Ga-la-ti 1

1Phao-lô, muuyq dro jah rơơlh — leh truh xing koot manih, kung leh xing muuyq dro leq, bơh xing Lôôk Wơơt Dêh Jê-xu ji xing Kơy Plêêk, laa Vaq, Kơy heq khienq Kadraq riirh hlê xing aduq kaxêêt — 2kung dêq hloay khơl oh ay măn dii gô, atăq kaluh tayuup vah aduq Ga-la-ti: 3Apôôy vanong plêêk truh tol oh ay kung dii varơuq hrok hrol xing Kơy Plêêk, laa Vaq, ji Lôôk haay, laa Lôôk Wơơt Dêh Jê-xu, 4Kơy heq pahnăp xăk vii kadrôôp maroh haay, xôq Kadraq hnoq ik wơơt haay klơlh đơơy xanưm xơk aak juneq, tyauq xuum trôôch ku Kơy Plêêk, Vaq haay. 5Apôôy tađnah tađnaak thuôk xuq Kadraq dong truh đơơy đơơy miet miet. Amen.

6Gô dik akêh tuôôy oh ay thier dayh wih klơlh Kơy heq tawooyh taayh oh ay xing vanong plêêk ku Lôôk Wơơt Dêh xôq tyauq muuyq hêêl kaxay kadrơy, 7đơu Hêêl Kaxay yôôych be e đêh 'leq, vơ laa bơyh taleq dro hơq laa khơl adro dơơp xalôônq xalaaoq oh ay ji xung đnooy bơyq Hêêl Kaxay ku Lôôk Wơơt Dêh. 8Bơh long ju hloay kaah 'wot, long muuyq yaak plêêk xing plêêk, đnooy vlôh ka oh ay muuyq hêêl kaxay đêh dii Hêêl Kaxay đơu 'wot heq đnooy vlôh ka oh ay, yôôych adro nưq pheq biq karoay axaap. 9Đaji 'wot heq hmưq đnooy adroyq hơq, ji juneq gô đnooy yưk tra: “Atoh kơyq nưq đnooy vlôh ka oh ay muuyq hêêl kaxay đêh dii Hêêl Kaxay đơu oh ay heq tameng xok, yôôych adro nưq pheq biq karoay axaap.” 10Vii juneq, gô đong dơơp hlah xuum koot manih long laa Kơy Plêêk? Long e aalq gô axek trôôk dơơp hlah xuum khơl kadrơy? Atoh gô măn đong dơơp hlah xuum khơl kadrơy, yôôych kajưk dik gô leh aalq laa xapok ku Lôôk Wơơt Dêh.

11Wơơy oh ay, gô xiin kahnoq ka oh ay xet truh Hêêl Kaxay heq jah gô đnooy vlôh, đaneq Hêêl Kaxay nưq be aalq laa gamưh tyauq muuyq dro leq. 12Vii gô heq leh nhonq xok Hêêl Kaxay nưq xing muuyq dro leq, gô kung leh jah pato dayq, bơh nưq laa xing varơuq kahnoq vlôh ku Lôôk Wơơt Dêh Jê-xu. 13Vii oh ay heq tameng truh kach riirh tuôôy adroyq ku gô đom Jo Thaiq jaauq, nưq laa gô hmưq rôp toop thier ra ơơh tayuup vah ku Kơy Plêêk, ji kưq axek trôôk xôq păk kaxêêt tayuup nưq. 14Ji gô hok hlolh xet đom Jo Thaiq jaauq galơh iaq 'ngưng dro kung xanưm raa đom khơl tamooy gô, tuôôy jêêk vlôh thier talăng jăk truh kaluh varơuq hnu hmeq ku mo kơy gô. 15Bơh tuôôy Kơy Plêêk, Kơy heq rơơlh đêh gô xing đom klaak miq gô, ji heq tawooyh taayh gô xing vanong plêêk Kadraq, hlah xuum 16kahnoq vlôh Koot Kadraq đom gô, xôq gô hnoq ik padoh taboon truh Koot nưq đom katul kaluh tamooy daak kadrơy, yôôych hloay jơnưq gô be tajauq dii hlek ji vahaap, 17gô kung leh hooy tok truh Jê-ru-sa-lem xôq tavơh khơl manih heq dơơp khơl jah rơơlh adroyq gô. Tađôôy muut đnư, gô heq hooy truh A-ra-bi, yôôch laay wiit xuq aduq Đa-mach.

18Yôôch, atêq pe xanưm, gô hooy tok truh Jê-ru-sa-lem xôq dơơp qween dii Sê-pha ji măn hlê kung kơy nưq kưl dăp hngơy. 19Bơh gô heq leh tavơh muuyq dro leq kadrơy đom khơl jah rơơlh, đêh vlôh Ja-kơ, dro ma oh kanau ku Lôôk. 20Truh kaluh varơuq gô valơk ka oh ay, dayh 'yo đnen neq, kangưưr Kơy Plêêk, gô leh đnooy pa ôôh. 21Atêq nưq, gô hooy truh kaluh dêh ku Si-ri ji Si-li-si. 22Tuôôy nưq, gô măn koq lưp jah kaluh tayuup vah đom Lôôk Wơơt Dêh aduq Ju-đê xet mot. 23Bơh khơl tuôq 'miêh vơ tameng đaneq: “Adro adroyq hơq rôp toop haay juneq đong đnooy vlôh xuum tuôq đơu dro nưq hmưq axek trôôk păk kaxêêt,” 24Lunưq oot vanê ayuôôt Kơy Plêêk vii kơq gô.