Dhankavi Bible
नीरगमन 35
आरामन दाहड़ु मोनावने क नियम
मुसा न इसराएल क आखा लोगहन क एकठा कोरीन उनासी कयो, “जेना काम को कोरनेन हुकुम योहोवा आपलो छे त्या ये छे। छव दाहड़ा ते काम कोरजो, पुन सातवो दाहड़ो तुमरे लीय आरु चुखलो आरु योहोवा क लीय खास आरामन दाहड़ो कोहायसे, उनामा जो काय काम कोरसे त्यो मार नाख्यो जासे;1 पुन आरामन दाहड़े तुमु आपसा घरोम चुलो भी मा धपाड़ता।”
चुखला तम्बु क लीयन भेंट
(नीरगमन 25:1-9)
ओळते मुसा इसराएलीयान सारी मण्डळी सी कयो, “जीनी वातन हुकुम योहोवा भगवान आपलो छे त्या यी छे। तुमरे जुळ रयीन योहोवा भगवान क लीयन भेट लेय, मतलब जतरा बी आपसी राजी मरजी सी आपनो चाहे त्या योहोवा भगवानन भेट करीन यी चीज ली आवे; मतलब सोनो, रुप्या, पीतळ; नीळ्ळा, जामनीया रंगन आरु रातला रंगन छिंदरा, सुवाळा छिंदरा, बकड़ान झटा, रातला रंगो सी रंगायली गाडरान खालड़ा, आरु सुईसो नावोन मोटला माछान खालड़ा; बाबळीयान लाकड़ा, वीजाळो आपने करीन तेल, पवीत्र कोरलो तेल, आरु धूद देने करीन वारु गंधायने वाळी चीज, ओळी एपोद आरु छाती पोर बांदनीया क लीयन सुलेमानी मणिया आरु लगाड़नेन मणि।
परमेश्वरन रोहनेन तम्बु क करता भाती भातीन चीजे
(नीरगमन 39:32-43)
“तुमरे मा सी जतरान जीवड़ा मा ओकलन वीजाळो छे त्या सब आवीन जीनी-जीनी चीजन हुकुम योहोवा भगवान आपलो छे त्या सब बनावे। मतलब तम्बु, आरु वोरसादी को सात मा निवास, आरु ओकी हेकड़ा, चोखट, डांडा, खाम्बा, आरु कुड़ची; ओळी डांडान को सात मा सन्दुक, आरु पछतावान ढाकनो, आरु वीचवाळा परदा; डांडा आरु सब समान को सात टेबल, आरु भेटन रोटा; समान आरु दीवान क सात मा वीजाळो आपने वाळा खुटो, आरु वीजाळो आपने करीन तेल; डांडान क सात मा धूप देनेन वेदी, चुखलो तेल, वारु गंधायने वाळो धूप, आरु निवासन झोपलान परदो; पीतळन जाली, डांडा हसलोत् आरु आखो समान होमबली, पायान सात मा मोटलो तोपलो; खाम्बा आरु हेनकी कुड़चीन क सात मा आँगनान परदा, आरु झोपलान परदा; निवास आरु आँगनान दुयु खुटा, आरु दुयड़ा; चुखला जागा मा सेवा चाकरी करने करीन होभावळा छिंदरा, आरु पुजारान काम करने करीन हारुन पुजारान चुखला छिंदरा, आरु उना पोर्यान छिंदरा बी।”
लोगहन को भेट लावनो
तव इसराएलीयान आखा लोगहन मुसान सामने सी जाती रया। आरु जतरा जनान जुर वदियो, आरु जतरा जनान मन मा असी मरजी पड़ी की, त्या मिलापवाळा तम्बुन काम करने करीन आरु ओकी सारी सेवा चाकरी आरु चुखझला छिंदरा बनावने करीन योहोवा भगवानन भेट लावने लागिया। काय बायरा ने आरु काय ओदेमड़ा, जतरा जनान मन मा असी मरजी पड़ी की त्या सब गळान हार, नाक मा पेहरने वाळा सोनान कुचा, मुंदिया आरु हसी घण सवटी चीज सोनान गयनो लावने लागीया, इनीये रीतीये जतरा मनुस योहोवा भगवान क लीयने ओसनान भेट आपनेवाळा हुता त्या सब हेनको ली आया। आरु जीना-जीना ओदेमड़ान क पास नीळ्ळा, रींगनीया रंगन या रातला रंगन छिंदरा या सुवाळा छिंदरा, या बकड़ान झटा, या रातला रंग सी रंगायली गाडरीन खाल, या सुईसो नावन मोटला माछान खालड़ा हुता, त्या हेनको ली आया। ओळते जतरा चाँदी, या पीतळन भेट आपने वाळा हुता त्या योहोवा भगवान वाटे भेट ली आया; आरु जीना-जीनान पास मा सेवा चाकरीन काहला बी काम लीयन बाबळीयान लाकड़ा हुता त्या उको ली आया। आरु जतरी बायरन जीवड़ा मा ओकलन आरु कला हती त्या आपसा हातो सी सुत बोनावीन नीळ्ळा, जामनीया रंगन आरु रातला रंगन, आरु सुवाळा सनीन कातेरला सुत को ली आवी। आरु जतरी बायरन मन मा असी ओकलन वीजाळो हुतो त्या बकड़ान झटा बी घुथला। आरु मुखी लोगहन एपोद आरु छातीये बांदने लीयन सुलेमानी मणि, आरु जड़नेन मणि, आरु वीजाळो आपने आरु चुखो कोरलो तेल आरु धूपन वारु गंधायने वाळी चीज आरु तेल ली आया। जीनी-जीनी चीजन बनावने हुकुम योहोवा भगवान मुसान लारे आपलो हुतो, हेनका लीयन जो काय जरुरी हुतो, उको त्या ओदेमड़ा आरु बायरा मेळीन ली आया, जतरा जना मन मा असी मरजी हयली हुती। इनीये रीतीये इसराएली योहोवा भगवान क लीये आपसी मरजी सी भेट ली आया।
मिलापवाळा तम्बु क बनावन्यु कारीगर
(नीरगमन 31:1-11)
तव मुसा इसराएलीया सी कयो समळो, “योहोवा यहुदान घराना वाळा बसलेल को, जो ऊरीन पोर्यो आरु हुरन पोतो छे, नाव लीन बुलायो। आरु त्यो उको योहोवा भगवानन आत्मा सी असो भराय गीयो की सब भातीन चीज बनावनेन असी ओकलो जड़ली छे, की त्यो कारीगारी करने ओकल लगाड़ीन सोना, चाँदीन, आरु पीतळोन ठाहरा बोनावे, आरु लगाड़ने करीन मणि काटने मा आरु लाकड़ा पर चीतरो बनावने मा, या तक की आखी भातीन निकाळी बनावने मा काम कोरे। ओळते योहोवा भगवान उना मन मा आरु दानन घराना वाळा अहीसामाकन पोर्या ओहोलीआबन मन मा सिकापन आपनेन ताकत आपीयो। इनु दुयन को मन को योहोवा भगवान ओसी बुध्दि क असी ओकल सी भरीयो, की त्या आकने मा आरु ढाळने मा आरु नीळ्ळा आरु रातला रंगन छिंदरा, आरु सुवाळा छिंदरा काढ़ने आरु वीन्दने मा, सब भातीन बनावने मा, आरु ओकल सी काम निकाळने मा सब भातीन काम करे।
Source notes (1)
- Cross-reference नीरगमन 20:8-11; 23:12; 31:15; 34:21; 5:12-14
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.