Jăng 9

1Yôôch đong tuôôy hooy trôôk, Kadraq hloq muuyq dro apul xing tuôôy đơơu pa iir. 2Khơl xatyauq Kadraq vôôch Kadraq đaneq: “Ra-bi, kơyq heq lôp kadrôôp, ay nưq long miq vaq ay nưq, xôq yôôch ay đơơu pa iir vlôh heq apul?” 3Lôôk Jê-xu tơơl hlê: “Leh aalq ay nưq lôp kadrôôp, kung leh aalq miq vaq ay nưq, bơh nưq laa xôq varơuq dơơp ku Kơy Plêêk jah kahnoq vlôh aduq ay nưq. 4Neq laa varơuq kơn duh ka haay xôq dơơp varơuq dơơp ku Kơy patăk dăt thơy đom tuôôy măn ka hngơy. Klôôy jeq truh laa tuôôy be kơyq hnoq ik dơơp varơuq ik. 5Đom tuôôy thơy măn đom dêh araak, thơy laa xaraar tađnah ku dêh araak.” 6Atêq tuôôy đnooy toleq apok nưq, Kadraq kaxôh pôôt vari, ji dii daak dieu, Kadraq anhơơu jêêk wưk, yôôch para ka ay nưq wưk nưq tol mot ku ay. 7Kadraq đnooy dii ay: “Dayh hooy, 'nhaau aduq hlôôk daak Si-lô-ê” (ni iq laa “Jah Patăk Hooy”). Vii anưq, ay hooy ji 'nhaau mot, yôôch tađnah mot hlê. 8Atêq nưq, khơl adro đom palơy ji khơl manih 'yo hloq ay nưq droyq neq, xing tuôôy ay laa muuyq dro vôôch xa, oot đnooy: “Be aalq neq laa adro ragơy 'ngôôy vôôch xa ih?” 9Muuyq sôôq đnooy đaneq: “Nưq laa ay nưq.” Sôôq kadrơy yôôych đnooy: “Leh aalq 'leq, lunư, dro nưq yôôych dang ay nưq.” Ay yôôych kưq đnooy đaneq: “Jơq laa gô.” 10Lunưq, oot đnooy dii ay: “Dơơp đaleq mot ay tađnah ik?” 11Ay nưq tơơl hlê: “Manih jah taayh laa Jê-xu heq anhơơu wưk ji para mot gô, yôôch dăt gô đaneq: ‘Dayh hooy truh Si-lô-ê ji 'nhaau.’ Lunưq, atêq tuôôy hooy ji 'nhaau, gô 'yo hloq ik.” 12Oot đnooy dii ay: “Adro nưq măn 'leq?” Ay nưq tơơl: “Gô leh xet.”

