Kông-vuq 7

1Tuôôy nưq, thơy tơơk tưp kôt đnooy: “Kaluh varơuq nưq e jơq đanưq long leh?” 2Nưq laa, kơy đnooy vlôh:

“Wơơy oh ay, khơl oh ay ji khơl kơy kadraq lơơk, xiin dayh tameng: Kơy Plêêk tađnah tađnaak heq rama vlôh dii mo kơy Ap-ra-ham ku haay tuôôy kơy măn aduq Mê-sô-bô-ta-mi, adroyq katuôôy kơy măn hlê aduq Cha-ran; 3ji Kadraq xanoh kung kơy đaneq: ‘Dayh vlôh klơlh dêh palơy ku koot, kung đaji klơlh adrơơk rong nooy ku koot, ji koot dayh hooy truh dêh đơu gô hnoq pato ka koot.’ 4Atêq nưq, atêq tuôôy vlôh klơlh dêh ku tamooy Kanh-đê, kơy riirh aduq Cha-ran. Yôôch xing nưq, atêq tuôôy vaq kơy kaxêêt, Kơy Plêêk heq jarooy kơy muut dêh neq, đom aduq đơu oh ay juneq đong riirh. 5Kadraq heq be kahniq ka kơy muuyq hluôôt vari đom dêh, pheq đnooy muuyq aduq tooq pla jôôk kung leh. Nưq đơu Kadraq heq tavek kahniq dêh ka kơy xôq thuôk qwuyen ku kơy, kung ăm koot xau ku kơy xatyauq atêq kơy, long kơy koq e koot. 6Lunư, Kơy Plêêk heq xanoh luneq, đaneq adrơơk kơy hnoq laa dêh tamooy aduq muuyq dêh xangưưy be xet, yôôch khơl drơy hnoq rôp oot dơơp xapok đơu xa dơơp ra ơơh đom poot hreek xanưm. 7Kơy Plêêk xanoh: ‘Ji Gô hnoq xadrah dook vari dêh đơu oot heq pheq tameng xatyauq, yôôch atêq nưq, oot hnoq vlôh hooy ji ayuôôt laat Gô ka aduq neq.’ 8Kadraq kung heq kahniq ăm kơy tavek truh pheep goch kađuh, ji vii anưq, kơy pahleh I-sak ji dơơp pheep goch kađuh ka koot kơy muut hngơy thưq thơơm; I-sak dơơp đanưq ka Ja-kôp, ji Ja-kôp kung dơơp anưq ka kưl vaarq ưk adrơơk. 9Vii khơl ưk adrơơk 'yarơ dii Jô-sep, oot heq tek kơy hlê Ai Kâp; đơu Kơy Plêêk măn kung kơy, 10ji waak wơơt kơy klơlh tôôy varơuq pơơl hwơơl ku kơy, Kadraq kung kahniq vanong ji varơuq khôôt xet ka kơy kangưưr Pha-ra-ôn, vuua Ai Kâp, ji vuua nưq heq lăp kơy jư 'yo tol Ai Kâp kung dêq hnhư kơy. 11Tuôôy nưq, muuyq naanq pangoot xalih truh tol loch dêq dêh Ai Kâp ji Ka-na-an, laa varơuq pơơl dal thier kôt, ji khơl mo kơy ku haay be axek jah tuôông xa. 12Anưq yôôch, atêq tuôôy tameng aduq A Kâp e va away, Ja-kôp patăk khơl mo kơy haay truh đnư đơơt thưq nhưk. 13Ji đom đơơt thưq vaarq, Jô-sep heq kadih kahnoq vlôh kadih xăk ka khơl ay kơy, yôôch kôôch hnhư ku Jô-sep jah Pha-ra-ôn nhonq xet. 14Tuôôy nưq, atêq tuôôy dăt khơl ay xuq, Jô-sep dăt đoonq Ja-kôp, vaq kơy, kung dêq hloay khơl hnhư, dii sôôq manih laa pơh kưl dăp. 15Nưq laa, Ja-kôp hooy pôôt truh Ai Kâp, yôôch kơy kaxêêt, ji khơl mo kơy ku haay kung anưq. 16Oot jah jarooy truh Si-chem ji up đom xanưng đơu Ap-ra-ham heq root dii sôôq jêêt bơơn baak xing khơl koot kanau ku Hê-mô aduq Si-chem. 17Tuôôy nưq, tyauq đaji kawat ku apok tavek đơu Kơy Plêêk heq tavek dii Ap-ra-ham heq truh jeq, yôôych sôôq manih athêêp 'ngưng ji jah karôp 'ngưng aduq Ai Kâp, 18dong truh tuôôy muuyq dro vuua kadrơy dưk xanok Ai Kâp, đơu vuua nưq 'miêh leh xet Jô-sep. 19Vii xôq vih haiq manih tamooy haay, vuua nưq heq dơơp ra ơơh mo kơy haay, dơơp ka khơl oh nga đơơu pa iir ku oot biq avih ka'lăk, leh ik jư ăm riirh. 