2 Tê-sa-lô-ni-ka 2

1Wơơy oh ay, măn ka varơuq truh ku Lôôk haay, laa Lôôk Wơơt Dêh Jê-xu, ji varơuq tưưuq tagumq ku haay dii Kadraq, 'wot xiin oh ay 2đaneq oh ay te hlơu klêq biq xôôl dôôl long varaal vari đom xuum biit oh ay, kung te xing muuyq garu xi, long xing muuyq apok pato dayq, long xing muuyq hla thư dang đaji truh xing 'wot, tuôôy đnooy đaneq hngơy ku Lôôk heq truh yôôch. 3Apôôy leh muuyq adro leq tyauq paq kê kach leq hnoq ik aluut pa ôôh oh ay, vii đêh vlôh varơuq chôôyq ka'lăk đaauq truh adroyq, ji koot manih ku varơuq leh ganuun jah kahnoq vlôh, nưq laa adro koot ku varơuq kaxêêt hlơơp, 4laa adro tachơơl 'yarơ ji vanê kadih ni tok tachơơl hlê dii tôôy varơuq jah taayh laa yaak long laa adro xôq ayuôôt laat, pheq đnooy kadih ni 'ngôôy đom hnhư hơu ku Kơy Plêêk, kahnoq vlôh đaneq jơq ni laa Kơy Plêêk. 5Oh ay leh văch đaneq, tuôôy đong măn dii oh ay, gô 'miêh heq ăm ka oh ay xet kaluh varơuq neq aleq? 6Ji juneq oh ay heq xet varơuq kajoq đong klơl hlê, xôq ni vơ ik e mot muut klip kawat ku ni. 7Vii varơuq kadook ku varơuq leh ganuun đong dưk dơơp yôôch, Kơy vơ muuyq đong klơl jư ni jơu neq măn e dong truh tuôôy Kơy nưq vlôh klơlh aduq klơl jư katul, 8Ji yôôch adro leh ganuun hnoq jah kahnoq vlôh, laa adro đơu Lôôk Jê-xu hnoq păk kaxêêt bơơn hoot heet ku huuy Kadraq, Ji hnoq khienq ni jêêk vlôh hư hlơơp xing tađnah tađnaak varơuq rama truh ku Kadraq, 9đơu varơuq rama vlôh ku adro leh ganuun hơq laa gamưh muut varơuq dơơp ku Sa-tan bơơn dêq hloay da uh kung hlêêl akêh, kung đaji pheep akêh pa ôôh, 10ji dii tôôy kiêuh pa ôôh leh hyioh deng ka khơl adro hư hlơơp, đơu oot hư hlơơp laa vii oot heq be nhonq xok xuum xung xiaq dong dik ka oot xôq jah wơơt. 11Ji vii kakơq nưq, Kơy Plêêk pahnăp oot đom ahluk ku varơuq hyaak hyul xôq oot tuôq varơuq pa ôôh, 12xôq ka dêq hloay oot hnoq biq xưh xadrah, nưq laa khơl adro leh tuôq varơuq dik, đơu laay hlah trôôch varơuq leh hyioh.

13Bơh, wơơy oh ay, laa khơl adro jah Lôôk xiaq, 'wot pheq hloay kuh kway Kơy Plêêk truh oh ay. Vii Kơy Plêêk heq rơơlh oh ay đaji kaluh play adroyq dik xôq jah vanong wơơt xok gamưh varơuq vah xarêh ku Kơy Phool Hiel ji xuum tuôq aduq varơuq dik. 14Vii xôq jah vanong nưq, Kadraq heq tawooyh taayh oh ay gamưh Hêêl Kaxay ku 'wot, truh dii varơuq jah nhonq tađnah tađnaak ku Lôôk haay, laa Lôôk Wơơt Dêh Jê-xu. 15Vii anưq, wơơy oh ay, dayh dưk kajưk ji jư chăk kaluh pato dayq hnu đơu oh ay heq jah pato dayq, long atoh bơơn apok đnooy long bơơn hla thư ku 'wot.

16Apôôy kadih Lôôk haay, laa Lôôk Wơơt Dêh Jê-xu, ji Kơy Plêêk, Vaq haay, Kơy xung xiaq haay ji heq kahniq ăm ka haay varơuq hlơq hlôôp đơơy đơơy kung dii varơuq takôô gamưh kaxay tamaq xing vanong plêêk, 17xiin Kadraq ahmưk nhăk ji dơơp ka kajưk kalh xuum klaak oh ay đom tôôy varơuq dơơp kung apok đnooy tamaq kaxay.