Skip to content
BibleKenya

Cua Bible Literal Text

Mak 9:23

Verse 23 is marked below, with the whole chapter around it. Read from the start

Kadraq đnooy dii oot: “Dong dik, Thơy đnooy dii oh ay đaneq e muuyq sôôq dro đong dưk đnen laa khơl adro kajưk dik leh hmưq xet varơuq kaxêêt adroyq tuôôy oot 'yo hloq daak dêh ku Kơy Plêêk truh dii taay yaak.” Drơu hngơy atêq, Lôôk Jê-xu xagook Phi-e-rơ, Ja-kơ ji Jăng yôôch jarooy đêh pe dro oot hooy tok muuyq ngok đoot yơơt, ji Kadraq jah rama xăk kangưưr oot. Aau Kadraq vlôh jêêk thier raa xaraar tađnah, ko ploat, pheq đnooy leh muuyq dro thơq goch leq tol dêh araak hnoq ik dơơp ăm ko ik đanưq. Ê-li kung Môi-se jah oot 'yo hloq, ji vaarq kơy nưq đong athêêk dii Lôôk Jê-xu. Tuôôy luh apok, Phi-e-rơ tơơl dii Lôôk Jê-xu: “Ra-bi, dik laa tolh ka haay măn đnen, 'wot hnoq ik panưk pe poop raap, muuyq ka thơy, muuyq ka Môi-se ji muuyq ka Ê-li.” (Vii kơy leh xet kơy duh luh apok đnooy kajoq, vii oot raay varaal yôq.) Yôôch muuyq đum kluk pơl truh klum katuh oot, ji apok xanoh ahna vlôh xing đum kluk: “Neq laa Koot xung xiaq ku Gô. Dayh tameng apok Koot nưq.” Tưng hưng, tuôôy 'yo gah gih, oot paq măn hloq paq e kơyq đêh măn dii oot, đêh vlôh muuyq dro Lôôk Jê-xu.

Tuôôy oot hooy xing tol đoot pôôt, Kadraq dăt oot đaneq oot teliq taboon hlê dii kơyq truh kaluh kajoq oot heq hloq, atoh koq lưp truh kawat Koot Manih xing aduq kaxêêt riirh hlê. Oot jư kinq apok nưq đom khơl oot, tajauq dii mamuuyq 'yo “xing aduq kaxêêt riirh hlê” laa đaleq. Oot koq hlolh dii Kadraq, tơơl đaneq: “Aleq khơl thơy pato ganuun đnooy laa Ê-li pheq truh adroyq?” Yôôch Kadraq đnooy dii oot: “Ê-li jơq laa truh adroyq xôq ralauq hlê tôôy varơuq. Anưq yôôych apok jah valơk truh Koot Manih đaneq Kadraq pheq chiuq 'ngưng varơuq jiq jiêh ji biq 'yo leh ra kajoq laa luleq? Lunư, thơy đnooy dii oh ay đaneq Ê-li heq truh dik yôôch, ji khơl drơy heq dơơp xet toleq varơuq oot trôôch dii kơy, dang đaji apok heq jah valơk truh kơy.”

Tuôôy truh aduq khơl xatyauq măn hlê, oot hloq muuyq bing manih thier karôp rawiit gah oot ji khơl thơy pato ganuun đong tagêh apok dii khơl xatyauq nưq. Hloay juneq, tuôôy heq hloq Kadraq, dêq bing manih tưng hưng, ji atêq tuôôy charơơk truh kung Kadraq oot vôôch hrok Kadraq. Kadraq vôôch khơl xatyauq: “Oh ay đong tagêh dii oot truh varơuq kajoq?” Muuyq dro đom bing karôp tơơl apok Kadraq: “Kuh thơy, gô xagook truh ka thơy dro koot kanau ku gô, biq muuyq garu xi hôp nhôp muut. Long aduq leq ni hnoq ik klooyq hlê koot gô, yôôych ni jăk amik dro ôn pôôt, yôôch ôn vlôh daak kamuh huuy, takik kaneeng, ji găk gauq, gô heq vôôch khơl xatyauq thơy xôq oot druyh vlôh ni, đơu oot leh đu kalh.” Tuôôy nưq, tuôôy tơơl hlê oot đaneq, Kadraq đnooy: “Adrơơk leh tuôq hơq, gô hnoq măn dii êêp dong truh dong leq? Gô hnoq chiuq uunq êêp dong truh dong leq? Dayh xagook oh de truh ka gô.” Oot xagook oh de truh ka Kadraq, ji tuôôy hloq Kadraq, garu xi hloay juneq khienq ôn tok kơn kojưk, yôôch tuôôy gưlh pôôt vari, ôn vik valien, vlôh kamuh huuy. Kadraq vôôch vaq ku ôn: “Heq toleq yưk xing tuôôy varơuq neq xalih vlôh dii ôn?” Kơy tơơl: “Xing tuôôy măn de. Ni kưq 'ngưng qwel ôn, tuôôy yôôych muut ôôlh, tuôôy yôôych pôôt daak, xôq păk kaxêêt ôn, bơh atoh Thơy hnoq ik dơơp kajoq, vii biit angơuq 'wot, xiin thơy waak 'wot.” Tuôôy nưq, Lôôk Jê-xu đnooy dii kơy: “‘Atoh thơy hnoq ik’ ư? Tôôy varơuq laa hnoq ik đôôyq dii adro tuôq.” Hloay juneq, atêq tuôôy alo tok, vaq ku ôn tơơl: “Gô tuôq! Xiin thơy wơơt rơy tuôôy be tuôq ku gô!” Yôôch tuôôy hloq bing karôp đong charơơk truh aduq oot, Lôôk Jê-xu toah garu xi, patăk ka ni: “Garu xi hôp ji klơk hơq, gô patăk dăt ka may pheq vlôh klơlh oh de ji paq ik nhôp muut ni đnoyq.” Atêq tuôôy laa kôt ji dơơp ka oh de kojưk rađiik miik, ni huch vlôh klơlh ji oh de vlôh jêêk dang đaji adro kaxêêt, pheq đnooy 'ngưng dro đnooy đaneq: “Oh de kaxêêt yôôch.” Bơh tuôôy rôp xok ti ôn, Lôôk Jê-xu rôôk ôn kah, ji ôn dưk tok. Atêq tuôôy Kadraq heq hooy muut hnhư yôôch, khơl xatyauq Kadraq vôôch đêh Kadraq đaneq: “Aleq 'wot leh ik druyh vlôh ik kamuuych nưq?” Kadraq tơơl kung oot: “Kaluh kamuuych neq, be kơyq hnoq ik druyh ik atoh leh vii varơuq apôôy ji varơuq deek xa.”

