1 Phi-e-rơ 3

1Wơơy khơl mư laa khơl adro kadrê, kung đanưq, duh tameng tyauq kanau khơl mư, xôq pheq đnooy atoh muuyq sôôq adro kanau leh tameng tyauq đaauq, bơh gamưh kach xa măn ku kadrê ju leh xok apok đnooy, yôôych khơl adro kanau nưq hnoq jah tuôq tyauq, 2atêq tuôôy 'yo hloq đơơy riirh xarêh xaraat kung dii varơuq vado ku khơl mư, 3đơu tadê rayoa ku khơl mư leh aalq măn pi gôk voot hlôôk ji hlưk đô vajang, long xa vâk qwuân aau karoh kaxay, 4bơh laa xuum klaak koot manih pi'lăp, dii nêêk kaxay măn hloay ku danưng kooy manưl manưưy ji hnhep, varơuq nưq laa quiq jaq adroyq kangưưr Kơy Plêêk. 5Vii khơl kadrê vah tuôôy hnu, laa khơl adro xôq xuum takôô gamưh aduq Kơy Plêêk, kung heq ta'meq xăk xamơk đanưq tuôôy tameng tyauq kanau mư, 6đaji Sa-ra heq tameng tyauq apok Ap-ra-ham tuôôy taayh kơy laa lôôk, khơl oh ay kadrê jah jêêk vlôh koot xau ku mo tuôôy dơơp kaxay ji leh kamưưl paq kê varơuq varaal yôq leq.

7Wơơy khơl oh ay laa khơl manih kanau, kung đanưq, bơơn varơuq hlolh xet, duh pheq achung riirh dii kadrê đaji dii manih iuq iaq, ka ajơ ahlook aklah varơuq vado đaji khơl kung e phon vanong plêêk ku varơuq riirh, xôq ka apok apôôy ku oh ay leh biq klơl hlê.

8Atêq dik, dêq hloay duh e kung muuyq xuum biit, varơuq biit angơuq, xiaq oh ay khơl wơơy, xuum kaxay, varơuq apôôt xăk, 9te xok xơk bla xơk, long apok karoay axaap tơơl hlê apok karoay axaap, đơu wiit hlê, kưq apôôy kaxay, vii oh ay heq jah taayh truh varơuq nưq, xôq oh ay jah nhonq vanong kaxay. 10Vii,

“Kơyq trôôch xiaq varơuq riirh ji hloq hngơy xiêk kaxay tamaq

pheq jư kapiet ni klơlh varơuq xơk, ji huuy ni be đnooy varơuq pa ôôh lar.

11Manih nưq pheq wih klơlh varơuq xơk ji pheq dưk dơơp varơuq kaxay.

Adro nưq pheq axek akhiim varơuq tagu ji pheq chawiq tyauq varơuq nưq,

12vii mot Lôôk măn tol manih hyioh jăk ji tôôr Kadraq măn jeq apok apôôy vôôch ku oot,

bơh mot Lôôk tachơơl hlê adro dơơp xơk.”

13Kơyq laa adro hnoq dơơp ra ơơh oh ay atoh oh ay jêêk vlôh khơl adro garơng dơơp truh varơuq kaxay? 14Lunư, long tabơh oh ay pheq đnooy pheq chiuq pơl vii varơuq hyioh jăk, yôôych oh ay dik e vanong. Panưh kadrơy, te biq varaal hwaal tyauq kamo yôq ku oot, kung te biq xôôl dôôl, 15đơu dayh vanê vah Lôôk Wơơt Dêh, laa Lôôk đom xuum haay, hloay hloay talăng jăk ka varơuq tơơl hlê dêq hloay kơyq vôôch oh ay kakơq ka xuum takôô gamưh đom oh ay, 16bơh dii varơuq tagu ji vado, vii e muuyq xuum klaak kaxay, xôq đom varơuq kajoq đơu oh ay biq đnooy pahnhiq, yôôych khơl adro đnooy ra ơơh đơơy riirh kaxay tamaq ku oh ay đom Lôôk Wơơt Dêh pheq xơuq kamưưl. 17Vii atoh laa iq Kơy Plêêk trôôch, yôôych dong chiuq pơl dơơp kaxay, iaq laa dơơp xơk. 18Bơyh vii Lôôk Wơơt Dêh kung heq hmưq chiuq pơl vii kadrôôp maroh — Kơy hyioh jăk kaxêêt thêq adro be hyioh jăk — xôq Kadraq e hnoq jarooy haay truh dii Kơy Plêêk, tuôôy biq kaxêêt truh phon xăk đơu jah dơơp ăm riirh truh phon danưng kooy, 19đom danưng kooy nưq, Kadraq kung heq padoh taboon tuôôy jah truh dii phool hiel đom tu, 20laa khơl adro adroyq hơq leh tameng tyauq tuôôy varơuq atuq xuum ku Kơy Plêêk 'miêh kôô takôô đom đơơy Nô-ê, đong tuôôy poop tau jah đoonq, đơu đom tau nưq, taleq adro — nưq laa thơơm phool hiel — heq jah wơơt klơlh daak, 21đơu neq kung laa long lơuq juneq wơơt xok oh ay, 'ngưq laa pheep bap-tem — leh aalq varơuq tapolh ka'lăk thul 'moh tol xăk xamơk, bơh laa varơuq tavek ku muuyq xuum klaak kaxay deng ka Kơy Plêêk — gamưh varơuq riirh hlê ku Lôôk Wơơt Dêh Jê-xu, 22laa Kơy, atêq tuôôy hooy tok tol plêêk, đong 'ngôôy pi akoh Kơy Plêêk, đơu khơl yaak plêêk ji khơl kơy e da uh qwuyen kung kaluh paraat da uh raay tameng tyauq Kadraq.