नीरगमन 38

आगठान बलीन वेदी बोनावनो

(नीरगमन 27:1-8)

1ओळते त्यो बाबळीयान लाकड़ान होमबली करने करीन वेदी बी बनायो; ओकी नाम्बाय पाच हात आरु चवड़ाय पाच हातन हुती; इनीये रीतीये सी त्यो च्यार खुनाय बनी, आरु ऊचाय तीन हातन हुती। 2आरु त्यो उना च्यारो कुना पर उना च्यार सींगड़ा बनाया, आरु‍ त्या उना पुठी मा वीगुर जुड़न बनीया; आरु त्यो उको पीतळ सी ढाळाया। 3आरु त्यो वेदीम सारो समान, मतलब ओकी टाहरा, पावड़िया, कटवरा, चीमटा, आरु सुपड़ी को बनाया। ओको सारो सोमान त्यो पीतळन बनायो। 4आरु वेदीन लीये उना च्यारो मेरन झारा तळे त्यो पीतळन जाळीन एक झांझरी बनायो, त्यो नेचो रयीन वेदीन ऊचायन वीच तक पुगी। 5आरु त्यो पीतळन झांझरीन च्यारु कुना क लीयन च्यार कड़ीया ढाळीया, जो डांडान खाचान काम देय। 6ओळतेन त्यो बाबळीयान लाकड़ान डांडा बनायो आरु पीतळ सी ढाळीयो। 7तव त्यो डांडान वेदीन तरफ कड़ीया मा वेदी को हाकलने करीन न्हाक दीदा। वेदीन धोड़े त्यो पाटिया सी पुल्ली बनायो।

पीतळन मोटलो तोपलो बनावनो

(नीरगमन 30:18)

8त्यो मोटलो तोपलो आरु उका पाया दुयु पीतळन बनायो, यो मिलापवाळा तम्बुन झोपला पर चाकरी करनेवाळी बायरान पीतळ सी आरसा बोनायो।

रोहनेन जागाम आंगनो बोनावनो

(नीरगमन 27:9-19)

9ओळतेन आंगनो बनायो; आरु दोखेवरे क लीयन आंगनान परदा वाटयली सुतोन सुळावा सनीन छिंदरा हुता, आरु आखो मिळीन सोव हात नांबा हुता; 10हेनको लीये वीस खम्बा, आरु ओकी पीतळन कुड़ची बनी; आरु खाम्बान हेकड़िया आरु जुड़ने वाळी लाकुड़ चाँदीन बनी। 11आरु दोकेवरे तरफ सी सोव हात नाम्बा परदा बनीया; आरु हेनका लीयेन वीस खाम्बा, आरु हेनका पितळन वीस कुड़चीया बोनी, आरु खाम्बो क हेकड़ीया आरु जुड़ने क लीय लाकड़िया चाँदीन बोनी। 12आरु बुडेनो क भिनी क लीय आखा पोरदा मेळीन पचार हातन हुता; उना क लीय दोस खाम्बा, आरु दोसुत हेन्दरी कुड़चीया होती, आरु खाम्बा क हेकड़ियाँ आरु जुड़ने क लाकड़िया चाँदी क हुती। 13आरु उगेवने भिनी वी होयी पोचास हात क हुता। 14आँगना क झोपला क एक धोड़े क लीय पोंद्रे हात क पोरदा बोन्या; आरु उना लीय तीन खाम्बा आरु तीन कुड़ची होती। 15आरु आँगना क झोपला क दिसरे ओख्ये वी तोसोन बोनलो हुतो; आरु आँगना क झोपला क आड़े आरु धोड़े पोंद्रे-पोंद्रे हात क पोर्दा बोनला होता; आरु उना लीय तीनुत तीन खाम्बा, आरु तीनुत तीन हेनकी कुड़चीया वी होती। 16आँगना क च्यारु ओखे आखा पोर्दा सुळावा वाटायला सनी क लुगड़ा क बोनलो हुतो। 17आरु खाम्बा क कुड़चीया पितळ क, आरु हेकड़ीया आरु लाकड़िया चाँदिन बोनली, आरु उना मुनका चाँदी सी मढ़े गोया, आरु आँगना क आखा खाम्बा चाँदी क लाकड़िया सी जुड़ाय गोया हतो। 18आँगना क झोपला क पोर्दा पोर बेल बुटेन काम कोरलो हुतो, आरु हुयो निळ्ळा, जामनिया आरु रातला रोंगोन क छिंदरा क; आरु सुवाळा सनी क छिंदरान बोनलो हुतो; आरु ओकी नांबाय बिस हातन होती, आरु ओकी उचाई आँगना क कनात क चोड़ाई क सामान पाच हात क बोन्यो। 19आरु उना लीय चार खाम्बा, आरु खाम्बान चारुत कुड़चीया पितळ क बोनी, ओकी हेकड़ीया चाँदी क बोनी, आरु उना मुनका चाँदी सी घड़ीया, आरु उना लाकड़िया चाँदी क बोनी। 20आरु रोहने आरु आँगनान च्यारु ओखे आखा खुटा पितळन बोनलो हुतो।

