Skip to content
BibleKenya

Cua Bible Literal Text

Mak 8

Đom kaluh hngơy nưq, laay e muuyq bing manih thier karôp, ji be e kajoq xôq xa, atêq tuôôy taayh khơl xatyauq kadraq, Kadraq đnooy dii oot: “Thơy biit angơuq bing manih karôp neq, vii oot kưq măn dii thơy heq pe hngơy yôôch đơu koq lưp e kajoq xôq xa dêq. Atoh thơy patăk ka oot hooy xuq hnhư oot dii klaak pangoot, yôôych oot hnoq phoch langoch tol trôôk, đơu muuyq sôôq adro đom oot heq truh xing aduq thier xangưưy.” Khơl xatyauq Kadraq tơơl kung kadraq đaneq: “Adro leq aduq neq, măn aduq wăngq vleng neq, hnoq ik xok xing leq đơu ăm bing karôp đaji neq xa tôôp hưh?” Kadraq vôôch oot: “Oh ay e toleq tôôp?” Oot tơơl: “Pơh poop.” Kadraq patăk ka manih karôp 'ngôôy pôôt vari, ji atêq tuôôy xok pơh poop tôôp, kuh kway, Kadraq pleh vlôh yôôch palo ka khơl xatyauq kadraq xôq oot hnoq ik xagook waak dơơp, anưq laa oot adoot vlôh ka manih karôp. Ji oot e toleq poop kaa de, lunưq atêq tuôôy kuh kway truh oot, Kadraq dăt oot kung ahlook phon kaa neq đnoyq. Manih karôp xa ji jah phiq phơh, yôôch oot anguk jah pơh đêêk tôôp tapleh măn rah. Tuôôy nưq, e lakah poot ravơu manih, yôôch Kadraq ăm oot xuq. Hloay juneq, atêq tuôôy muut đom ge kung khơl xatyauq kadraq, Kadraq hooy truh dêh Đa-ma-nu-tha.

Khơl adro Pha-ri-si truh đnư ji xarôp tagêh tajauq dii Kadraq, vôôch axek aduq Kadraq, muuyq dơuq akêh xing plêêk, xôq thưh Kadraq. Atêq tuôôy khơơh yơơt đom xuum klaak kadraq, Kadraq tơơl: “Vii aleq adrơơk neq vôôch axek dơuq akêh? Dong dik, Gô đnooy dii êêp kơy, be e dơuq akêh leq hnoq jah kahniq ka adrơơk neq … ” Yôôch tuôôy heq chuh ka'lăk oot, muut hlê đom ge, Kadraq hooy hlê gah piik hơq.

Khơl xatyauq tawol xagook tyauq tôôp, ji oot be e kajoq dii oot đom ge, đêh vlôh muuyq poop tôôp. Kadraq đnooy adroyq ka oot đaneq: “Dayh rơơt rol! Dayh văch 'yo truh tape ku manih Pha-ri-si ji tape ku Hê-rôt.” Oot tajauq kung mamuuyq đaneq varơuq neq laa vii oot leh e tôôp. Vii xet đanưq, Lôôk Jê-xu đnooy dii oot: “Aleq oh ay laay tajauq tayaat vii varơuq oh ay leh e tôôp? Oh ay koq lưp xet ik, ji kung koq lưp hlolh ih? E jơq xuum oh ay heq vlôh găk khăk yôôch? E mot đơu oh ay leh hloq aleq? E tôôr đơu oh ay leh tameng aleq? Oh ay kung be văch aleq? Tuôôy thơy pleh dăp poop tôôp ka dăp ravơu manih, oh ay heq anguk jah toleq đêêk atar viik tôôp tapleh?” Oot tơơl kung Kadraq: “Kưl vaarq đêêk atar.” “Măn tuôôy pơh poop tôôp ka poot ravơu manih, oh ay anguk jah toleq đêêk atar viik tôôp tapleh?” Oot tơơl dii kadraq: “Pơh đêêk atar.” Ji Kadraq đnooy ka oot: “Dơơp luleq đơu oh ay măn koq hlolh?”