Ji xing aduq nưq chuh hooy, oot dalơh hlê dêh Ga-li-lê, đơu Kadraq leh trôôch xôq kơyq xet, vii Kadraq đong pato dayq khơl xatyauq kadraq, ji đnooy kung oot đaneq: “Koot Manih jeq biq nôôp muut ti khơl kadrơy, oot hnoq păk kaxêêt Kadraq. Tuôôy heq biq păk kaxêêt, Kadraq hnoq riirh hlê atêq pe hngơy.” Bơh oot leh hlolh apok neq, ji yôq pheq vôôch Kadraq.

Oot hooy truh theng Ka-bê-na-um, ji tuôôy heq muut đom hnhư, Kadraq vôôch oot: “Oh ay 'miêh tajauq athêêk varơuq kajoq tol trôôk hooy?” Bơh oot hnhep, vii oot heq tagêh apok dii mamuuyq tol trôôk hooy 'yo kơyq laa kôt dik. Ji atêq tuôôy 'ngôôy pôôt, Kadraq taayh kưl vaarq dro jah rơơlh anguk hlê ji đnooy dii oot: “Atoh kơyq xung dơơp akoq, adro nưq pheq laa adro lôôch đom dêq hloay ji laa xapok ka tôôy dro.” Rơơlh xok muuyq oh de, Kadraq xôq beq de măn katul oot, yôôch atêq tuôôy khwuôt oh de tol ti, Kadraq đnooy dii oot: “Adro leq taayh yal thơy tiip muuyq đom khơl oh de đaji luneq yôôych dro nưq tiip thơy, ji long kơyq tiip thơy yôôych dro nưq leh vơ tiip thơy, đơu măn tiip Kơy patăk dăt thơy.” Jăng đnooy dii Kadraq: “Kuh thơy, 'wot heq hloq muuyq dro nưq taayh yal Thơy druyh kamuuych ji 'wot heq klơl dro nưq hlê, vii dro nưq leh tyauq haay.” Bơh Lôôk Jê-xu tơơl: “Te klơl adro nưq, vii leh e kơyq laa adro taayh yal thơy dơơp pheep akêh yôôch hnoq ik ka atêq nưq karoay axaap thơy. Bơyh kơyq leh aalq laa tachơơl dii haay nưq laa muuyq trôôk dii haay. Vii adro leq taayh yal thơy ăm oh ay muuyq cheet daak vii oh ay thuôk xuq Lôôk Wơơt Dêh, dong dik thơy đnooy dii oh ay đaneq adro nưq kajưk dik leh hlơơp phon kadrool ni. Măn dro leq dơơp xatôôlh lôp ka muuyq đom khơl dro de neq laa khơl dro tuôq gamưh aduq thơy, yôôych be tơơl iaq đôôyq dii dro nưq, varơuq tolh iaq laa ni biq vek muuyq apal phơu kôt rawiit ranong ni, yôôch biq qweek pôôt tahli. Atoh pla ti oh ay hnoq ik dơơp ka oh ay xatôôlh lôp, dayh dool ni ka'lăk. Varơuq tolh iaq ka oh ay laa dii jiq tâk đơu muut aduq varơuq riirh, măn iaq laa e vaarq pla ti đơu pheq hooy muut ôôlh karuk, đom ôôlh be hmưq poch (duq xadrôk oot leh kaxêêt, ji ôôlh leh biq apoch). Atoh pla jôôk oh ay hnoq ik dơơp ka oh ay xatôôlh lôp, dayh dool ni ka'lăk. Varơuq tolh iaq ka oh ay laa dii jôôk atul đơu muut đom aduq varơuq riirh, măn iaq laa e vaarq jôôk đơu biq qweek muut ôôlh karuk (aduq xadrôk oot leh kaxêêt, ji ôôlh leh biq apoch). Atoh mot oh ay hnoq ik dơơp ka oh ay xatôôlh lôp, dayh galek ni vlôh. Varơuq tolh iaq ka oh ay laa dii muuyq mot đơu muut đom daak plêêk ku Kơy Plêêk, măn iaq laa e vaarq mot đơu biq qweek muut ôôlh karuk, aduq xadrôk oot leh kaxêêt ji ôôlh leh biq apoch. Vii tôôy adro hnoq biq ưm voh bơơn ôôlh. Voh laa tolh kaxay, bơh atoh voh wih vlôh hlơơp phaak, oh ay hnoq panhưưm muut ni dii bôôt nhưưm kajoq? Oh ay pheq e voh đom xăk, ji riirh tagu dii mamuuyq.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.