रोहनेन जागा जुगु चीजोन पुरावो

21गोवान चीट्ठी रोहनेन सोमान जो लेवीयोन चाखरीन काम लीय बोनलो; आरु जेनकी गिनती हारुन याजक क पुर्या ईतामारन लारे मुसा क कोहने सी होयली होती, ओको पुरावो यो छे।

22जेनी-जेनी चीजो क बोनावने क हुकुम योहोवान मुसा आप्यो हुतो ओको यहुदान गोत्रवाळा बसलेल, ज हुरन पोतो आरु ऊरीन पोरीयो होतु, बोनाय देदो। 23आरु उना पुठी दान गोत्रवाळा, अहीसामाकन पुर्या, ओहोलीआब हुतो, जु नक्काशी कोरने आरु काढ़नेवाळा आरु निळ्ळा, बैंगनी, आरु रातला रोंगोन क आरु सुळावा सनीन छिंदरा मा कढ़ाई कोरनेवाळा हुसीयार कारीगर हुतो। 24चुखला जागान आखा काम मा जो भेटन सोनो लाग्यो चो चुखला जागा क शेकेलन हिसाब सी उनतीस कीक्कार, आरु सात सोव तीस शेकेल हुतो। 25आरु मण्डळी क गिनयला मानसो क भेंट क चाँदी चुखला जागा क शेकेल क अनसारे सी लगभग तीन हजार पांच सोव बीस कीला हता। 26जतरा वीस साल क आरु हेरेसे जादा उमोर क गिनायला होता, चे छोव लाख तीन होजार साढ़े पाच सोव मानसे हुता, आरु एक-एक जन क भिनी सी चुखलाजागा क शेकेल क ओनसारे आदो शेकेल, ज एक बेका होये छे, मिड्ळ्यो।1 27आरु हुयो सोव कीक्कार2 चाँदी चुखला जागा आरु वीचवाळा पोरदा दुयु क कुड़ची क ढाळने मा लाग गोय; सोव कीक्कार सी सोव कुड़चीया बोनी, एक-एक कुड़ची एक कीक्कार क बोनी। 28आरु सोतरे सोव पचहत्तर शेकेल3 जे वाच गोयो हेरेम खाम्बा क चोटियो मढ़ी गोय, आरु ओकी लाकड़िया वी बोनाय गोयी। 29आरु भेंट क पितळ सत्तर कीक्कार आरु दुय होजार चार सोव शेकेल हुता;4 30एरेसे मिलापवाऴा तम्बु क झोपला क कुड़चीया, आरु पितळन वेदी, पितळ क झंझरी, आरु वेदी क आखो सोमान; 31आरु आँगना क च्यारु ओखे क कुड़चीया, आरु उना झोपलान कुड़ची, आरु निवास, आरु आँगनान च्यारु मेर क खुटा वी बोनाया गोया।