13Oot jarooy ay nưq, adro adroyq neq biq apul, truh aduq khơl manih Pha-ri-si. 14(Tuôôy nưq laa hngơy Sa-bat, Lôôk Jê-xu heq anhơơu wưk ji luh mot ku ay nưq muut ka hngơy nưq.) 15Atêq nưq, khơl manih Pha-ri-si laay kung vôôch ay dơơp aleq đơu ay ik tađnah mot. Yôôch ay nưq đnooy dii oot: “Kơy nưq para wưk tol mot gô, ji gô hooy 'nhaau yôôych hloq ik.” 16Atêq nưq, toleq dro đom sôôq khơl manih Pha-ri-si đnooy: “Adro neq leh thuôk xuq Kơy Plêêk, vii ni leh tameng jư hngơy Sa-bat.” Sôôq kadrơy yôôych đnooy: “Dơơp aleq muuyq dro, laa adro e kadrôôp, hnoq ik dưk dơơp kaluh dơuq akêh đanưq?” Ji yôôch e varơuq aklah vlôh đom khơl oot. 17Lunưq oot vôôch ay apul yưk tra: “Ay đnooy kajoq truh kơy nưq, xing tuôôy kơy nưq heq luh mot ay?” Yôôch anưq, ay đnooy đaneq: “Kơy nưq laa muuyq kơy hlit.” 18Vii anưq, Manih Jo Thaiq leh tuôq varơuq truh ay đaneq ay nưq heq hmưq apul đơu 'yo hloq ik, miet truh tuôôy oot dăt taayh miq vaq ku ay nưq, laa adro heq yơh hlê klong mot. 19Oot vôôch miq vaq ay đaneq: “E jơq neq laa koot ku mo kơy, adro đơu mo kơy đnooy laa đơu jah pa iir heq apul? Anưq yôôch, dơơp luleq juneq ay nưq hloq ik?” 20Anưq laa miq vaq ku ay tơơl hlê ji oot đnooy: “'Wot 'yo xet đaneq neq laa koot kanau 'wot, ji đaneq ni jah pa iir vlôh heq apul. 21Bơh juneq, dơơp đaleq ni 'yo hloq ik, 'wot leh xet, long kơyq heq luh mot ku ni, 'wot leh xet. Dayh vôôch ni; ni heq kôt yôôch. Ni hnoq kadih đnooy ka ni.” 22Miq vaq ay đnooy toleq apok đanưq vii oot yôq manih Jo Thaiq. Bơyh manih Jo Thaiq heq athêêk adroyq yôôch, đaneq atoh adro leq xưng nhonq Kadraq laa Lôôk Wơơt Dêh, yôôych adro nưq biq pađuôôy klơlh hnhư hơu. 23Vii kơq nưq, miq vaq ay heq đnooy đaneq: “Ni heq kôt yôôch, dayh vôôch ni.” 24Lunưq, truh yưk thưq vaarq, oot dăt taayh adro đơu heq hmưq biq apul ji đnooy dii ay: “Dayh tưp tađnah tađnaak ka Kơy Plêêk. Haay xet đaneq dro nưq laa muuyq dro e kadrôôp.” 25Anưq yôôch ay nưq tơơl: “Kơy nưq laa adro e kadrôôp long leh, gô leh xet. Gô xet muuyq varơuq, nưq laa long biq apul, bơh juneq gô 'yo hloq ik.” 26Atêq nưq, oot đnooy dii ay: “Adro nưq heq dơơp kajoq ka ay? Kơy nưq heq luh mot ay đaji luleq?” 27Ay tơơl hlê oot: “Gô heq taboon ka êêp kơy yôôch, đơu êêp kơy leh tameng! Aleq êêp kơy trôôch tameng hlê đnoyq? Be aalq êêp kơy kung trôôch jah dơơp khơl xatyauq ku kơy nưq ih?” 28Ji yôôch oot toah đnooy ay ji đnooy: “Ay đơơu laa khơl xatyauq ku adro nưq, măn 'wot laa khơl xatyauq ku Môi-se. 29'Wot xet đaneq Kơy Plêêk xanoh dii Môi-se, bơh dro neq, 'wot leh xet laa xing leq truh.” 30Adro khơl kanau tơơl hlê ji đnooy dii oot: “Juneq yôôych varơuq neq đơu laa 'yo akêh, đaneq kơy nưq heq luh mot gô đơu êêp kơy leh xet kơy nưq laa xing leq truh. 31Haay xet đaneq Kơy Plêêk leh tameng apok khơl adro kadrôôp maroh, bơh atoh adro leq e xuum kuh kul ji dơơp tyauq iq trôôch Kadraq, yôôych Kadraq tameng apok dro nưq. 32Xing tuôôy hnu, koq hmưq jah tameng varơuq muuyq dro leq luh mot ku adro apul xing tuôôy đơơu pa iir. 33Atoh dro neq leh aalq laa xing Kơy Plêêk, yôôych dro nưq be ik dơơp ik paq kê varơuq kajoq?” 34Oot tơơl hlê ji đnooy ka ay: “Ay xaleep jah pa iir vlôh đom kadrôôp maroh đơu ay đong pato dayq 'wot ih?” Yôôch oot pađuôôy ay nưq vlôh.

35Lôôk Jê-xu tameng đaneq oot heq pađuôôy ay vlôh pi gôk yôôch axek tavơh ay, Kadraq đnooy: “Ay e tuôq aduq Koot Manih be?” 36Ay nưq tơơl apok ji đnooy: “Dro nưq laa kơyq, kuh Kadraq, xôq gô hnoq ik tuôq muut kadraq?” 37Lôôk Jê-xu đnooy dii ay: “Ay kung heq hloq kadraq, ji nưq laa manih đong đnooy dii ay neq.” 38Tuôôy nưq, ay đnooy: “Kuh Lôôk, gô tuôq,” ji ay akuh Kadraq. 39Lôôk Jê-xu đnooy: “Gô heq truh đom dêh araak neq vii varơuq xưh xadrah, xôq ka khơl adro leh hloq hnoq ik hloq ik, ji khơl adro 'yo hloq hnoq vlôh apul.” 40Xing đom bing manih Pha-ri-si đong măn đnư dii Kadraq, oot tameng kaluh apok nưq, yôôych vôôch Kadraq: “Dang aleq 'wot kung biq apul?” 41Lôôk Jê-xu đnooy kung oot: “Atoh êêp kơy biq apul yôôych anưq laa êêp kơy leh e kadrôôp, bơh juneq êêp kơy đnooy đaneq: ‘'Wot hloq ik.’ Lunưq, kadrôôp ku êêp kơy măn ja kađnư.”