाड़ीस। 15“जव हांव उना मुलुक मुलुकोम वेरवी दीस आरु देस देस मा इतरेन तीतरे कोर दिस, तव त्या जान लेसे की हांव योहोवा छे। 16कदाम हांव उना मा सी थुड़ाक लोगहन क तलवार, भुक आरु मोरने सी वाचाड़ीन राखीस; आरु त्या आपसा घाड़ायीन कामोक उना जातीयोम वाराम कोरसे हेनका वीच मा त्या पुगसे; तव त्या जान लेसे की हांव योहोवा छे।”

कापतेला कागळ्यान सोहलानी

17तव योहोवा को यो बुल मार पास पुग्यो, 18“हे मानुस नु ओवलीयाद, कापता जाईन आपसो रुटो खाजी आरु थरथरायता आरु फीकुर कोरता जाईन आपसो पानी पीजो, 19आरु एना देस क लोगहन सी यो कोहजी, की पोरबु योहोवा योरुसालेम आरु इसराएल का देस मा रोहनेवाळान वारा असो कोवे छे; त्या आपसा रुटा फीकुर पुटी खासे, आरु आपसा पानी बीकोम पीसे; काहकी देस आपसा आखा रोहनेवाळा क गाँडाय सी आपसी आखी भरपुरी सी छेटा होय जासे। 20बोसला सोहोर उजड़ी जासे, आरु देस वी उजाड़ होय जासे, तव तुमु लोगहन जान लेसु की हांव योहोवा छे।”

नास साते छे

21ओळतेन योहोवा को यो बुल मार पास पुग्यो, 22“हे मानुस नी ओवलीयाद,” यो काय कोहाड़ो छे जे तुमु लोगहन इसराएल क देस मा कोया कोरतला, दाहड़ा जादा होय गुयला छे, आरु दर्शन नी काय वात पुरी नी होयी? 23एकालीय उना सी कोय, पोरबु योहोवा असो कोवे छे, हांव एनी कहावत को बोंद कोरीस; आरु एना कोहाड़ाक इसराएल पोर ओळी नी चालसे। तु उना सी कोय की त्या दाहड़ा आहना आय गुयला छे, आरु दर्शन नु आखी वाते पुरी होयने वाळी छे।

24“काहकी इसराएल क घराना मा नी ते आरु जादा झुट दर्शन नी काय वात आरु नी काय चीकनी चुपड़ी वात ओळी कोवायसे। 25काहकी हांव योहोवा छे, जोत्यार हांव कोह, तव ते बुल हांव कोहो, त्यो पुरो होय जासे। उनामा वार नी होयसे, पुन हे लोड़ाय कोरनेवाळा घराना, तुमरात दाहड़ा मा हांव बुल कोहीस, आरु त्या पुरो होय जासे, पोरबु योहोवा नु यो बुल छे।”

26ओळी योहोवा क यो बुल मार पास पुग्यो, 27“हे मानुस नी ओवलीयाद देख, इसराएल क घरानान लोगहन यो कोय रोया छे, जे दर्शन त्या देखे, त्या बेसका दाहड़ा वाद पुरो होयनेवाळा छे; आरु की त्या छेटान टेमोन वाराम भोगवानो वोगे गोथी वात कोरे छे। 28एकालीय तु उना सी कोय, पोरबु योहोवा असो कोवे छे: मार काहना बुल को पुरो होयनेम ओळी वार नी होयसे, पुन जो बुल हांव कोहो त्यो छाचीन पुरो होयसे, पोरबु योहोवा को यो बुल छे।”