नीरगमन 6

1तव योहोवा भगवान मुसा सी कयो, “जो वेवहार हांव फिरोन क पुठी कोरीस, हेमी तु ओको देखीस। त्यो म्हार मोटी ताकोक क कारन आपसा देश सी ओको मुकलसे। वीनभुरसे म्हार मोटी ताकोत क कारण त्यो ओको निकाळ देसे।”

मुसा क बुलायो जानो

2योहोवा भगवान मुसा सी कयो, हांव योहोवा भगवान छे।1 3हांव आखा सी मोटो ताकोत वाळो भगवान क नाव सी अबराहम, इसहाक, आरु याकुब को दर्शन देतो हुतो, पुण योहोवा भगवान क नाम सी तीन्दरे पर उजेन्तो नी हुयो।2 4आरु हांव उन लोगहन क साथ मा म्हारी वाचा वातड़ी करलो छे, मतलब कनान देश जीना मा त्या बाहर देश वाळा बनीन हयता हुता, त्यो हेन्को आपदेयो।3 5इसराएली जीनुक मिसरी लोगहन आपसा हको तळे राखे, तीन्दरो आयेड़नो बी समळीन हांव म्हारी वाचाक फोम करलो छे। 6अतरान करीन तु इसराएलीया सी कय, हांव योहोवा भगवान छे, आरु तुमुक मिसरीयान भारो तळे रईन निकाळीस, आरु तीन्दरा गुलामी सी तुमुक छुड़ावीस, आरु म्हारो हाथ बढ़ावीन आरु वातड़ो दण्ड आपीन तुमुक छुड़ाय लीस, 7आरु हांव तुमुक म्हारा लोग बनावने करीन मान लीस, आरु हांव तुमरो योहोवा भगवान ठेहरीस; आरु तुमु जान जासु की हांव तुमको मिसरीयान भारो तळे रईन निकाळ लायो। 8आरु जीना देश को आपनेन हांव अबराहम, इसहाक, आरु याकुब सी हात उचो कोरीन वायदो करलो हुतो उनात् मा हांव तुमको पुगाड़ीन उको तुमरो होक बनाय दिस। हांव तो योहोवा छे। 9यी सारी वात मुसा इसराएलीया लोगहन को समळाय दिदो; पुण हेनको मन दु:खी हुयने सी आरु गुलामीन वेलान कारण सी मुसान नी समळीया। 10तव योहोवा मुसा सी कयो, 11"तु जाईन मिसरन राजा फिरोन सी कय की इसराएली लोगहन थार देश मा सी निकळी जाने दे। 12आरु मुसा योहोवा सी कयो, "देख, इसराएली लोगहन म्हारी नी समळीया; ओळी फिरोन म्हार गुंगड़ान वात काहा समळसे?" 13तव योहोवा मुसा आरु हारुन को इसराएली आरु मिसरन राजा फिरोन क लीये इनीये रीतीये हुकुम दीदो की त्या इसराएली लोगहन को मिसर देश सी निकाळी ली जाय।

मुसा आरु हारुन नी ओवलीयाद

14हेनका डाहडान क घरानान खास ओदमी या छे: इसराएलन पेहला खुळान रुबेन क पोर्‌यो हनोक, पल्लु, हेसरोन आरु कर्मी हुता; इनु सी रुबेनन खानदानी निकळी। 15आरु शिमोन को पोर्‌यो: यमुएल, यामीन, ओहद, याकीन, आरु सोहर हुता, आरु एक कनानी बायोरन पोर्‌यो शाऊल बी हुतो; इनु सी शिमोन नी खानदनी निकळी।4 16लेवीन पोर्या जीनु सी ओवलीयाद चाली, उन लोगहन क नाव यो छे: गेर्शोन, कहात आरु मरारी, आरु लेवीन पुरी उमोर एक सोव सयतीस साली हय। 17गेर्शोन न पोर्‌यो जीनु सी हेनकी खानदानी चाली: लिबनी आरु शिमी हुता। ये आपसी जातीन डाहला हुता। 18कहातन पोर्या: अम्राम, यिसहार, हेब्रोन, आरु उज्जीएल हुता, आरु कहात न पुरी उमोर एक सोव सेंतीस सालोन हय।5 19मरारी न पोर्या: महली आरु मुशी हुता। लेवीयान जाती जीनु सी हेनकी ओवलीयाद चाली यात् छे। 20अम्राम आपसी फुय योकेबेद सी वीयाव कर लीदो आरु उना सी मुसा हारुन पयदा हुया, आरु अम्रामन पुरी उमोर एक सोव सेमतीस सालन हय। 21यिसहारन पोर्या: कोरह, नेपेग आरु जीक्री हुता। 22उज्जीएल न पोर्या: मीशाएल, एलसाफान आरु सित्री हुता।

23हारुन अम्मीनादाब न बेटी, आरु नहशोन नी बयणी एलीशीबा सी वीयाव कर लीदो; आरु उना सी नादाब, अबीहु, एलीयाजर आरु ईतामार पयदा हुया। 24कोरहन पोर्या: अस्सीर, एल्काना आरु अबीआसाप हुता; आरु इनु सी कोरहियान जाती निकळी। 25हारुन न पोर्या एलीयाजर पुतीएल न पोराई सी वीयाव कर लीदो; आरु उका सी पीनहास पयदा हुयो। जीना सी हेनकी जाती चाली। लेवीयान डाहडान घरानान यात् ओदमी छे।

26हारुन आरु मुसा त्यात् छे जीनुक योहोवा भगवान हुकुम आपलो "इसराएली लोगहन को टुळुन टुळु करीन हेनका जत्थान अनसारे मिसर निकाळ ली आवो।" 27या त्यात् मुसा आरु हारुन छे जे मिसर देश न राजा फिरोन सी कया की हामु इसराएली लोगहन को मिसर सी निकाळ ली जासु।

योहोवान मुसा को फिर सी बुलावनो

28जव योहोवा मिसर देश मा मुसा सी यी वात करीयो, 29त्यो मुसा सी कयो, "हांव ते योहोवा छे; अतरान करीन जो काय हांव तुमुक कयीस त्यो सब मिसर देशन राजा फिरोन सी कयजो। 30पुण मुसा योहोवा को जवाब दीदो, हांव ते बुलने मा गुंगड़ो छे; आरु फिरोन म्हारी वात कसो समळसे?"