Jăng 8

1Tuôôy nưq, Lôôk Jê-xu hooy tok đoot Ô-liu. 2Bơh muut tuôôy xaroq meel, Kadraq laay hooy truh hnhư hơu, ji tôôy dro garuk truh dii Kadraq. 3Tuôôy nưq, khơl thơy pato ganuun ji khơl manih Pha-ri-si jarooy truh muuyq khơl drê biq rôp jah đom varơuq dơơp tuut taak, yôôch oot xôq ay măn katul. 4Vii thưh Kadraq, khơl thơy tơơk tưp đnooy dii Kadraq xôq oot e apok rôp xadrah tachơơl hlê Kadraq: “Thơy lơơy, dro khơl drê neq biq rôp jah đôôyq dii varơuq dơơp lôp kadrôôp tuut taak. 5Mot kadrơy, đom ganuun, Môi-se heq pato pheq tiip ji phơu khơl adro đanưq, măn juneq, thơy đnooy aleq?” 6Bơh atêq tuôôy kuu pôôt, Lôôk Jê-xu valơk tol vari bơơn lôk ti kadraq. 7Đom tuôôy nưq, oot kưq ratuut đnooy vlôh vôôch 'yo, Kadraq 'ngơơk tok ji dăt oot: “Kơyq đom êêp kơy leh e lôp kadrôôp, dayh xok phơu tiip muut ay neq adroyq dik.” 8Yôôch kuu pôôt, Kadraq laay valơk tol vari dii lôk ti kadraq. 9Bơh yôôch, tưng dro muuyq đom khơl manih Jo Thaiq nưq chuh hooy, xarôp dii khơl adro kôt tuuyh dik, pheq đnooy dêq hloay oot raay luuy vlôh, ji vơ muuyq dro Kadraq măn hlê, kung dii dro khơl drê đong măn katul. 10Anưq yôôch, atêq tuôôy 'ngơơk tok, Lôôk Jê-xu đnooy dii dro khơl drê nưq: “Bing oot măn 'leq? Leh kơyq rôp kadrôôp ay ih?” 11Ji ay tơơl: “Leh kơyq dêq, kuh Lôôk.” Yôôch Lôôk Jê-xu đnooy: “Gô kung leh rôp kadrôôp ay. Ay dayh hooy, xing neng paq lôp kadrôôp đnoyq.”]

12Atêq nưq, Lôôk Jê-xu laay đnooy dii oot đaneq: “Gô laa xaraar tađnah ku dêh araak, dro leq tyauq gô kajưk dik hnoq leh tawaak hooy đom kamơng jaluk, bơh e xaraar tađnah ku varơuq riirh.” 13Atêq nưq, toleq dro Pha-ri-si đnooy dii Kadraq: “Thơy dơơp xanưk truh kadih thơy yôôych apok xanưk ku thơy laa leh đangq tuôq.” 14Lôôk Jê-xu tơơl hlê ji Kadraq đnooy kung oot: “Long ju gô dơơp xanưk truh kadih gô, yôôych apok xanưk ku gô laa đangq tuôq. Vii gô xet gô xing leq truh ji gô xung hooy ka'leq, măn êêp kơy be xet gô truh xing leq long gô xung hooy ka'leq. 15Êêp kơy đnooy xadrah tyauq xăk xamơk; Gô leh đnooy xadrah kơyq dêq. 16Bơh hloay ka atoh đaji gô đnooy xadrah, yôôych varơuq đnooy xadrah ku gô laa hyioh jăk vii gô leh măn muuyq dro, đơu gô kung dii Vaq, laa Kơy patăk dăt gô. 17Mot kadrơy, đom ganuun ku êêp kơy e valơk đaneq apok xanưk ku vaarq dro yôôych đangq tuôq. 18Gô laa manih dơơp xanưk truh kadih gô, ji Vaq, laa Kơy patăk dăt gô, dơơp xanưk truh gô.” 19Lunưq, oot đnooy dii Kadraq: “Vaq ku thơy măn 'leq?” Lôôk Jê-xu tơơl apok: “Êêp kơy leh xet gô, kung leh xet Vaq gô; atoh êêp kơy heq xet gô, yôôych heq laa êêp kơy kung xet Vaq gô.” 20Kadraq đnooy kaluh apok neq aduq xôq jêêt tơơk tưp, đong tuôôy pato dayq đom hnhư hơu, bơh leh kơyq rôp jư Kadraq vii wat ku Kadraq koq lưp truh.

