Phi-lip 1

1Phao-lô ji Ti-mô-thê, xapok ku Lôôk Wơơt Dêh Jê-xu, atăq ka dêq hloay khơl vah đom Lôôk Wơơt Dêh Jê-xu, laa khơl manih tuôq măn aduq theng Phi-lip, kung dii khơl muk sư ji khơl châp sưq. 2Apôôy vanong plêêk ji varơuq hrok hrol xing Kơy Plêêk, laa Vaq ji Lôôk haay, laa Lôôk Wơơt Dêh Jê-xu, măn tol oh ay.

3Gô kuh kway Kơy Plêêk ku gô đom tôôy varơuq văch truh oh ay, 4đom tôôy apok apôôy ku gô ka dêq hloay oh ay, hloay tơơk tưp apok apôôy dii xuum hlah hlaak 5vii kơq varơuq jưq phon ku oh ay đom Hêêl Kaxay xing hngơy kapa tep dong truh juneq; 6vii tuôq kajưk truh jơq varơuq neq, đaneq Kơy heq xarôp dơơp varơuq kaxay đom oh ay hnoq dơơp xaleep dong truh hngơy ku Lôôk Wơơt Dêh Jê-xu; 7đôôyq dii gô, dik laa varơuq jơq dik xôq biit đanưq truh dêq hloay oh ay, vii gô jư oh ay đom xuum gô, dêq hloay oh ay raay laa khơl kung dơơp varơuq dii gô bơyh vanong plêêk, kaah đom talơy looy tooy ku gô, hloay đom varơuq đnooy tagêh ji dơơp xanưk ka Hêêl Kaxay. 8Vii Kơy Plêêk laa Kơy dơơp xanưk ku gô, đaleq gô thier trôôch dêq hloay oh ay bơơn xuum klaak xung xiaq ku Lôôk Wơơt Dêh Jê-xu. 9Ji varơuq gô apôôy nưq laa xuum xung xiaq ku oh ay viik galaay raah jôh, kưq athêêp atok 'ngưng iaq đom hok xet kung tôôy varơuq hlolh xet, 10xôq oh ay hnoq ik xet varơuq leq laa tolh nhưk, xôq ka oh ay jah xarêh xaraat ji leh aduq đnooy ik dong truh hngơy ku Lôôk Wơơt Dêh, 11jah viik galaay raak play ku varơuq hyioh jăk gamưh Lôôk Wơơt Dêh Jê-xu, wih truh varơuq tađnah tađnaak ji varơuq ayuôôt laat Kơy Plêêk.

12Wơơy oh ay, gô xung oh ay xet đaneq kaluh kajoq xalih truh dii gô dong dik heq xalih vlôh vii varơuq athêêp tok ku Hêêl Kaxay. 13Pheq đnooy, talơy looy tooy ku gô đom Lôôk Wơơt Dêh heq jêêk vlôh ro raang măn đom katul dêq hloay bing kuun jư 'yo hnhư padrok kung tôôy khơl kadrơy, 14ji phon 'ngưng oh ay, gamưh talơy looy tooy ku gô, heq kajưk tuôq aduq Lôôk, kang dêq xuum xôq padoh taboon đaauq Lôôk kach leh kamo yôq. 15Long pheq đnooy muuyq sôôq adro padoh taboon Lôôk Wơơt Dêh vii 'yarơ ji tayaat, bơh kung e manih padoh taboon dii xuum kaxay, 16laa khơl adro vii xuum xung xiaq, xet đaneq gô jah đinq xôq đnooy bing Hêêl Kaxay, 17bơh khơl adro vii xuum hmưch trôôch kamuk, oot padoh taboon Lôôk Wơơt Dêh kach leh dong dik, biit athêêp tok pơơl hwơơl muut đom talơy looy tooy ku gô. 18Nưq yôôych aleq? Long laa vii kach leq — long laa dơơp bô long laa hyioh dik — yôôych Lôôk Wơơt Dêh jah padoh taboon, ji gô hlah hlaak truh varơuq nưq. Panưh kadrơy, gô kung hnoq jah dơơp ka hlah hlaak, 19vii gô xet đaneq varơuq neq hnoq taway varơuq wơơt xok truh ka gô, gamưh varơuq apôôy ku oh ay ji varơuq waak xing Kơy Phool Hiel ku Lôôk Wơơt Dêh Jê-xu, 20tyauq đaji varơuq hlah hlaak takôô ji xuum takôô gamưh ku gô, nưq laa gô hnoq leh biq dơơp dong kamưưl đom dêq hloay varơuq kajoq, bơh kôk kalh đom tôôy varơuq, xôq tuôôy neq kung đaji pa kê tuôôy leq, Lôôk Wơơt Dêh hnoq jah vanê atok aduq xăk xamơk gô, ju laa riirh long kaxêêt. 21Vii đôôyq dii gô, riirh laa Lôôk Wơơt Dêh, ji kaxêêt laa varơuq ich lơơy. 22Bơh atoh măn riirh đom xăk xamơk, yôôych đôôyq dii gô nưq laa varơuq vlôh play ich lơơy ka varơuq dơơp, vii anưq gô leh xet gô hnoq rơơlh panưh leq. 23Gô biq ahnen katul vaarq panưh, tuôôy e xuum trôôch xôq vlôh hooy ji măn dii Lôôk Wơơt Dêh, vii nưq laa varơuq kaxay iaq thier 'ngưng, 24bơh kưq măn hlê đom xăk xamơk laa varơuq duh iaq ka oh ay. 25Tuôôy heq tuôq kajưk varơuq nưq, gô xet đaneq gô hnoq măn hlê ji măn hlê đnoyq dii dêq hloay oh ay, vii varơuq kôt tok ji varơuq hlah đom xuum tuôq ku oh ay, 26xôq varơuq pa ưưt ku oh ay đom Lôôk Wơơt Dêh Jê-xu truh gô hnoq 'ngưng iaq gamưh varơuq gô truh tavơh oh ay yưk tra. 27Vơ e varơuq oh ay pheq riirh kach taxưngq dii Hêêl Kaxay ku Lôôk Wơơt Dêh, xôq long tuôôy gô truh ji 'yo oh ay long tuôôy wăngq mot, yôôych gô hnoq ik tameng truh oh ay đaneq oh ay dưk kajưk đom muuyq danưng kooy, dii muuyq xuum biit kung tahmơt vii xuum tuôq ku Hêêl Kaxay, 28ji leh biq khơl adro tachơơl hlê dơơp ka varaal yôq đom paq kê varơuq kajoq. Neq laa hlêêl dơuq truh varơuq hư hlơơp deng ka oot, bơh laa hlêêl dơuq truh varơuq wơơt xok ku oh ay — ji varơuq neq xing Kơy Plêêk. 29Vii gamưh Lôôk Wơơt Dêh, vanong heq jah kahniq ka oh ay leh vơ xôq tuôq aduq Kadraq, bơh kung xôq chiuq pơơl vii Kadraq, 30Tuôôy e kung varơuq tahmơt đơu oh ay heq hloq aduq gô, ji juneq đong tameng aduq gô.