20Muut tuôôy đơu Môi-se jah pa iir vlôh, kơy kaxay tamaq kangưưr Kơy Plêêk. Kơy jah văch xiap pe xiêk đom hnhư vaq kơy. 21Tuôôy nưq, tuôôy kơy biq vơơ hloq, koot kadrê ku Pha-ra-ôn heq xagook kơy hooy ji văch xiap kơy đaji koot kanau ni. 22Môi-se jah pato dayq đom tôôy varơuq khôôt xet ku manih Ai Kâp, kơy măn e paraat đom apok đnooy ji varơuq dơơp ku kơy. 23Bơh tuôôy kawat poot kưl xanưm heq truh dii kơy, biit vlôh đom xuum kơy iq xung truh hlơq oh ay kơy, nưq laa koot xau I-sơ-ra-ên. 24Tuôôy hloq muuyq dro nưq biq dơơp ra ơơh, kơy heq dưk vlôh bing ji dưk dơơp varơuq bla thu ka adro biq rôp toop tuôôy hmơt kaxêêt manih Ai Kâp hơq, 25kơy măn biit oh ay hlolh đaneq Kơy Plêêk bơyh ti kơy đong taway truh varơuq wơơt ka oot, bơh oot leh hlolh. 26Hngơy atêq, kơy e mot katul oot tuôôy đong takaay tayaat, ji kơy ahmưk nhăk oot wih truh varơuq tagu, đaneq: ‘Nee khơl ay, khơl ay raay laa oh ay. Vii aleq khơl ay tagay jiq xuum mamuuyq?’ 27Bơh adro đong dơơp ra ơơh manih gah gih kơy heq taluq kơy vlôh, đnooy: ‘Kơyq heq lăp kơy dơơp manih dưk xanok ji padrok xadrah tol 'wot? 28Dang aleq laa kơy đong xung păk kaxêêt gô đaji kach đơu kơy heq păk kaxêêt manih Ai Kâp hngơy ahnưh?’ 29Anưq yôôch, Môi-se xadăk klôônq adroyq apok đnooy nưq, ji kơy vlôh jêêk tamooy măn hlê đom dêh Ma-đi-an, aduq đơu kơy pahleh jah vaarq koot kanau. 30Tuôôy poot kưl xanưm heq dalơh hlê, muuyq yaak plêêk rama vlôh dii kơy aduq wăngq we thuôk đoot Si-nai, đom muuyq đum ôôlh aduq pôôp jaliê. 31Tuôôy nưq, tuôôy 'yo hloq anưq, Môi-se xok dơơp akêh truh ka varơuq nưq, yôôch tuôôy kơy truh jeq xôq 'yo dong kih, yôôych e apok ku Lôôk: 32‘Gô laa Kơy Plêêk ku mo kơy koot, Kơy Plêêk ku Ap-ra-ham, ku I-sak ji ku Ja-kôp.’ Tuôôy nưq, vii varơuq yôq varaal ka ung truh, Môi-se leh hôôk 'yo. 33Yôôch Lôôk xanoh dii kơy: ‘Dayh tơq kaxôôp vlôh klơlh jôôk koot, vii aduq đơu koot đong dưk laa vari vah. 34Atêq tuôôy heq 'yo, gô 'yo hloq varơuq pơơl hwơơl ku tamooy Gô aduq Ai Kâp, Gô heq tameng apok tanguh alo ku oot, ji Gô heq pôôt xôq wơơt oot. Juneq, dayh hlê đnen nee, Gô patăk koot truh Ai Kâp.’ 35Môi-se neq, kơy đơu oot heq chôôyq ka'lăk xing tuôôy đnooy: ‘Kơyq heq lăp kơy dơơp manih xakaq 'yo long padrok xadrah?’ — Kơy Plêêk patăk dăt kơy vơơ dơơp kơy xakaq 'yo vơơ dơơp manih wơơt, xing ti ku yaak plêêk heq rama vlôh dii kơy aduq pôôp jaliê. 36Kơy heq jarooy oot vlôh, atêq tuôôy dơơp kaluh pheep akêh ji dơuq akêh aduq dêh Ai Kâp ji aduq Tahli Dôôp, kung đaji đom wăngq we tuôôt poot kưl xanưm. 37Nưq laa Môi-se, kơy heq đnooy dii koot xau I-sơ-ra-ên đaneq: ‘Kơy Plêêk hnoq panưk tok muuyq kơy hlit ka oh ay dang đaji gô, xing katul đom khơl oh ay ku oh ay.’ 38Neq laa manih măn đom manih karôp aduq wăngq we kung dii kơy hơu, Kơy heq xanoh kung kơy tol đoot Si-nai, ji dii khơl mo kơy haay, kơy laa dro heq nhonq xok apok hloay riirh xôq kahniq ăm haay, 39đơu đôôyq kung kơy, mo kơy haay leh trôôch tameng tyauq; wih hlê, oot chôôyq ka'lăk ji awih xuum oot wih truh Ai Kâp, 40tuôôy dăt A-rôn: ‘Dayh dơơp ka 'wot kaluh yaak hnoq jarooy pato 'wot. Truh phon Môi-se neq, manih heq jarooy 'wot vlôh klơlh dêh Ai Kâp, 'wot leh xet varơuq kajoq heq xalih vlôh ka kơy nưq.’ 41Nưq laa, oot dơơp muuyq vangưl bo koot đom kaluh hngơy nưq ji tơơk tưp ôq ka dang vangưl nưq, yôôch hlah hlaak vii varơuq dơơp ku ti oot. 42Tuôôy nưq, Kơy Plêêk wih katoor ji ka'lăk oot ayuôôt laat kaluh xalok tol plêêk, đaji heq valơk đom rahlăp ku khơl hnhư hlit, đaneq:

