Dhankavi Bible
नीरगमन 2
मुसान जोन्मोवारी
लेवी क घरानान एक मनुस एक लेवी जाती न बायर सी वीयाव कर लीदो। ची बायर भार पाये हय आरु उको एक पोर्यो पयदा हुयो; आरु यो देखीन की त्यो बाळो घाटाळो छे, उना उनासी बाळा क तीन महीना तक सातीन राखी।1 जव ची बायर उको जादा समय तक सातीन नी राख सकी तव उका लीयन टुकरान बनावली एक खिल्ली लेदी आरु उनी पर चीकनु धुळु आरु राल लगाड़ीन, उना मा बाळा को मेळीन नील नदीन काठा पर काहळान वीच मा छुड़ी आवी। उना बाळान बयनी दुर उबी रहवी यो देखने की ओको काय हाल हुयसे। तव फिरोन राजान पोराय ऊंगळने करीन नदी न काटा पर आवी; ओकी पावराय बी काठा पर फिरती हुती; तव ची काहळान वीच मा खिल्ली को देखीन आपसी पावराय को उको ली आवने करीन लेने मोकली। तव फिरोन राजान पोराय उनी खिल्ली काजे उगाड़ीन देखी की उका मा रोड़तलो एक बाळो छे; तव उको उना बाळा पर दया आवी आरु ची कयने लागी, “यो ते इबरी जाती बाळो हसे।” तव बाळान बयनी फिरोन राजा नी पोरय सी कयने लागी, “काय हांव जाईन इबरी बायर माईन काहली एक बाय को तारे पास बुलाय लावो जो तारे लीये बाळा को दुध पिवाड़िया करे?”
फिरोन न पोराय कहवी, “जा।” तव ची पोराय जाईन बाळान माय को बुलाय लावी। फिरोन राजा न पोराय उना सी कयी, “तु इना बाळा को ली जाईन म्हारे लीये दुध पाया कर, आरु हांव तुको दाहड़की देय दिस।” तव ची बायर बाळा को ली जाईन दुध पावने लागी। जव बाळो थुड़क मोटो हुयो तव ची उना बाळा को फिरोन न पोराय क पास मा ली गय, आरु त्यो उको पोर्यो बनियो; आरु ची यो कयीन उको नाव मुसा राखी, “की हांव उको पानी मा सी निकावली हुती।”
मुसा क मिद्यान देश मा ढासनो
जव मुसा जुवान हुयो, आरु उना दाहड़ा मा बाहर आपसा भाईबनिया क पास जाईन उन लोगहन क दु:खो क देखने लागीयो; तव त्यो देखियो की कोय मिसरी मनुस ओको एक इबरी को सात लड़ाईन उको दी रयो।2 जव मुसो अथोन-अथो देखियो की कोय नी हय, तव उना मिसरी मनुस को मुसो मारीन बालु रेतळा मा सात दीदो। ओळते दिसरे दाहड़े बाहर जाईन देखियो की दुय इबरी मनुस आपसुत लड़ाय कर रीया; ती मुसो गुनाका मनुस को कयो, तु तारा भाई क काय लेने दी रयो?
त्यो मनुस कयो, “कुन तुको हामरे पर हक राखनीयो मुखी आरु नियाव करने वाळो बनायो? जीने रीतीये तु मिसरी मनुस को मार न्हाकीयो तीनिये रीतीये तु मेखे बी मारने हुय रीयो?” तव मुसा यो सोचीन बीह गयो की छाची यी वात उजन्ती हुय गय। जव फिरोन इनी वात को समळीयो तव मुसा को मार न्हाखने योजना बनायो। पुन मुसा फिरोन क सामने सी ढास गियो, आरु मिद्यान देश मा जाईन रोहने लाग्यो; आरु त्यो वाँ सारी एक कुँवान पास मा जाईन बठ गियो।3 मिद्यान न पुजारान सात पोराय्यो हुती; आरु ची वाँ आवीन पानी भरने लागी की कठड़ा मा पानी भरीन आपसा बाप न गाडरा-बुकड़ा को पानी पिलावे। तव गुवाळीया आवीन हेनको छेटा करने लागीया; अतरा पर मुसा उबो हईन उनी पोराईयोन मद्त करीयो, आरु गाडरा–बुकड़ान को पानी पिवाड़ियो। जव ची पोराईयो आपसा बाप रुएल क पास आर आवी, तव त्यो पोराइयो सी पुछियो, “काय कारण छे की आज तुमु अतरा छाटा आत रीया?”
चे कया, एक मिसरी मनुस हामुक गुवाळीया सी छुड़ायो, आरु हामरे लीये घण सवटो पानी भरीन गाडरा–बुकड़ान को पिवाड़ियो।
तव रुएल आपसी पोराईयो सी पुछियो, “त्यो काँ छे? तुमु उको काय लेने छुड़ी आया? उको बुलाय लावो की त्यो खानो खाय।”
आरु मुसा उना मनुस क सात मा रयने खुश हुयो; त्यो मुसा सी आपसी पोराय सिप्पोरा सी वीयाव कर दीदो। आरु उको एक पोर्यो पयदा हुयो, तव मुसा यो कयीन की, हांव बाहर देश मा परदेशी छे, करीन उको नाव गेर्शोम राखियो।
घण दाहड़ा क बाद मिसर क राजा मर गियो। आरु इसराएली वातड़ी सेवान कारण ओकी–ओकी दम लेने लागीया, आरु आयड़ता हुता, आरु उन लोगहन की वातड़ी सेवा क कारण हेनको आयेड़नो योहोवा भगवान तक पुग गियो। आरु योहोवा भगवान उन लोगहन क आयेड़नो समळीन ओकी वाचा को, जो योहोवा भगवान अबराहम, आरु इसहाक, आरु याकुब क साथ मा बाँधली हुती फोम करीयो।4 आरु योहोवा भगवान इसराएली लोगहन पर नजर लगाड़ीन मन लगाड़ीयो।
Source notes (4)
- Cross-reference इब्रानियों 11:23
- Cross-reference इब्रानियों 11:24
- Cross-reference इब्रानियों 11:27
- Cross-reference उत्पत्ति 15:13,14
Dhankavi Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.