Skip to content
BibleKenya

Dhankavi Bible

नीरगमन 31

तोम्बा क लीय कामकोरनीया

ओळी योहोवा न मुसा सी कोयो, “सोमोळ, हांव ऊरीन पुर्य बसलेलन, जो हुर क पोतो आरु यहुदान घोरानान छे, नाव लीन बुलावो। आरु हांव उना परमेश्वरन आत्मा सी ज ओकल, हुसीयार, गियान, आरु सब भातीन कामो क सोमोज आपनेवाळो आत्मा छे, पुरोनपुरो कोरो, जेरेसी हुयो कारीगरीन काम ओकोल सी निकाळीन सब भातीन बोनावोट मा, सोना, चाँदी, आरु पितळ मा, आरु लगाड़ने लीय मणि काटने मा, आरु लाकड़ा पोर नक्काशीन काम कोरे। आरु सोमोळ, हांव दानन गोत्रवाला अहीसामाकन पुर्य ओहोलीआबन उना पुठी कोर देये छे; बाखुन जोतरा ओकल मान छे हेनु सबन काळजा मा हांव ओकोल आपो छे, जेरेसी जोतरी चीजोन हुकुम हांव न तुखे आपलो छे हेनु सबोक हुये बोनावे; यानी मिलापवाळा तम्बु, आरु गोवान चीट्ठी सन्दुक आरु हेर पोरन पोशतावा वाळा ढकना आरु तम्बुन आखो सोमान, आरु सोमान भेळ टेबल, आरु आखा सोमान भेळ चुखला सोनान दिवो, आरु धूपवेदी, आरु आखा सोमान भेळ होमबली, आरु पाया भेळ मोटलो तोपलो, आरु वींदला छिंदरा, आरु हारुन याजकन याजकवाळा कामन चुखला छिंदरा, आरु उना पुर्यान छिंदरा, आरु ओलोग कोरलो तेल, आरु चुखला जागान लीय गोंदायन्यो धुप, एनु आखान त्या उना आखा हुकुमोन ओनसारे बोनाये जो हांव तुखे आपलो छे।”

सब्त मतलब आरामन दाहड़ो

ओळतेन योहोवा मुसा सी कोयो, “तु इसराएलीयो सी असो वी कोहजी, छाचीन तुमु मारा आरामोन दाहड़ाक माननो, काहकी तुमरी पीढ़ी पीढ़ी मा मारा आरु तुमु मानसोन वीच यो एक सोहलानी कोहायसे छे, जेरेसी तुमु यी वात जान राखु की योहोवा हामरो चुखलो कोरने वाळो छे। ओस करीन तुमु आरामोन दाहड़ाक मानजु, काहकी हुयो तुमरे जुगु चुखलो कोहाये छे; जुळ हेको वीटोळ कोरे त्यो छाचीन मार नाख्यो जाय: जुळ कुय तेने दाहड़े मा काई काम-काज कोरे हुयो जीव आपना मानसोन वीच सी निकाळे जाय। छोळ; दाहड़ा काम-काज कोरजो, बाखुन सातवे दाहड़े परम आरामोन दाहड़ो आरु योहोवा लीय चुखलो छे; एकालीय जुळ कुय काई आरामोन दाहड़े मा काई काम-काज कोरे हुयो छाचीन मार नाख्यो जाय।1 एकालीय इसराएली आरामोन दाहड़ाक मान्या कोरे, बाखुन पीढ़ी पीढ़ी मा हेको जोलेमका वायदान वाराम जानीन मान्या कोरे। हुयो मारे आरु इसराएलीयोन वीच जोलेमका एक सोहलानी रोहसे, काहकी छव दाहड़ा मा योहोवान वादळा आरु कळीक बोनायो, आरु सातवे दाहड़े आराम कोरीन आपसो जीव सेवो कोरीयो”2 जब परमेश्वर मुसा सी सीनाय बोयड़ा पोर ओसी वात कोरीयो, ती त्यो हेको आपसु आँगळी सी लीखायली गोवान आपनेवाळी दोगड़ान दुये ओख्ये पाटिया आपीयो।

Source notes (2)
  1. Cross-reference नीरगमन 20:8-11
  2. Cross-reference नीरगमन 20:11

Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.