1 Phi-e-rơ 4

1Anưq yôôych, vii Lôôk Wơơt Dêh heq chiuq pơơl đom xăk xamơk, lunưq oh ay kung dayh chiuq ralauq palauq kung xuum biit nưq, bơyh adro leq heq chiuq pơơl đom xăk xamơk yôôych heq ka'lăk klơlh dii kadrôôp maroh, 2xôq tuôôt kawat măn hlê đom xăk xamơk, adro nưq paq măn riirh ka xuum hmưch ku koot manih đnoyq, bơh ka iq trôôch ku Kơy Plêêk. 3Vii kawat heq dalơh hlê heq đu xôq jah ik iq trôôch ku tamooy kadrơy, tuôôy riirh đom varơuq xa măn paq xet biit, hmưch trôôch, vuul weel, xa hôôch, xa agưt paq kê ji akuh dang vangưl thier ramêq, 4đơu đom varơuq nưq, oot biq tưng hưng tuôôy oh ay leh charơơk tyauq oot đom kung alook daak aluulh ku varơuq xa agưt bơyq ba, lunưq đơu đnooy apok katơơk galơh; 5bing oot hnoq đnooy vlôh apok đnooy padoh kangưưr Kơy ralauq 'miêh xưh xadrah manih riirh hloay manih kaxêêt. 6Bơyh vii varơuq nưq, Hêêl Kaxay kung heq jah padoh taboon ka khơl adro heq kaxêêt yôôch, xôq ju oot heq chiuq xưh xadrah tyauq koot manih đom xăk xamơk, yôôych neq oot e hnoq riirh tyauq Kơy Plêêk đom danưng kooy.

7Panưh kadrơy, varơuq lôôch dik ku paroh araak heq truh jeq. Vii anưq, dayh luh laak ji talăng jăk tơơk tưp kaluh apok apôôy; 8tuôôy adroyq dêq e xuum xung xiaq talăng jăk deng ka mamuuyq, vii xuum xung xiaq hnoq katuh galôp viik ngăk kadrôôp maroh; 9e xuum tiip đoonq dii mamuuyq đơu leh huq phanq nanq; 10ji tyauq đaji tôôy adro heq nhonq vanong, xok jung ni hơu varơuq ka mamuuyq, dang đaji khơl adro jư 'yo jooy đôôyq dii vanong plêêk 'ngưng varơuq đêh mamuuyq ku Kơy Plêêk. 11Atoh kơyq padoh taboon — yôôych đaji đnooy apok ku Kơy Plêêk; atoh kơyq hơu varơuq — yôôych dơơp varơuq đaji bơơn paraat đơu Kơy Plêêk kahniq ăm, xôq đom kaluh varơuq Kơy Plêêk jah ayuôôt laat gamưh Lôôk Wơơt Dêh Jê-xu, laa Kơy đangq jah tađnah tađnaak ji taay yaak dong truh đơơy đơơy miet miet. Amen.

12Oh ay xung xiaq, te biq tưng hưng truh loo ôôlh rahưk măn katul oh ay, tuôôy xalih vlôh aduq oh ay xôq thưh tôôy, đaji anưq varơuq đêh akêh xalih truh ka oh ay, 13Wih hlê, xatyauq oh ay e phon taleq muut kaluh pơl dal ku Lôôk Wơơt Dêh, yôôych dayh hlah hlaak tanư, xôq ka đom varơuq kahnoq vlôh tađnah tađnaak ku Kadraq, oh ay jah ayuch ayauq, viik galaay hlah hlaak. 14Atoh oh ay biq đnooy ra ơơh vii yal Lôôk Wơơt Dêh, yôôych e vanong dik, bơyh Kơy Phool Hiel ku varơuq tađnah tađnaak ji ku Kơy Plêêk, măn tol oh ay. 15Te e kơyq đom oh ay chiuq pơơl đaji adro păk kaxêêt manih, adro atôk, adro dơơp xơk, long đaji adro xalieh muut varơuq khơl drơy, 16bơh atoh chiuq pơơl vii laa Manih Tuôq Lôôk Jê-xu, yôôych adro nưq te kamưưl, đơu đom yal nưq dayh ayuôôt laat Kơy Plêêk. 17Bơyh vii heq truh tuôôy xarôp varơuq xưh xadrah xing hnhư ku Kơy Plêêk; đơu atoh adroyq dik xing haay, yôôych varơuq lôôch dik ku khơl adro leh tameng tyauq Hêêl Kaxay ku Kơy Plêêk hnoq đaleq?

18Ji “Atoh manih hyioh jăk kho jah wơơt,

yôôych manih leh tuôq akuh ji adro e kadrôôp hnoq măn 'leq?”

19Jo anưq, khơl kơy chiuq pơơl tyauq iq trôôch ku Kơy Plêêk dayh pahnăp phool hiel haay ka Kơy Panưk Jêêk jư apok đom varơuq dơơp kaxay.