Cua Bible Literal Text
Kông-vuq 8
Tuôôy nưq, Sau-lơ 'miêh trôôch varơuq păk kaxêêt Ê-tiên.
Anưq yôôch, đom hngơy nưq, muuyq đơơt rôp toop kôt heq xalih vlôh tachơơl dii Tayuup Vah aduq Jê-ru-sa-lem, măn dêq hloay khơl tuôq pachaay hyaak loch dêh Ju-đê ji Sa-ma-ri, leh jauq khơl jah rơơlh. Khơl adro tuôq kuh heq up xôq Ê-tiên ji e varơuq nhim angơuq thier kôt deng ka kơy. Bơh, Sau-lơ dơơp ra ơơh kôt ka Tayuup Vah. Tuôôy kưq kahluh muut tưng hnhư, ahoot kaah khơl kanau hloay khơl kadrê vlôh, kơy rôp oot muut karuk.
Long anưq, khơl adro biq pachaay hyaak heq hooy loch aduq padoh vlôh Hêêl Kaxay truh apok Lôôk. Tuôôy nưq, Phi-lip hooy aloh truh theng Sa-ma-ri, kơy đnooy vlôh Lôôk Wơơt Dêh ka oot. Tuôôy nưq, manih karôp muuyq xuum tabông truh muut kaluh kajoq jah Phi-lip padoh, đom tuôôy tameng kaluh apok nưq ji hloq kaluh pheep akêh đơu kơy dưk dơơp. Vii 'ngưng dro đom sôôq oot biq kaluh garu xi nhôp, ni heq vlôh klơlh atêq tuôôy pariau kôt apok tok. Măn 'ngưng dro biq talêêt ji tâk yôôych heq jah payơh. Tuôôy nưq, e varơuq hlah hlaak thier kôt đom theng nưq.
Bơh muuyq dro khơl kanau nưq, anơng laa Si-môn, adroyq neq heq hmưq dơơp thơy pajơơu đom theng ji dơơp tưng hưng manih Sa-ma-ri, kadih xưng ni laa khơl kôt lơyq, manih đơu dêq hloay oot, xing de truh kôt, raay tabông tameng tyauq vii đnooy đaneq: “Kơy neq laa taay yaak ku Kơy Plêêk, laa varơuq jah taayh laa Kôt Lơyq.” Tuôôy nưq, khơl drơy tameng tyauq kơy, vii đom muuyq kawat yơơt, kơy heq khienq oot tưng hưng bơơn kaluh varơuq pajơơu. Bơh tuôôy oot tuôq Phi-lip, vii jah padoh đnooy hêêl kaxay truh daak Kơy Plêêk ji yal ku Lôôk Wơơt Dêh Jê-xu, yôôych oot chiuq Bap-tem, dêq khơl kanau hloay khơl kadrê. Yôôch kadih Si-môn kung tuôq, tuôôy heq chiuq Bap-tem, kơy kưq athêêp đnoyq măn dii Phi-lip. Kung hloay, tuôôy jah hloq kaluh hlêêl akêh ji kaluh varơuq taay yaak kôt lơyq xalih vlôh, kơy thier tưng hưng.
Tuôôy nưq, atêq tuôôy tameng đaneq tamooy dêh Sa-ma-ri heq tuôq nhonq đaauq ku Kơy Plêêk, khơl jah rơơlh aduq Jê-ru-sa-lem dăt Phi-e-rơ ji Jăng truh dii oot, laa vaarq adro jah rơơlh đơu atêq tuôôy truh aduq, heq xadrook apôôy ka oot, xôq oot hnoq ik nhonq xok Lôôk Phool Hiel. Vii Kadraq 'miêh koq kahri tol muuyq kơyq đom sôôq oot, bơh oot vơ laa heq jah Bap-tem đom yal Lôôk Jê-xu đơu heq. Anưq vaarq dro khơl jah rơơlh xôq ti tol oot, yôôch oot nhonq xok Lôôk Phool Hiel. Tuôôy nưq, tuôôy hloq đaneq Kơy Phool Hiel jah kahniq ăm gamưh varơuq xôq ti ku khơl jah rơơlh, yôôych Si-môn palo jêêt ka oot, wơơy: “Xiin kung ăm gô qwuyen da uh neq xôq atoh kơyq đơu gô xôq ti tol, yôôych adro nưq hnoq ik nhonq jah Lôôk Phool Hiel.” Bơh Phi-e-rơ đnooy dii kơy: “Apôôy ka jêêt ku kơy măn đom varơuq păk kaxêêt dêq kung kơy, vii kơy biit root ik vanong kahniq ku Kơy Plêêk bơơn jêêt! Leh e phon long apiq kajoq đom varơuq neq deng ka kơy, vii xuum kơy be aalq laa hyioh jăk kangưưr Kơy Plêêk. Anưq, dayh wiit xuum truh varơuq xơk neq ku kơy ji xadrook apôôy dii Lôôk, xet 'leq gamưh đnư đơu biit truh ku xuum kơy hnoq jah ka'lăk. Vii gô hloq kơy đong măn đom kamit pahlăk ji looy tooy ku varơuq leh hyioh jăk.” Bơh tơơl hlê, Si-môn tơơl: “Xiin khơl kơy xadrook apôôy dii Lôôk thay ka gô, xôq leh muuyq varơuq leq đom kaluh varơuq đơu êêp kơy vơơ đnooy hnoq ik xalih vlôh ka gô.”
