नीरगमन 18

यित्रो कमुसा सी मिळनो

1जब मुसा क सेसरा मिद्यान क याजक यित्रो न यो सुन्यो की परमेश्वर न मुसा आरु आपसा मानसो इस्राएल क लीय काय काय कोर्‌यो, यो की काहने रीते सी योहोवा इसराएलीयो क मिसर सी निकाळ ली आयो, 2ती मुसा क ससुर यित्रो मुसा क लाड़ी सिप्पोरा क, जी पेहेल मायके मुकली देदो हुता, 3आरु उना पुर्या क वी लीन आयो; एनुमा सी एक क नाव मुसा न यो कोहीन गेर्शोम पाड़्यो हुतो: “हांव दिसरा देश मा पारकु छे।”1 4आरु दुसरा क नाव हुयो यो कोहीन एलीएजेर2 राख्यो: “मारा बाबा परमेश्वर न मारो सहायक होईन मेसे फिरोन नु तलवार सि वाचाड़्यो।” 5मुसा की लाड़ी आरु पुर्याक, उना सेसरो यित्रो पुठी लीन मुसा क पास सुनला जोंगल क उना जागा मा ली आयो, जाँ परमेश्वर क बोयड़ान पास ओको डेरो हुतो। 6आरु आवीन हुयो मुसा क पास यो कोय मुकल्यो, “हांव मुसा तारु सेसरुस यित्रो छे, आरु दुयु पुर्या भेळ तारी लाड़ी क तारे पास ली आय रोयु।” 7ओतरान कोरता मुसा आपसा सेसरा सी मिळने क लीय निकळ्यो, आरु ओको वान्दीन गुळु देदो; आरु हुये आपसा वारु हावभाव पुछता जाईन डेरा पोर आय गोया। 8होंया मुसान आपसा सेसरा सी उना आखा कामोन वाराम बताड़ीयो। योहोवा न इसराएलीयो क जुगु फिरोन आरु मिसरीयो सी काय-काय कोर्‌यो, आरु इसरालीयो न वाट मा काय-काय वेला कोर्‌यो, ओळी योहोवा हेनुक कोसो-कोसो छुड़ावतो आयो। 9जव यित्रो न उना आखा भलाई क कारण जो योहोवा न इसरालीयो क साथ कोरीयो हुतो, की हेनको मिसर क होक सी छुड़ावलो हुतो, खुश होयीन कयो, 10यित्रो न कयो, “सोयाव्वु छे योहोवा, जु तुमु क फिरोन आरु मिसरीयो क होकोम सी छुड़ायु, जुळ तुमु मानसो क मिसरीयान हातोम सी छुड़ायु छे। 11हिमी हांव ते जान लेदु की योहोवा आखा देवता सी मोटू छे; बाखुन हेका वाराम वी जीनासी इसरालीयो क पुठी घाड़ायीन वेवहार कोरला हुता।” 12ती मुसा क सेसरो यित्रो न परमेश्वर क लीय होमबली आरु मेलबली चोढ़ायो, आरु हारुन इसराएलीयान आखा डाहडा पुजारा भेळ मुसा क सेसरा यित्रो क पुठी परमेश्वर क ओगोळ भोजन कोरने आया।

नियाव कोरनीयान नेवाड़नो

13दिसरे दाहड़े मुसा मानसो क नियाव कोरने क बोठ्यो, आरु वेगोत सी सांतो लोगुन मानसे मुसा क आड़ेधोड़े उबा रोया। 14जव मुसान सेसरो न हेनको लोगहन क नियाय कोरता देख्यो तव उनासी पुछ्यो लोगहन क लीय तु यो काय कोर रयो? काय कारण छे की तु एखलो बठ रयो, आरु लोगहन संदोरे सी शांतो लोगुन तार आड़े धोड़े उबा रोहे? 15मुसा न आपसा सेसरा सी कयो, “एको कारण यो छे की लोगहन म्हार पास परमेश्वर सी नियाव सिखने क लीय आवे। 16जोत्यार जोत्यार हेनको काहीन लोड़ाय होये छे ती ती हुये मारा पास आवे छे, आरु हांव हेनका वीच नियाव कोरो, आरु परमेश्वरन कायदा आरु व्यवस्था हेनको सोमजाड़ो।” 17मुसा क सेसरो न मुसा सी कोयो, “जो काम तु कोरे छे, त्यो वारु नी। 18एना सी तु काय, बाखुन तु आरु तारा लोगहन वी तारे पुठी छे छाचीन खाबराय जासे, काहकी यो काम तारे जुगु बेस काठो छे; तु इनाक एखलो नी कोर सोके।3 19हिमी तु म्हार ओवाज समळ ले, हांव तुसेक सोला आपो, आरु परमेश्वर तारे पुठी रोहे! तु इनु लोगहन क लीय परमेश्वरन ओगोळ जाया कोर, आरु हेनकी तोकलीप को परमेश्वर क पास पुगाड़ दीया कोर। 20तु हेनको परमेश्वर क कायदा आरु नियम सिकाड़जो आरु जो इनको कोरनो छे आरु काहने वाटे पोर चालनो छे बताड़ देजो। 21पुन तु आखा इसरारली पाका मानसोक निवाड़ लेजो परमेश्वर क बीक मानतो होय आरु खोरो, गुनाको, नियाव मा फायदा सी छेटो रोहने वाळाक नेवाड़ लेजो। आरु ओसा लोगहन को हजार-हजार, सोव-सोव, पचास-पचास, आरु दस-दस लोगहन क टुळा पोर निवाय न होकदारीया निवाड़ कोर देजो। 22आरु हुये आखा टेम पोर इनु मानसो क नियाव कोरसे; आरु मोटा मोटा झोगड़ा क ते तारे पास ली आया कोरे, आरु नाना झोगड़ा क नियाव आपसा ज कोरीय कोरसे; ती तारो भार होळको होयसे, काहकी इना भार क हुये वी तारे पुठी हुचले। 23कदाम तु यो उपाय कोरे, आरु परमेश्वर तुसेक ओसो हुकुम आपे देये, तव तु एक जागे रोहायसे, आरु ये आखा मानसे आपना जागाम वारु रीते पुगसे।”

24आपसा सेसरा की यी सोलाक मानीन मुसा न हेना आखा बुलोन ओनसारे करीयो। 25मुसा आखा इसराएल लोगहन मा गोथा गुणी लोगहन क नेवाड़ीन हेनको हजार-हजार, सोव-सोव, पचास-पचास, दस-दस लोगहन पोर डाहला बोनायो। 26आरु त्या आखा लोगहन न नियाव कोरने लाग्या; जो झोगड़ो वातड़ो होयतो होय तेनाक मुसा क पास ली आवता हुता, आरु आखा नानला मुकद्दमा क नियाव हुये आपसा कोर्या कोरतला हुता। 27ती मुसा न आपसा सेसरा क वोवाव दिदो, आरु हुये आपसा देशम चाली गुयो।