Ê-phê-sô 6:10

1Dro dơơp koot, dayh tameng apok miq vaq ku êêp koot đom Lôôk, vii nưq laa varơuq 'yo jơq. 2“Dayh dêq xuum xung miq vaq ku koot” (nưq laa ganeen adroyq dik ji xatyauq apok tavek), 3“xôq vanong kaxay truh dii koot ji koot hnoq ik jah riirh xiik tol vari.” 4Dro dơơp vaq, te tache jaraq koot xau haay. Tađôôy muut đnư, dayh văch xiap oot đom varơuq 'meq dook ji jarooy pato ku Lôôk.

5Dro dơơp xapok, dayh tameng tyauq dro kôôch tyauq phon xăk xamơk dii varơuq 'yo kul ji vadrau yôq aduq xuum dong dik ku haay, dang đaji đôôyq dii Lôôk Wơơt Dêh, 6leh aalq dii kiêuh hơu varơuq tuôôy kôôch dưk 'yo đaji khơl adro trôôch xok xuum, bơh đaji xapok ku Lôôk Wơơt Dêh, dưk dơơp iq trôôch ku Kơy Plêêk bơơn dêq xuum phool, 7tameng tyauq dii xuum hlah hlaak, đaji hơu varơuq ka Lôôk đơu leh aalq ka khơl kadrơy, 8vii xet đaneq tôôy dro, ju xapok long rayơh rayơơy, atoh dơơp varơuq kaxay leq, yôôych dro nưq hnoq nhonq varơuq dang anưq xing aduq Lôôk.

9Ji, adro dơơp kôôch, pheq xa dơơp kung kach nưq dii khơl xapok, tuôôy padơy varơuq kata naap, vii xet đaneq Kôôch Hnhư vơơ ku oot vơơ ku oh ay đong măn tol plêêk, ji leh e varơuq bing kơyq aduq Kadraq.

10Atêq dik, dayh jah dơơp ăm kalh paraat đom Lôôk, ji đom paraat kalh taay yaak ku Kadraq. 11Dayh hlưp muut dêq hloay aau jaap ku Kơy Plêêk, xôq dơơp ka oh ay hnoq ik dưk kajưk, tachơơl hlê kaluh xôq vih ku kamuuych. 12Vii đơơt tahmơt ku haay leh aalq laa tachơơl dii vahaap ji xăk xamơk, bơh laa tachơơl hlê khơl adro xakaq, tachơơl hlê kaluh hnhư adrơk qwuyen da uh, tachơơl hlê khơl băk dưk xanok dêh araak kamơng jaluk neq, tachơơl hlê kaluh garu xi măn kaluh aduq tol plêêk. 13Vii kơq nưq, dayh hlưp muut dêq hloay aau jaap ku Kơy Plêêk, xôq oh ay hnoq ik tachơơl hlê đom hngơy xơk aak, ji dưk kajưk atêq tuôôy payôôch tôôy varơuq. 14Lunưq, dayh dưk kajưk, tuôôy hnek talơy katêêk ku oh ay bơơn varơuq dik, hlưp xok aau jaap ku varơuq hyioh jăk, 15troaq muut jôôk varơuq ralauq adroyq ku Hêêl Kaxay hrok hrol, 16tơơk tok tômq khêêl ku xuum tuôq đom tôôy varơuq, vii nưq đơu oh ay hnoq ik kajôp poch tôôy nook ôôlh ku adro xơk. 17Dayh yil đoat jaap wơơt xok ji xieh Kơy Phool Hiel, đơu nưq laa apok ku Kơy Plêêk, 18tuôôy apôôy tôôy kawah đom Kơy Phool Hiel gamưh hlê tôôy apok apôôy vôôch ji ratuut vôôch, ji wih truh raak play đom tuôôy kah parol bơơn dêq hloay varơuq atuq xuum ji varơuq apôôy thay deng ka dêq hloay khơl vah, 19ji deng ka gô, xôq apok Kơy Plêêk hnoq ik kahniq ka gô, đom varơuq luh huuy ku gô dii varơuq kôk xuum xôq đnooy vlôh varơuq kadook ku Hêêl Kaxay 20(vii Hêêl Kaxay nưq đơu gô vlôh jêêk adro xatyauq katul đom looy tooy), xôq ka đom tuôôy nưq, gô hnoq ik kalh xuum padoh taboon tyauq đaji varơuq gô pheq đnooy.

21Bơh xôq oh ay kung hnoq ik xet kaluh varơuq apiq truh gô, gô đong dơơp kajoq, yôôych Ti-chi-kơ, dro oh ay xung xiaq ji xapok muuyq xuum đom Lôôk, hnoq ăm oh ay xet tôôy varơuq, 22ay nưq laa adro đơu gô heq patăk truh dii oh ay vii iq đinq neq, xôq oh ay hnoq ik xet đaleq truh 'wot ji xuum oh ay jah ahmưk nhăk.

23Apôôy varơuq hrok hrol kahniq ka oh ay, kung dii xung xiaq ji xuum tuôq xing Kơy Plêêk, laa Vaq ji Lôôk, laa Lôôk Wơơt Dêh Jê-xu. 24Apôôy vanong plêêk măn kung dêq hloay khơl adro xung xiaq Lôôk Wơơt Dêh Jê-xu, Lôôk haay, bơơn xung xiaq be hư hlơơp.