Dhankavi Bible
योहेजकेल 11
योरुसालेमन वाक
तव आत्मा ने मेसे उठाड़ीन योहोवा न भवन क उगेनला झपला क धड़ जेको मुय उगेनले भेनी छे, पुगाड़ देदो; आरु चाँ हांव न काय देख्यो, की झपलात मा पच्चीस मानसे छे। हांव हेनका वीच अज्जुर क पुर्यो याजन्याह क आरु बनायाह क पुर्यो पलत्याह क देख्यो, जो प्रजा क डाहलो हुतो। तव त्यो मार सी कयो, “हे मानुस नु ओवलीयाद, जे मानसे एना सोहोर मा भुनलो कोरनेन आरु भुनलो कोरनेन वीचार कोरता होय त्या येज छे। ये कोवे छे, घर बनावने क टेम धड़े नी, यो सोहोर हांडो आरु हामु उनामा क मास छे। एकालीय हे मानुस क ओवलीयाद, एनका वीरुद्ध भोगवानो वोगे गोथी वात देखाड़, भोगवानो वोगे गोथी वात।”
तव योहोवा क जीव मार पोर उतरीयो, आरु मार सी कयो, असो कोह, योहोवा असो कोवे छे: हे इसराएल क घोराना, तुमु ओसाज कोहला छे: जो काहीन तुमरा मोनोम आवे छे, ओको हांव जानो छे। तुमु ते एना सोहोर मा बेसका मार नाखला पुन हेका वाटोक धोड़ो सी भोर देदला छे।
“ओस कोरीन पोरबु योहोवा असो कोवे छे: जेनु मानसोक तुमु एनाम मार नाखला छे, हेनका शव एना सोहोररुपी हांडाम क मांस छे: आरु तुमु एका वीच सी निकळी जासु। तुमु तलवार सी बीहता होय, आरु हांव तुमरे पोर तलवार चालाड़ीस, पोरबु योहोवान यो बुल छे। हांव तुमुक एरेम सी निकाळीन पारकादेस क हात मा कोर देसु, आरु तुमुक डोन आपाड़ीस। तुमु तलवार सी मारीन पाड़सु, आरु हांव तुमरा डोन इसराएल क देस क काकड़ पोर चुकाड़ीस; तव तुमु जान लोसु की हांव योहोवा छे। यो सोहोर तुमरे जुगु हंडा नी बोनसे, आरु नी तुमु एनामा क मास होयसु; हांव तुमरा डोन इसराएल क देस क काकड़ पोर चुकाड़ीस। तव तुमु जान लेसु की हांव योहोवा छे; तुमु ते मारा कायदा पोर नी चाल्या, आरु मारा कायदा क तुमु नी मान्या; पुन आपसा च्यारु भेनीन मुलुकोन रीतीयो पोर चाल्या होय।”
हांव ओस कोरीन भोगवानो वोगे गोथी वात कोर रोयो हुतो कीक बनायाह क पुर्यो पलत्याह मोर गुयो। तव हांव मुयोन भुरसे हिट पोड़्यो उचा बुल सी आयड़ी उठ्यो, आरु कयो, “हाय पोरबु योहोवा, काय तु इसराएल क वाचला क सत्यानास कोर नाखसे?”
बांदाय मा गोयला लोगहन क परमेश्वर क वायदो
तव योहोवा क यो बुल मार पास पुग्यो, “हे मानुस नु ओवलीयाद, योरुसालेम क निवासियो न तारे धड़े भास्यो सी, पुन इसराएल क आखा घराना सी वी कहलो छे की तुमु योहोवा क पास सी छेटा होय जावु, यो देस हामरा होक मा आप देदलो छे। कदाम तु उना सि कोवे, पोरबु योहोवा असो कोवे छे: हांव तुमुक छेटा छेटान मुलको मा बसाड़ियो आरु देस देस मा वेरावेर कोर देदो छे, तेवी जीना देसो मा तुमु आवला होय, उना मा हांव आपसो तुमरे लीय थुड़ाक दाहड़ा लगुन चुखला जागाम रोहिस। एकालीय उनासी कोह, पोरबु योहोवा असो कोवे छे: हांव तुमुक मुलुक मुलुकोम क लोगहन क वीच मा वेरवीस, आरु जीना देसोम तुमु वेरावेरा कोरला छे, उनामा सी तुमुक एकठा कोरीस, आरु तुमुक इसराएल क जागो आपीस। त्या चाँ पुगीन उना देस क आखा घाड़ायीन मुरते आरु आखा घाड़ायीन काम वी उनामा सी छेटो कोरसु। हांव हेनका काळजा एक कोर दीस, आरु हेनका धड़े नोवली आत्मा उपजाड़ीस, आरु हेनका डील मा सी दोगड़ा सारको काळजो निकाळीन हेको मांस क काळजो आपीस, जेरेसी त्या मारा कायदा पोर दाहड़ी चाल्या कोरे आरु मारा कायदाक माने; आरु त्या मारी पोरजा कोहायसे, आरु हांव हेनको परमेश्वर कोहाईस। कदाम त्या लोगहन जे आपसी घाड़ायीन मुरती आरु घाड़ायीन कामोम मोन लागाड़ीन चालता रोहे छे, हेनको हांव असो कोरीस की हेनकी चाल हेनका मुनका पोर पोड़से, पोरबु योहोवा क यो बुल छे।”
परमेश्वरन सेक योरुसालेम सी निकळनो
करुब न आपसा पाखड़ा खवळ्या। चाकटा वी हेनका भेळ भेळा चाल्या। करुब, क उपोर इसराएल क परमेश्वर क सेक हुतो। देखता देखता योहोवा क सेक सोहोरोन वीच सी निकळीन वादळा मा उठ गुयो। हांव देख्यो की योहोवा क ताकोत उना बोयड़ा पोर रोय गुयो जो सोहोर क उगेनले भेनी छे। ओळी हांव परमेश्वर क जीव क लारे यो दर्शन देख्यो: आत्मा न मेसे उठाड़्यो आरु कोसदि देस मा निकाळीन मारी जाती भाय बोन्या क मेसे पुगाड़ देदो। ऐरे वाद दर्शन सोर गुयो। तव जोतरी वाते योहोवा न मेसे देखाड़्यो हुतो, ची हांव न बांदायला क बताड़्यो।
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.