आमोस 3

1ऐ इसराएलीयो, यो बुल समवु जो योहोवा तुमरे वाराम मोतलोब आखा घोरानान वाराम कोवलो छे जेनको हांव मिसर देस गोथु लावलो छे: 2कोवीन आखा घोरानाम गोथा हांव तुमुक ओतरु गिन कोरलु छे, ओतरान कोरता हांव तुमरा आखा पापोन डोन आपीस।

कागळ्यान काम

3“कोदाम दुय मानसोन आमी सामी राजी नी हय; ती काय चे एकठा चाल सोकसे?” 4काय नाहार वीगुर सिकार हात कोरे जंगल मा गांगेरसे? काय जुवान नाहार वीगुर काहिन धोरे आपसा दोरोम डोखारसे? 5काय चील्‌ला वीगुर फांदोन फांदे पोड़से? काय चील्‌ला धोरनीयो वीगुर काहिन फान्‌दे पोड़ला फांद काजे धोरती पोर गोथो आपसी जाव काजे एकठो कोरसे? 6काय काहना सोहरोम मोटला फेपारीया काजे फुकसे ती मानसे थोर-थोर नी कापे? काय योहोवान वीगुर मुकले काहना सोहोरोम काहिन पिड़ा पोड़से? 7इने रीते पोरबु योहोवा आपसा दास कागळीया पोर आपसी सातायली वात उजेन्ती कोरे वीगुर काहिन वी नी कोरे। 8नाहार गांगेरे; कुन नी बीहये? परमेश्वर योहोवा कोयु: कुन ओगवायती वात नी कोरे?

सामरीया न वीनास

9ओसदोदोन मोटला कीला आरु मिसर देसन राजान कीलाम पोरचार कोरीन कोवु: सामरीयान बोयड़ा पोर एकठा होयीन देखु की हेरेम कायत् मोटु हुहड़ु आरु हेन्दरे इचमा कायत् वेला पाड़नेन काम होय रोया छे!

10योहोवान यो बुल छे, जे मानसे आपसा मोटला घोरोम लोड़ाय आरु ठोगीन लावलो धोन एकठा कोरीन मेक रोया, चे सुतरो काम कोरनो जाने नी। 11ओतरान कोरीन परमेश्वर योहोवा ओसु कोवे: देसक घेरोवनेवावु वेरी होयसे, आरु हुयो तारा जुर काजे तुड़से, आरु तारा मोटोला कीलाक लुट ली जासे।

12योहोवा ओसु कोवे: जीने रीते गुवायु नाहारोन मुयोम गोथु दुय पाय एने कानटान एक टुकड़ु छुड़ावे, तोसात् इसराएली मानसे, जे सामरीया मा आथरुनोन एक खुना एने सुवावी गादी पोर बोठ्या कोरे, चे वी छुड़ाय लेसे। 13सेनाओन परमेश्वर, पोरबु योहोवान यो बुल छे, देखु, आरु याकुबोन घोराना वीरुद् मा गोवाय देवु। 141 जीने टेमे हांव इसराएल काजे हेरा गुनान डोन आपीस तेने टेमे हांव बेतेलोन बेदीया काजे वी डोन आपीस, आरु बेदीन सिंगड़ा टुटिन धोरती पोर हिट पोड़से। 15हांव सेव्वान टेमे घोरो काजे आरु तोपोन टेमेन घोरो काजे दुयोक हिट पाड़ीस; हातीन दातो वेर बोनला घोरे वी नास होयसे, आरु मोटला मोटला घोरे वी नास होय जासे।