2 Tê-sa-lô-ni-ka 1

1Phao-lô, ji Sin-vanh, kung dii Ti-mô-thê, atăq ka Tayuup Vah Tê-sa-lô-ni-ka đom Kơy Plêêk, laa Vaq ji Lôôk haay, laa Lôôk Wơơt Dêh Jê-xu. 2Apôôy vanong plêêk ji varơuq hrok hrol xing aduq Kơy Plêêk, laa Vaq, ji Lôôk, laa Lôôk Wơơt Dêh Jê-xu, măn tol oh ay.

3Wơơy oh ay, 'wot pheq hloay kuh kway Kơy Plêêk truh oh ay, đaji nưq laa Varơuq jơq troq, vii xuum tuôq oh ay hngơy kang kôt tok, ji xuum xung xiaq ku tôôy muuyq dro đom dêq hloay oh ay đôôyq dii mamuuyq kưq athêêp tok; 4pheq đnooy 'wot pa ưưt xăk aduq oh ay đom katul kaluh tayuup vah ku Kơy Plêêk truh varơuq kajưk xuum ku oh ay ji xuum tuôq katul tôôy đơơt rôp toop ku oh ay, kung dii kaluh pơơl dal đơu oh ay đong pheq chiuq, 5nưq laa bơơn xanưk truh varơuq xưh xadrah hyioh jăk ku Kơy Plêêk deng ka oh ay xôq jah 'yo laa taxưngq dii daak dêh ku Kơy Plêêk, vii daak dêh nưq đơu oh ay kung đong chiuq pơơl; 6Vii dik laa hyioh jăk tuôôy Kơy Plêêk dook bla varơuq pơơl dal tol khơl adro dơơp pơơl dal ka oh ay, 7ji kahniq ka oh ay, laa khơl adro chiuq pơơl dal, varơuq padơy pado kung 'wot tuôôy varơuq rama truh ku Lôôk Jê-xu kahnoq vlôh xing plêêk dii khơl kơy yaak kalh paraat ku Kadraq, 8đom xaar ôôlh rahưk, xagook varơuq hmơt dook truh ka khơl adro leh 'yo xet Kơy Plêêk ji ka khơl adro leh tameng tyauq Hêêl Kaxay ku Lôôk haay, laa Lôôk Jê-xu, 9nưq laa khơl adro hnoq pơq xok varơuq hmơt dook — laa varơuq păk kaxêêt dêq đơơy đơơy, xangưưy mot Lôôk ji klơlh tađnah tađnaak ku taay yaak Kadraq, 10tuôôy Kadraq truh xôq jah vanê ayuôôt bơyh khơl vah ku Kadraq ji jah 'yo atrêêk katul tôôy adro heq xôq xuum tuôq, vii apok xanưk ku 'wot truh dii oh ay đom hngơy nưq heq jah tuôq nhonq. 11Vii kơq nưq, 'wot măn hloay apôôy ka oh ay xôq Kơy Plêêk haay 'yo oh ay laa taxưngq dii varơuq tawooyh taayh, ji xôq kadraq dơơp jêêk tôôy xuum trôôch truh varơuq kaxay ji varơuq dơơp ku xuum tuôq xing taay yaak, 12xôq ka yal ku Lôôk haay, laa Lôôk Jê-xu, jah vanê ayuôôt aduq oh ay ji oh ay jah tađnah tađnaak aduq Kadraq, tyauq vanong plêêk ku Kơy Plêêk ji Lôôk haay, laa Lôôk Wơơt Dêh Jê-xu.