आमोस 4

1ओ सामरी राज्यन मातभोर बायरा1, यी खबर समळो, जे गोरब्या पोर कुहराय कोरु, आरु जीन्दरे जुळ धोन नी होय तेनुक वेला पाड़ु, तुमु आपसा धेणी क हुकुम आपे, मोंद लावीन आपु ने आमु पीजे तोसे! 2परमेश्वर योहोवा आपसु चुखलु कोरीन आन खाईन कोवे, देखु, तुमरे पोर ओसा दाहड़ा आवनेवावा छे, की तुमु काटा वेर, आरु तुमरी ओवलीयाद माछान गोळी वेर हापकी ली जासे। 3तुमरे माईन हर एक भितड़ा न चीराड़ा माईन सुदी निकवी जासु आरु होरमोन बयड़ा मा नाखाय जासु, योहोवान योत् बुल छे।

इसराएल नी सुधरे

4बेतेल मा आवीन गुनु कोरु, आरु गिलगाल आवीन बेसका गुना कोरु; आपसी बादा दाहड़ु उगतात्, आरु आपसो दोसमास होर तीसरे दाहड़े लीन आया कोरु। 5धोन्यावोदोन बादा खोमिर भेसकीन चोड़ावु, आरु आपसी मोरजीन बादान वात कोरीन तेरो पोरचार कोरु; काहाकी ऐ इसराएलीयो, ओसो कोरनो तुमुक वारु लागे, परमेश्वर योहोवान योत् बुल छे। 6हांव ते तुमरा आखा सोहरो काळ मुकल्‌यु, आरु तुमरा आखा जागा मा रुटान कोमी कोरलु छे, ते वी तुमु मारे भेनी फिरीन नी आवे, योहोवान योत् बुल छे। 7जोत्यार काटनीन तीन मोहना रोय गोया, तोत्यार हांव तुमरे जुगु पानी नी पाड़ो: हांव एक सोहोरोम मा पानी पाड़ीस दिसरा सोहरोम नी पाड़ो; एक खेतोम पानी पाड़ीस, आरु दिसरा खेतोम तेरेम नी पाड़ो, चो सुख गोयो। 8मानसे एक नगर गोथा दिसरे नगर जाने लोगुन पानी जुगु मोर्‌या-मोर्‌या फिर्‌या, ती पुन तीस नी भागी: ते वी तुमु मारे भेनी नी फिरु, योहोवान योत् बुल छे। 9हांव तुमुक गोरमी आरु मोहतान कीड़े कोरीन मारलु छे; आरु जोत्यार तुमरी वाड़ी आरु ओन्गुरोन वाड़ी, आरु अंजीर आरु जेतुनोन झाड़ बेसका होय गोया, तोत्यार टिड्या तेनुक खाय गोया; तेवी तुमु मारे भेनी फिरीन नी आया, योहोवान योत् बुल छे 10हांव तुमरे इचमा मिसर देस जोसी माहामारी लागाड़्यु; हांव तुमरा घुल्‌लाक हापकाड़ीन तुमरा जुवान्या काजे तोलवारो वेर माराय देदु; आरु तुमरा पोड़ावान गोंदायनो तुमरेनचा मुकल्यु; ते वी तुमु मारे भेनी फिरीन नी आया, योहोवान योत् बुल छे। 11हांव तुमरे मा गोथु लोकते काजे ओसु उथलाय देदु, जोसु परमेश्वर सोदोम आरु गमोरा काजे उथलाय देदलु, आरु तुमु आगठाम गोथा निकावला लाकड़ा जोसा कोवाया, तेवी तुमु मारे भेनी नी फिरीन आया, योहोवान योत् बुल छे। 12ओतरान कोरीन, ऐ इसराएल, हांव तुसेक ओसुत् कोरीस, आरु एरकरीन हांव तारेम यो काम कोरनेम छे, ए इसराएल, आपसा परमेश्वर ओगोव आवन कोरीन तीयार होय जा! 13देख, बोयड़ाक बोनावने वावु आरु वाहवीक घोड़नेवावु, आरु मानसोन मोनोम वीचार देखाड़नेवावु आरु सान्तो आन्धारो कोरनेवावु आरु जे धोरतीन उचला जागा पोर चालने वावा छे, तेरो नाव सेनाओन परमेश्वर योहोवा छे!