21Atêq nưq, Kadraq laay đnooy dii oot: “Gô vlôh hooy, ji êêp kơy hnoq axek gô, yôôch êêp kơy hnoq kaxêêt đom kadrôôp maroh êêp. Aduq gô hooy, êêp kơy leh ik truh ik.” 22Anưq laa manih Jo Thaiq đnooy: “Dang aleq dro neq hnoq hnek ranong, vii kơy nưq đnooy: ‘Aduq gô hooy êêp kơy leh ik truh ik’?” 23Ji Kadraq đnooy dii oot: “Êêp kơy pa iir vlôh xing pi 'laarq, gô pa iir vlôh xing ataalh. Êêp kơy laa manih ku dêh araak neq, gô leh aalq manih dêh araak neq. 24Kơq nưq, gô đnooy dii êêp kơy đaneq êêp kơy hnoq kaxêêt đom kadrôôp maroh êêp. Vii atoh êêp kơy leh tuôq đaneq gô dik đanưq, yôôych êêp kơy hnoq kaxêêt đom kadrôôp maroh êêp.” 25Vii anưq, oot đnooy dii Kadraq: “Thơy laa kơyq?” Lôôk Jê-xu đnooy ka oot: “Varơuq kajoq đơu gô pheq đnooy heq đnooy dii êêp kơy xing tuôôy xarôp? 26Gô e 'ngưng varơuq xôq đnooy ji xôq xưh xadrah truh êêp kơy. Long anưq, Kơy patăk dăt gô laa dong dik; vơ hloay kaluh kajoq gô tameng aduq Kadraq yôôych gô đnooy kaluh varơuq nưq ka dêh araak.” 27Oot leh hlolh đaneq Kadraq đong đnooy truh Vaq ka oot. 28Yôôch anưq, Lôôk Jê-xu đnooy dii oot: “Tuôôy êêp kơy kađnok Koot Manih tok, yôôych tuôôy nưq êêp kơy hnoq xet đaneq gô dik đanưq, ji Gô be kadih gô dơơp varơuq kajoq. Wih hlê, gô đnooy kaluh varơuq neq tyauq đaji Vaq heq pato gô. 29Kơy patăk dăt gô măn kung dii gô; Kadraq leh ka'lăk gô muuyq dro, vii gô hloay dơơp varơuq kaxay xuum Kadraq.” 30Đom tuôôy Kadraq đong pato kaluh apok nưq, 'ngưng dro xôq xuum tuôq aduq Kadraq.

31Yôôch Lôôk Jê-xu đnooy dii khơl manih Jo Thaiq heq tuôq Kadraq: “Atoh êêp kơy kưq măn đom apok ku gô, yôôych êêp kơy dik laa khơl xatyauq ku gô; 32êêp kơy hnoq xet varơuq dik, ji varơuq dik hnoq luh vlôh êêp kơy.” 33Oot tơơl hlê kung Kadraq: “'Wot laa koot xau Ap-ra-ham ji koq hmưq dơơp xapok ka kơyq dêq; aleq thơy đnooy đaneq: ‘Êêp kơy hnoq jah rayơh rayơơy’?” 34Lôôk Jê-xu tơơl hlê oot: “Dong dik, dong dik, gô đnooy dii êêp kơy, đaneq dro leq lôp kadrôôp yôôych laa dơơp xapok ka kadrôôp. 35Mot kadrơy, dơơp xapok leh kưq măn miet đom hnhư, Koot yôôych kưq măn hloay hloay. 36Vii anưq, atoh Koot luh vlôh êêp kơy, yôôych êêp kơy hnoq dong dik jah rayơh rayơơy. 37Gô xet đaneq êêp kơy laa koot xau Ap-ra-ham, bơh êêp kơy axek trôôk păk kaxêêt gô vii apok gô be e aduq đom êêp kơy. 38Gô đnooy kaluh varơuq gô heq hloq aduq Vaq; măn êêp kơy yôôych dơơp kaluh varơuq êêp kơy tameng aduq vaq êêp.” 39Oot tơơl hlê ji đnooy dii Kadraq: “Vaq ku 'wot laa Ap-ra-ham.” Lôôk Jê-xu đnooy dii oot: “Atoh kajoq êêp kơy laa koot xau ku Ap-ra-ham, yôôych êêp kơy heq dơơp kaluh varơuq dơơp ku Ap-ra-ham. 40Bơh juneq, êêp kơy axek kach păk kaxêêt gô, muuyq dro đơu heq đnooy ka êêp kơy varơuq dik, laa varơuq gô tameng xing Kơy Plêêk. Ap-ra-ham heq be dơơp varơuq đanưq. 