Skip to content
BibleKenya

Cua Bible Literal Text

1 Tê-sa-lô-ni-ka 5:11

Verse 11 is marked below, with the whole chapter around it. Read from the start

Wơơy oh ay, truh hngơy wat ji katuôôy, oh ay be duh 'wot valơk ka oh ay. Vii kadih oh ay xet thier ro đaneq hngơy ku Lôôk truh dang đaleq — đaji adro atôk đom kamơng. Tuôôy khơl kadrơy đnooy: “Tagu hlê ji hrok hrol,” yôôych varơuq kaxêêt hlơơp tưng hưng ka ôp pôôt tol oot, dang đaji đơơt jiq pa iir đôôyq dii khơl kadrê đong măn bonq, ji oot kajưk dik leh xaloot klơlh. Bơh, wơơy oh ay, oh ay leh măn đom kamơng jaluk xôq yôôch hngơy nưq xalih truh ka oh ay tưng hưng đaji adro atôk. Vii oh ay raay laa koot ku xaraar tađnah ji koot ku ka hngơy. Haay leh thuôk xuq ka klôôy long kamơng jaluk, Vii anưq, haay te vik đaji khơl adro kadrơy, wih hlê, haay duh parol 'yo ji talăng jăk. Vii manih vik laa vik đom ka klôôy, ji manih vuul yôôych vuul đom ka klôôy. Bơh vii thuôk xuq ka hngơy, lunưq haay pheq talăng jăk, hlưp aau kanăk ku xuum tuôq ji xuum xung xiaq, dii đoat kanăk — laa takôô gamưh wơơt xok. Vii Kơy Plêêk heq leh đinq ka haay chiuq đơơt tôq tơh, đơu xôq nhonq jah varơuq wơơt xok gamưh Lôôk haay, laa Lôôk Wơơt Dêh Jê-xu, Kơy heq kaxêêt vii haay, xôq haay long parol long vik, haay raay kung riirh dii Kadraq. Jo nưq, dayh ahmưk nhăk mamuuyq, adro neq dayh waak rơy adro hơq, đaji oh ay đong măn dơơp.

Wơơy oh ay, 'wot xiin oh ay dayh kul vado khơl adro chiuq pơơl hwơơl katul đom oh ay, jarooy achôôk oh ay đom Lôôk, ahmưk nhăk oh ay, ji dayh biit truh oot muuyq kach vanê vado đom xuum xung xiaq vii varơuq dơơp ku oot. Dayh riirh tagu dii mamuuyq. Panưh kadrơy, wơơy oh ay, 'wot ahluk ahlul oh ay: pheq trek toah manih xa măn bơyq ba, pheq hlơq hlôôp manih gưlh xuum, pheq waak rôôk manih ravoch, pheq atuq xuum dii dêq hloay tôôy adro. Dayh rơơt rol, te kơyq xok xơk bla xơk ka kơyq, wih hlê, dayh hloay chawiq tyauq varơuq kaxay tamaq deng ka mamuuyq ji ka tôôy adro. Dayh hloay hloay hlah hlaak. Dayh apôôy leh padơy. Đom baq kê varơuq kajoq, dayh kuh kway, vii varơuq nưq laa xuum trôôch ku Kơy Plêêk deng ka oh ay đom Lôôk Wơơt Dêh Jê-xu. Te apoch Kơy Phool Hiel. Te 'yo leh ra kajoq kaluh apok hlit. Dayh arơơk axek tôôy varơuq. Dayh jư xok varơuq kajoq laa tamaq kaxay. Dayh chuh xangưưy klơlh tôôy varơuq dang đaji varơuq xơk tauq.

Apôôy vôôch jơq Kơy Plêêk hrok hrol yuôôr vah oh ay dêq hloay, ji apôôy dêq hloay danưng kooy, phool hiel, xăk xamơk ku oh ay jah jư 'yo ăm leh e aduq trek ik tuôôy Lôôk haay, laa Lôôk Wơơt Dêh Jê-xu, kahri truh. Jư apok thay laa Kơy tawooyh taayh oh ay, kung laa Kơy hnoq dưk dơơp varơuq nưq.

Wơơy oh ay, kung dayh apôôy ka 'wot đnoyq.

Xiin vôôch hlơq dêq hloay oh ay bơơn hiip vah. Gô taayh yal Lôôk dăt ka oh ay pheq xôq hla thư neq jah đok ka dêq hloay oh ay.

Apôôy vôôch vanong plêêk ku Lôôk haay, laa Lôôk Wơơt Dêh Jê-xu, măn kung oh ay.

Cua Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.