Hê-bơ-rơ 2

1Vii kơq nưq, varơuq neq băt haay pheq văch 'yo kơn iaq đnoyq truh kaluh kajoq heq hmưq jah tameng, tebe xăk xamơk đôôk klơlh kaluh nưq. 2Vii atoh apok Lôôk heq jah padoh taboon gamưh khơl yaak plêêk heq jêêk vlôh varơuq kajưk dik, ji tôôy lôp kadrôôp kung varơuq leh tameng heq nhonq xok hmơt dook taxưngq, 3yôôych dơơp aleq haay hnoq xaloot ik tuôôy heq 'yo leh ra kajoq varơuq wơơt xok kôt đanưq? Đơu varơuq wơơt xok nưq, atêq tuôôy xarôp gamưh Lôôk jah pahêêr đnooy adroyq dik, yôôych jah 'yo nhonq ka haay xing khơl dro heq tameng; 4vii Kơy Plêêk kung anguk achung dơơp xanưk dii oot bơơn kaluh hlêêl akêh, pheep akêh, ji 'ngưng varơuq taay yaak đêh mamuuyq, kung varơuq kahniq ăm ku Lôôk Phool Hiel tyauq xuum trôôch Kadraq.

5Vii be aalq deng ka khơl yaak plêêk đơu Kơy Plêêk rôp băt dêh araak jeq truh, laa dêh araak đơu haay đong đnooy truh. 6Mot kadrơy, e manih heq dơơp xanưk măn ka'leq nưq, đaneq:

“Koot manih laa kajoq, đơu Kadraq tabông truh ni,

long koot ku koot manih laa kajoq, đơu Kadraq 'yo jư ni?

7Kadraq khienq manih 'laarq iaq taso dii khơl yaak plêêk đom muuyq kawat lêq;

Kadraq ayil đoat tađnah ka manih đom varơuq tađnah tađnaak ji jah vado.1

8Kadraq xôq tôôy paroh 'laarq jôôk manih.”

Vii đom tuôôy rôp băt tôôy paroh, Kadraq xôq be muuyq paroh kajoq leh tameng tyauq manih. Bơh juneq haay măn kalưp hloq tôôy paroh tameng tyauq manih, 9bơh haay hloq Lôôk Jê-xu, laa Kơy jah khienq ăm 'laarq iaq khơl yaak plêêk đom muuyq kawat lêq, heq jah ayil đoat tađnah đom varơuq tađnah tađnaak ji jah vado vii kơq varơuq pơơl hwơơl aduq varơuq kaxêêt ku Kadraq, xôq bơyh vanong plêêk Kơy Plêêk, Kadraq hnoq ik chiuq kaxêêt thay ka tôôy dro. 10Vii Kơy Plêêk, Kơy đơu vii Kadraq tôôy paroh heq e ji gamưh Kadraq tôôy paroh heq e, xôq jarooy 'ngưng koot truh varơuq tađnah tađnaak, yôôych heq dưk dơơp kach thier jơq tuôôy khienq Kơy Dơơp Akoq varơuq wơơt xok ku oot vlôh xaleep gamưh varơuq pơơl hwơơl. 11Vii kaah Kơy vah xarêh kung dêq hloay khơl dro jah vah xarêh vlôh xing muuyq gooy. Vii kơq neq, Kadraq leh kamưưl xôq taayh oot laa oh ay, 12tuôôy xanoh:

“Koot hnoq đnooy vlôh yal Kadraq ka khơl oh ay ku Koot;

Koot hnoq kacheeu ayuôôt Kadraq măn katul manih karôp.”

13Ji muuyq yưk tra:

“Gô hnoq tuôq gamưh aduq Kơy Plêêk.”

Yôôch laay đnoyq:

“'Yo nee, gô ji khơl koot de đơu Kơy Plêêk heq kahniq ka gô.”

14Anưq yôôch, vii khơl koot de e phon đom vahaap hlek, lunưq Kadraq kung e phon đom kung kaluh varơuq nưq dang đanưq xôq gamưh varơuq kaxêêt kadraq, Kadraq hnoq ik păk kaxêêt adro adrơk qwuyen varơuq kaxêêt, 'ngưq laa kamuuych, 15ji hnoq ik wơơt xaloot khơl dro nưq, 'ngưq laa paq kê kơyq riirh dêq hloay vii kamo yôq varơuq kaxêêt, laa varơuq dơơp xapok tuôôt đơơy. 16Vii dong dik, leh aalq kadraq 'yo jư khơl yaak plêêk, wih hlê Kadraq jư 'yo adrơơk ku Ap-ra-ham, 17kơq nưq Kadraq duh pheq jah khienq jêêk dang oh ay kadraq đom tôôy panưh, xôq Kadraq hnoq ik jêêk vlôh thơy tơơk tưp kôt ragơy biit angơuq ji jư apok đôôyq dii kaluh varơuq wih xuq Kơy Plêêk dii iq đinq kahnoq vlôh vanong plêêk tol kadrôôp maroh ku tamooy Kadraq. 18Atêq tuôôy chiuq adô aluut, Kadraq hnoq ik wơơt waak khơl leq biq adô aluut, vii jơq Kadraq heq hmưq tavơh tuôôt varơuq nưq.