Oot hooy truh Bêt-sai-đa, ji khơl kadrơy xagook truh ka Kadraq muuyq adro apul, yôôch oot apôôy vôôch Kadraq xôq Kadraq hnoq ik vêq muut ay nưq. Rôp ti dro apul, Kadraq jarooy ay nưq vlôh pi gôk palơy. Atêq tuôôy kaxôh daak dieu tol mot ay, xôq ti kadraq tol ay, Kadraq vôôch ay: “Ay e hloq dêq hloay thưq kajoq be?” 'Ngơơk 'yo tok, ay tơơl: “Gô hloq khơl kadrơy đơu oot 'yo dang kaluh ưk gay đong hooy.” Atêq nưq, muuyq yưk tra, Kadraq xôq ti tol mot ay, yôôch ay nưq 'yo anhinq, mot jah yơh hlê ji ay 'yo hloq tôôy thưq kach ro raang. Kadraq dăt ay hooy xuq hnhư ni, pato dăt: “Te duh muut đom palơy.”

Lôôk Jê-xu kung khơl xatyauq kadraq hooy muut kaluh palơy pla thuôk Sê-sa-rê Phi-lip, ji tol trôôk hooy, Kadraq vôôch khơl xatyauq kadraq đnooy dii oot đaneq: “Khơl kadrơy đnooy thơy laa kơyq?” Yôôch oot đnooy dii Kadraq, tơơl đaneq: “Jăng Bap-tit, sôôq kadrơy laa ‘Ê-li,’ măn sôôq đêh đnoyq laa: ‘Muuyq đom khơl hnhư hlit.’” Kadraq vôôch oot: “Măn oh ay đnooy thơy laa kơyq?” Yôôch tuôôy tơơl apok, Phi-e-rơ tơơl kung Kadraq: “Thơy laa Lôôk Wơơt Dêh.” Kadraq đnooy adroyq ka oot đaneq oot leh duh đnooy dii kơyq truh Kadraq.

Ji Kadraq xarôp pato oot đaneq Koot Manih pheq chiuq 'ngưng varơuq jiq jiêh, biq ka'lăk vlôh bơyh khơl draq lơơk, khơl thơy tơơk tưp kôt kung khơl thơy pato ganuun, ji biq păk kaxêêt, yôôch riirh hlê atêq pe hngơy. Kadraq heq đnooy apok neq kach ro raang. Phi-e-rơ, atêq tuôôy jarooy Kadraq đêh vlôh, xarôp trek kưq Kadraq. Bơh, tuôôy heq wih hlê 'yo khơl xatyauq kadraq, Kadraq toah Phi-e-rơ đaneq: “Sa-tan hơq, dayh chuh vlôh pi têq gô! Vii ay leh xôq xuum ay biit truh varơuq ku Kơy Plêêk, đơu vơ truh varơuq koot manih.” Atêq tuôôy taayh bing karôp kung khơl xatyauq kadraq, Kadraq đnooy dii oot: “Atoh kơyq trôôch tyauq atêq gô, dro nưq pheq chôôyq ka'lăk xăk xamơk, hlôôy gay charăk ni ji tyauq gô. Vii long kơyq trôôch wơơt xăk riirh ni, yôôych hnoq dơơp hlơơp ni, măn dro leq vii kơq gô ji Hêêl Kaxay hnoq chiuq hlơơp xăk riirh ni, yôôych hnoq wơơt jah ni. Vii ich lơơy kajoq ka adro jah dêq dêh araak đơu laay hlơơp phool hiel ni? Dro nưq hnoq ik xok kajoq đaji tuôông tađôôy hlê dii phool hiel ni? Atoh kơyq kamưưl truh gô ji apok ku gô đom adrơơk apuq atrăp ji kadrôôp maroh neq, yôôych Koot Manih kung hnoq kamưưl truh adro nưq tuôôy Kadraq truh đom tađnah tađnaak ku Vaq Kadraq kung dii khơl kơy yaak vah.”

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.