‘Wơơy hnhư I-sơ-ra-ên, be aleq êêp koot heq tơơk tưp ka Gô kaluh ôq ji kuah lêh

đom tuôôt poot kưl xanưm aduq wăngq we?

43Êêp koot heq xakôôk raap đơ ku yaak Mo-lok

ji xalok yaak Rom-phan ku êêp koot,

— kaluh dang vangưl đơu êêp koot heq dơơp vlôh xôq akuh kaluh nưq —

ji Gô hnoq xagook êêp hlê pi hơq Ba-bi-lôn.’

44Raap xanưk tavek măn kung mo kơy haay đom wăngq we, dang đaji Kơy xanoh dii Môi-se heq padoh pato, pheq dơơp raap nưq tyauq khwuôôn dang đơu kơy heq hloq, 45đơu kung dii raap nưq, atêq tuôôy xôq padooy dưk katôôl, mo kơy haay kung heq xagook tyauq 'laarq katuôôy Jô-suê đom varơuq hooy tagoa dêh ku khơl tamooy đơu Kơy Plêêk heq đuôôy hooy kangưưr mo kơy haay ăm truh katuôôy Đa-vik, 46laa dro jah vanong kangưưr Kơy Plêêk, ji kơy heq apôôy vôôch xôq axek muuyq aduq măn ka hnhư ku Ja-kôp. 47Anưq yôôch, Sa-lô-môn heq xơy panưk hnhư ka Kadraq. 48Lunư, Kơy Thier Yơơt leh măn đom aduq ti manih dơơp vlôh, đaji hnhư hlit e đnooy:

49‘Lôôk xanoh: Plêêk laa ngôôy Gô, ji vari laa đool xôq jôôk Gô.

Êêp koot hnoq xơy hnhư đaleq ka Gô?

Long aduq leq deng ka varơuq padơy pado ku Gô?

50Be aalq ti Gô heq panưk jêêk dêq hloay kaluh thưq neq ih?’

51Wơơy khơl manih găk ranong, xuum ji tôôr leh chiuq goch kađuh hơq! Oh ay hloay tachơơl tangưưr Lôôk Phool Hiel. Mo kơy ku oh ay đaleq, oh ay kung đanưq. 52Muuyq dro leq đom khơl hnhư hlit đơu mo kơy ku oh ay heq leh rôp toop? Oot heq păk kaxêêt khơl adro padoh tauq adroyq ka varơuq truh ku Kơy Hyioh Jăk, đơu oh ay đong heq vlôh jêêk adro xalih xuum ji dro păk kaxêêt Kơy nưq, 53nưq laa khơl adro heq nhonq ganuun xing varơuq đnooy pato ku khơl yaak plêêk, đơu leh jư xok.”

54Tuôôy nưq, atêq tuôôy tameng kaluh apok nưq, oot biq pưk xalôh tôq jaraq đom xuum oot, ji oot takik kaneeng dii kơy. 55Bơh đong tuôôy jah viik galaay Lôôk Phool Hiel, atêq tuôôy 'yo tamaak tol plêêk, kơy hloq varơuq tađnah tađnaak ku Kơy Plêêk ji Lôôk Jê-xu dưk măn pi akoh Kơy Plêêk. 56Kơy đnooy: “'Yo hơq, gô hloq kaluh tal plêêk jah luh ranưh, ji Koot Manih dưk măn pi akoh Kơy Plêêk.” 57Tuôôy nưq, atêq tuôôy alo pariau kôt apok, oot kajet tôôr oot hlê yôôch kung mamuuyq kathôp muut kơy. 58Tuôôy heq taluq vlôh pi gôk theng, oot tiip phơu muut kơy. Khơl adro xanưk xôq aau gôk ku oot aduq jôôk muuyq tadăp blaay jah taayh laa Sau-lơ. 59Oot tiip phơu Ê-tiên đom kaplah kơy apôôy, đaneq: “Kuh Lôôk Jê-xu, xiin taway xok phool hiel koot.” 60Anưq yôôch, atêq tuôôy kul takuul pôôt, kơy taayh kôt apok: “Lôôk lơơy, Kadraq leh uk kadrôôp neq tol oot.” Tuôôy đnooy apok nưq xong yôôych kơy vik.