Anưq, atêq tuôôy dơơp xanưk ji padoh apok Lôôk, oot wih hlê ngưưr xuq Jê-ru-sa-lem, kung hloay đnooy vlôh Hêêl Kaxay ka 'ngưng palơy ku manih Sa-ma-ri.
Tuôôy nưq, muuyq yaak plêêk ku Lôôk xanoh dii Phi-lip đaneq: “Dayh dưk tok ji hooy xuq pi naam tol trôôk xing Jê-ru-sa-lem jarooy pôôt truh Ga-xa.” (Nưq laa aduq wăngq we.) Tuôôy heq dưk tok, kơy dưk hooy, ji 'yo hơq, muuyq dro khơl kanau, manih Ê-thi-ô-bi, padrok thaiq jaamq hơu vuua ku Kan-đak, mo vuua Ê-thi-ô-bi, laa dro 'miêh đong jư 'yo dêq hloay kho bauq ku mo, kơy heq truh xôq ayuôôt laat aduq Jê-ru-sa-lem, kung tuôôy nưq, kơy đong wiit xuq, 'ngôôy tol xe ôô ahleh ku kơy ji đok rahlăp hlit Ê-sai. Tuôôy nưq, Kơy Phool Hiel đnooy dii Phi-lip: “Dayh truh jeq ji hlê jeq xe ôô ahleh nưq.” Anưq yôôch, tuôôy heq charơơk truh, Phi-lip tameng adro padrok neq đong đok rahlăp hlit Ê-sai, yôôych kơy đnooy: “Kadraq dong dik hlolh kaluh kajoq kơy đong đok long leh?” Bơh adro padrok đnooy: “Dơơp kach leq đơu gô hnoq ik hlolh ik, atoh muuyq kơyq nưq hnoq pato jarooy ka gô?” Kung tuôôy nưq, kơy mơơy Phi-lip tawaak tok xôq 'ngôôy kung dii kơy. Tuôôy nưq, talok Rahlăp Vah đơu kơy đong đok laa đaneq:
“Kơy biq jarooy hooy đaji trưưu truh loo pưk dơơp ôq,
ji đaji trưưu koot im hnhep kangưưr manih goch hlôôk ni,
lunưq, Kơy be luh huuy kơy.
Đom varơuq dơơp ra ơơh, hyioh jăk ku Kơy biq varoh xok.
Kơyq hnoq taboon hlê ka adrơơk Kơy?
Vii xăk riirh Kơy heq biq xagook klơlh vari.”
Tuôôy đnooy hlê, padrok thaiq jaamq đnooy dii Phi-lip: “Gô xiin ay ăm gô xet, hnhư hlit đong đnooy varơuq neq truh akơyq — truh kadih xăk kơy long truh muuyq kơyq kadrơy?” Anưq laa, luh huuy kơy vlôh ji pa xarôp xing phon Rahlăp Vah neq, Phi-lip đnooy vlôh Hêêl Kaxay truh Lôôk Jê-xu ka adro padrok nưq. Anưq yôôch, tuôôy oot đong hooy tol trôôk, oot hooy truh aduq e daak nưq, yôôych padrok thaiq jaamq dăt: “'Yo hơq, daak! Varơuq kajoq đong klơl hlê gô chiuq bap-tem?” [Tuôôy nưq, Phi-lip đnooy dii kơy: “Atoh kơy tuôq bơơn dêq hloay xuum klaak kơy, yôôych kơy hnoq jah wơơt.” Anưq yôôch tuôôy tơơl apok, dro padrok đnooy: “Gô tuôq muut Lôôk Wơơt Dêh, laa Koot Kơy Plêêk.”] Adro padrok đnooy dăt dưk xe ôô ahleh hlê ji dêq baarq raay hooy pôôt daak, dêq Phi-lip ji padrok thaiq jaamq, yôôch kơy dơơp bap-tem ka dro padrok nưq. Tuôôy nưq, tuôôy oot heq tok klơlh daak, Kơy Phool Hiel ku Lôôk taway Phi-lip hooy, ji padrok thaiq jaamq leh măn 'yo hloq kơy đnoyq, adro padrok hlah hlaak hooy đnoyq tyauq trôôk ni. Măn Phi-lip yôôych jah 'yo hloq aduq A-xôt, ji tuôôy dalơh hlê dêh nưq, kơy padoh taboon Hêêl Kaxay ka dêq hloay kaluh theng, dong truh tuôôy kơy hooy truh Sê-sa-rê.
Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.