41Êêp kơy dơơp kaluh varơuq ku vaq êêp.” Lunưq, oot đnooy dii Kadraq: “'Wot jah pa iir vlôh be aalq xing varơuq apuq atrăp; 'wot e muuyq Vaq, laa Kơy Plêêk.” 42Lôôk Jê-xu đnooy ka oot: “Atoh kajoq Kơy Plêêk laa Vaq ku êêp kơy, yôôch heq đol laa êêp kơy heq xung xiaq gô, vii gô truh xing Kơy Plêêk, ji e mot kađnen; bơyh gô leh kadih truh, bơh jơq Kadraq heq patăk dăt gô. 43Vii aleq đơu êêp kơy leh hlolh đơơt đnooy athêêk neq ku gô? Nưq laa vii êêp kơy leh e paraat tameng kaluh apok ku gô. 44Êêp kơy thuôk xuq vaq êêp, nưq laa kamuuych, ji êêp kơy e xuum dơơp tyauq kaluh hmưch trôôch ku vaq êêp. Xing kapa tep ni laa adro păk kaxêêt manih ji be hmưq dưk kajưk đom varơuq dik, vii be e varơuq dik đom ni. Tuôôy ni đnooy apok pa ôôh lar, yôôych ni đnooy xing xuum klaak ku ni vii ni laa adro đnooy pa ôôh ji laa vaq ku varơuq đnooy pa ôôh. 45Bơh vii gô đnooy dik, lunưq êêp kơy leh tuôq gô. 46Kơyq đom êêp kơy tauq vlôh ik gô e kadrôôp? Atoh gô đnooy dong dik, vii aleq êêp kơy leh tuôq gô? 47Dro leq thuôk xuq Kơy Plêêk yôôych tameng apok ku Kơy Plêêk; vii kơq nưq êêp kơy leh tameng bơyh vii êêp kơy leh thuôk xuq Kơy Plêêk.” 48Manih Jo Thaiq tơơl hlê ji đnooy dii Kadraq: “'Wot be đnooy troq ih, đaneq kơy laa manih Sa-ma-ri ji biq kamuuych nhôp?” 49Lôôk Jê-xu tơơl hlê: “Gô leh biq kamuuych nhôp; wiit hlê, gô kul vado Vaq gô, măn êêp kơy yôôych đnooy ra ơơh ka gô. 50Mot kadrơy, gô leh axek akhiim tađnah tađnaak ku gô; e muuyq Kơy axek akhiim ji xưh xadrah. 51Dong dik, dong dik, gô đnooy dii êêp kơy, atoh dro leq tameng jư apok gô, yôôych dro nưq kajưk dik hnoq leh hloq varơuq kaxêêt truh đơơy đơơy.” 52Manih Jo Thaiq đnooy dii Kadraq: “Juneq 'wot 'yo nhonq đaneq kơy biq kamuuych nhôp. Ap-ra-ham ji khơl hnhư hlit heq kaxêêt, đơu kơy yôôych đnooy: ‘Atoh dro leq tameng jư apok gô, adro nưq kajưk dik hnoq leh jah xet varơuq kaxêêt truh đơơy đơơy.’ 53Dang aleq kơy yôôych kôt lơyq iaq mo kơy Ap-ra-ham ku 'wot, laa muuyq dro heq kaxêêt ih? Khơl hnhư hlit kung heq kaxêêt. Kơy kadih 'yo kơy laa?” 54Lôôk Jê-xu tơơl hlê: “Atoh gô kadih ayuôôt laat gô, yôôych tađnah tađnaak ku gô be laa kajoq; Vaq gô laa Kơy ayuôôt laat gô, đơu êêp kơy taayh Kơy nưq đaneq Kadraq laa Kơy Plêêk ku êêp. 55Êêp kơy 'miêh be xet Kadraq, bơh gô xet Kadraq. Ji atoh gô đnooy đaneq: ‘Gô leh xet Kadraq,’ yôôych gô laa dro đnooy pa ôôh dang đaji êêp kơy. Lunư, gô xet Kadraq ji tameng jư apok Kadraq. 56Ap-ra-ham, mo kơy êêp kơy hlah hlaak xôq hnoq ik 'yo hloq hngơy ku gô, kơy heq hloq ji hlah hlaak.” 57Nưq laa manih Jo Thaiq đnooy dii Kadraq: “Kơy koq lưp jah dăp kưl tuuyh, đơu kơy heq hloq Ap-ra-ham ih?” 58Lôôk Jê-xu đnooy dii oot: “Dong dik, dong dik, gô đnooy dii êêp kơy, adroyq tuôôy e mot Ap-ra-ham, gô Hloay E.” 59Kơq nưq, oot tôôch phơu xôq tiip muut Kadraq, bơh Lôôk Jê-xu kadook mot ji hooy vlôh klơlh hnhư hơu.