Hê-bơ-rơ 1

1Đom 'ngưng kawat ji bơơn 'ngưng kach xing tuôôy hnu, atêq tuôôy Kơy Plêêk xanoh dii khơl mo kơy bơyh khơl hnhư hlit, 2yôôych muut kaluh hngơy lôôch dik neq, Kadraq heq xanoh dii haay bơyh Koot Kadraq, laa Kơy đơu Kadraq heq lâp dơơp Dro Dưk Katôôl tôôy paroh, kung gamưh hlê Koot nưq, Kadraq heq panưk jêêk kaluh đơơy xanưm; 3đơu Koot nưq laa varơuq tađnah xaraar tađnah tađnaak ji varơuq long lơuq jơq dik truh katik ku Kadraq, katuôôy tơơk đơ tôôy paroh xing apok taay yaak ku Kadraq, yôôch tuôôy heq dưk dơơp varơuq paxa rêh kadrôôp maroh, Koot nưq 'ngôôy pi akoh Kơy Ra uk Ra aal tol aduq yơơt; 4jo jah jêêk vlôh yơơt galơh iaq khơl yaak plêêk, Koot heq jah nhonq yal kơn kôt dalơh gôp 'ngưng yưk iaq khơl yaak plêêk nưq. 5Vii Kadraq e hmưq xanoh dii kơy leq đom khơl kơy yaak đaneq:

“Koot laa Koot ku Gô.

Hngơy neng Gô heq pahleh Koot”?

Laay kung xanoh:

“Gô hnoq laa Vaq đôôyq dii Kadraq,

ji Kadraq hnoq laa Koot deng ka Gô”?

6Bơh măn iaq đnoyq, tuôôy Kadraq taway Koot Muuyq muut dêh araak, Kadraq xanoh: “Dêq hloay khơl yaak plêêk ku Kơy Plêêk pheq ayuôôt laat Koot nưq.” 7Đôôyq dii khơl yaak plêêk, Kadraq xanoh:

“Kơy khienq khơl kơy yaak kadraq jêêk đaji khiel,

ji khơl xapok Kadraq jêêk kaluh gooy ôôlh.”

8Măn đôôyq dii Koot nưq, yôôych:

“Kuh Kơy Plêêk, ngaai Kadraq măn truh đơơy đơơy miet miet,

ji gay katôôl hyioh jăk laa gay katôôl ku daak plêêk Kadraq.

9Kadraq xiaq varơuq hyioh jăk ji 'yarơ varơuq xơk tauq.

Vii kơq nưq, Kơy Plêêk, 'ngưq laa Kơy Plêêk ku Kadraq, heq para ka Kadraq

jơu hlah hlaak galơh iaq khơl 'wơyq Kadraq.”

10Ji “Kuh Lôôk, tuôôy kapa tep, Kadraq panưk kahnier play vari,

ji kaluh tal plêêk laa kaluh varơuq dơơp ku ti Kadraq.

11Kaluh nưq hnoq hư hlơơp, bơh Kadraq hloay măn,

dêq hloay kaluh nưq hnoq duut moor đaji poop aau yơơt,

12ji đaji poop aau kahliik, Kadraq hnoq ahnom kaluh nưq hlê,

đaji aau gôk, kaluh nưq hnoq biq leh vlôh,

bơh Kadraq yôôych măn i ja,

ji kaluh xanưm ku Kadraq hnoq leh hmưq dêq.”

13Nưq bơh, Kadraq e hmưq đnooy dii kơy leq đom khơl kơy yaak:

“Dayh 'ngôôy pi akoh Gô

dong truh tuôôy leq Gô khienq khơl adro tachơơl ku Koot jêêk đool đơ ka jôôk Koot”?

14Be aalq dêq hloay khơl kơy nưq laa kaluh yaak hơu varơuq, jah patăk ka varơuq 'yo jư vii lơơy ich ku khơl dro jeq nhonq varơuq wơơt xok long aleq?