नीरगमन 11

दसवी पीड़ा: पेहला खुळीयान मोतन

1ओळी योहोवा भगवान मुसा सी कयो, एक आरु पीड़ा हांव फिरोन आरु मिसर देश पर न्हाको, तव‍ त्यो तुम लोगहन को वाँ सी जाने देसे, आरु जव त्यो तुम लोगहन को जाने देय तव तुमु सबन को पाक्‌कोत् निकाळ देसे। 2म्हारी परजान लोगहन को म्हारो यो हुकुम समळाड़ की एक–एक ओदमी आरु एक–एक बाय लोग आपसी साते वाळा सी सोना–चाँदीन गयनो मांग लेय।" 3तव योहोवा भगवान मिसरीयान को आपसी परजान क लोगहन पर दया वाळा बनायो। आरु इना सी त्यो मनुस मुसा मिसर देश मा फिरोनन करमचारीया आरु पंचु लोगहन क नजर सामने घणो मोटो हुतो।1 4ओळते मुसा न फिरोन सी कयो, योहोवा भगवान इनीये रीतीये कय रीयो, की आदीक रातन टेमे हांव मिसर देशन वीच मा सी चालीस। 5तव मिसर देश मा राजगाद्दी पर बठने वाळा फिरोन सी लगाड़ीन चक्की दोळने वाळी पावेरनीन तक पेहल खुळीया याँ तक की पशुन बी पेहलो पयदा मर जासे 6आरु सारा मिसर देश मा घणो मोटो वीखो पड़जासे, या तक की ओको सारको नी ते कदी हुयो आरु नी हुये। 7पुन इसराएलीयान वीरुध्द मा, काय मनुस, काय पशु, कुदा पर बी कुदु कुतरो बी नी भोकसे; जीना सी तुम लोगहन जान जासु की मिसरीया आरु इसराएलीया मा हांव योहोवा नेवाड़ो पाड़ो। 8तव थारा ये सब करमचारीया म्हारे पास आवीन मखे वान्दीन यो कयसे, थारा आखा लोगहन क साथ मा निकळी जा।' तव हांव निकळी जाईस यो कहीन मुसा फिरोन क पास सी घणो कीचवाईन निकळी गीयो। 9योहोवा मुसा सी कय दीयो हुतो, "फिरोन तुमरी वात नी समळे; काहकी म्हारी यी मरजी छे की मिसर देश मा घण सवटी सोहलानी देखाड़ो।" 10मुसा आरु हारुन फिरोनन सामने यी घण सवटी वीनछेळाय सोहलानी देखाड़ीया; पुन योहोवा भगवान फिरोन क मन को आरु वातड़ो कर दीदो, अतरान करीन त्यो इसराएलीयान को उना देश को छुड़ी जाने नी दीदो।