Skip to content
BibleKenya

Cua Bible Literal Text

Jăng 2

Muut hngơy thưq pe, muuyq waal pajêêk dơơp vlôh aduq Ka-na, dêh Ga-li-lê, miq ku Lôôk Jê-xu măn aduq nưq. Lôôk Jê-xu ji khơl xatyauq Kadraq kung jah mơơy truh waal pajêêk. Tuôôy lok kateh dêq, miq ku Lôôk Jê-xu đnooy dii Kadraq: “Oot paq măn e lok.” Ji Lôôk Jê-xu đnooy dii mo: “Nee mo, varơuq nưq e apiq kajoq truh koot ji miq? Wat ku koot koq truh.” Miq ku Kadraq đnooy dii khơl xapok: “Dayh dơơp tyauq paq kê varơuq kajoq đơu ay nưq patăk êêp ay.” Măn đnư e drơu poop xaroot bơơn phơu jah xôq đêh ka varơuq 'nhau xarêh ku manih Jo Thaiq, tôôy poop tađnưk jah đom kơh vaarq truh pe hlưk daak. Lôôk Jê-xu dăt oot: “Dayh kliik viik daak muut kaluh xaroot nưq.” Yôôch oot kliik viik xaroot dong truh 'ngưh. Kadraq đnooy dii oot: “Juneq dayh muk vlôh ji taway truh ka adro kôôch waal.” Anưq laa, oot taway hooy. Bơh tuôôy adro dưk 'yo waal liaah thưq daak heq jah vlôh jêêk lok (đơu kơy be xet ni e xing leq, măn khơl xapok — laa khơl adro heq muk daak nưq — yôôych xet), adro dưk 'yo waal taayh ok truh ji đnooy dii ay: “Tôôy dro 'ngưng adoot lok lăp adroyq, ji tuôôy manih hooy heq hôôch vuul, yôôych adoot lok leh mach baak iaq. Măn ay yôôych jư lok lăp truh hloay juneq.” Neq laa dơuq akêh adroyq dik Lôôk Jê-xu heq dơơp aduq Ka-na, dêh Ga-li-lê, Kadraq kahnoq vlôh tađnah tađnaak ku Kadraq, ji khơl xatyauq Kadraq heq tuôq aduq Kadraq. Atêq varơuq nưq, Lôôk Jê-xu, miq Kadraq ji khơl ma oh kanau, kung khơl xatyauq Kadraq hooy aloh truh theng Ka-bê-na-um, bơh oot măn đnư leh 'ngưng hngơy.

Lêh Dalơh Hlê ku manih Jo Thaiq heq jeq truh, yôôych Lôôk Jê-xu hooy tok truh Jê-ru-sa-lem. Kadraq hloq đom hnhư hơu khơl adro tek bo, trưưu ji xêêp katrơu, kung khơl tađôôy jêêt đong 'ngôôy kađnư. Atêq tuôôy voot muuyq poop rooy bơơn talơy, Kadraq pađuôôy dêq bing oot vlôh klơlh hnhư hơu, kung dii trưưu ji bo. Kadraq kung qweek pachaay jêêt ku khơl tađôôy jêêt ji taluq kahlôôp para ku oot. Kadraq đnooy dii khơl adro tek xêêp katrơu: “Dayh xagook kaluh thưq nưq vlôh klơlh đnen. Te dơơp hnhư Vaq ku gô jêêk aduq tabôôt tek.” Khơl xatyauq Kadraq văch hlê apok heq valơk, đaneq: “Xuum talăng jăk ka hnhư Lôôk hnoq vuh huur koot.” Vii kơq nưq, manih Jo Thaiq heq tơơl hlê ji đnooy dii Kadraq: “Kơy kahnoq ka 'wot hloq dơuq akêh kajoq tuôôy kơy dơơp kaluh varơuq neq?” Lôôk Jê-xu tơơl hlê, Kadraq đnooy dii oot: “Dayh pahyaak ka'lăk hnhư hơu neq, yôôch đom pe hngơy gô hnoq panưk ni hlê.” Anưq laa, manih Jo Thaiq đnooy: “Hnhư hơu neq jah dơơp đom poot kưl drơu xanưm, đơu kơy hnoq panưk ni hlê đom pe hngơy?” Lunư, hnhư đơu Kadraq đong đnooy truh đnooy truh hnhư hơu ku xăk xamơk Kadraq. Vii anưq, tuôôy Kadraq heq xing aduq kaxêêt riirh hlê, khơl xatyauq ku Kadraq văch hlê đaneq Kadraq heq đnooy đanưq, yôôych oot tuôq Rahlăp Vah ji apok đơu Lôôk Jê-xu heq đnooy.

Mot kadrơy, đom tuôôy Kadraq măn aduq Jê-ru-sa-lem muut katuôôy Lêh Dalơh Hlê, đom tuôôy lêh, 'ngưng dro tuôq aduq yal Kadraq tuôôy hloq kaluh dơuq akêh đơu Kadraq heq dơơp. Bơh anưq, kadih Lôôk Jê-xu leh deng xuum tuôq kơy ka oot, vii Kadraq xet dêq hloay tôôy dro, nưq laa Kadraq be e kơn duh pheq đnooy kơyq nưq pheq dơơp xanưk ka khơl kadrơy, vii Kadraq kadih xet varơuq kajoq măn đom tôôy dro.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.