1 Kô-rinh-tô 11

1Dayh jêêk vlôh khơl adro dơơp atôôlh gô, đaji gô kung laa adro dơơp atôôlh Lôôk Wơơt Dêh.

2Gô vado oh ay vii oh ay heq văch truh gô đom tôôy varơuq, ji oh ay jư kajưk kaluh apok hnu, dang đaji gô heq pato ka oh ay. 3Lunư, gô trôôch oh ay hlolh đaneq Lôôk Wơơt Dêh laa akoq ku tôôy adro khơl kanau, đơu khơl kanau laa akoq ku khơl drê, măn Kơy Plêêk laa akoq ku Lôôk Wơơt Dêh. 4Tôôy adro khơl kanau apôôy long đnooy hlit, atoh e kajoq nưq klum tol akoq, yôôych dơơp kamưưl akoq ni. 5Bơh tôôy adro khơl drê apôôy long đnooy hlit dii akoq leh jah klum hlê, yôôych dơơp kamưưl akoq ni. Vii varơuq neq laa muuyq dii varơuq akoq heq biq kwoah. 6Vii atoh muuyq khơl drê leh klum akoq, yôôych mư nưq kung dayh goch hlôôk dơyh. Măn atoh goch hlôôk long kwoah akoq laa varơuq kamưưl dik đôôyq dii khơl drê, yôôych mư nưq pheq klum akoq hlê. 7Bơyh muuyq panưh, khơl kanau be duh klum akoq oot vii laa long lơuq ji tađnah tađnaak ku Kơy Plêêk. Panưh kadrơy, khơl drê laa tađnah tađnaak ku khơl kanau. 8Vii khơl kanau yôôych be vlôh xing khơl drê, đơu laa khơl drê vlôh xing khơl kanau. 9Kung vii khơl kanau leh jah panưh jêêk vii khơl drê, đơu laa khơl drê vii khơl kanau. 10Vii kakơq nưq, khơl drê duh pheq ayil dơuq hlêêl da uh qwuyen tol akoq oot, vii kơq khơl yaak plêêk. 11Ju anưq, đom Lôôk, khơl drê leh đê đêh dii khơl kanau, khơl kanau kung be đê đêh dii khơl drê. 12Vii khơl drê vlôh xing khơl kanau đaleq, yôôych khơl kanau kung gamưh khơl drê đơu e đanưq, bơh tôôy paroh vlôh xing Kơy Plêêk. 13Dayh 'yo hlê măn katul kadih khơl oh ay: Adro Khơl drê leh klum akoq apôôy dii Kơy Plêêk yôôych e tamuut be? 14Be aalq hloay kaah kadih varơuq tưq nhiên pato oh ay đaneq muuyq panưh, atoh khơl kanau xôq hlôôk yơơt, yôôych nưq laa varơuq kamưưl dik ka ni, 15panưh kadrơy, atoh khơl drê e hlôôk yơơt, yôôych nưq laa tađnah tađnaak deng ka mư nưq ih? Vii hlôôk yơơt heq jah kahniq ka mư nưq dang đaji khanh klum akoq. 16Măn atoh kơyq đong đaji e xuum takaay tayaat truh varơuq neq, yôôych 'wot leh e kiêuh katik đanưq, kaluh tayuup vah ku Kơy Plêêk kung lưp.

17Bơh tuôôy đnooy vlôh apok tanưưl neq, gô be vado oh ay, vii oh ay anguk tagumq dii mamuuyq leh jarooy truh varơuq tolh iaq bơh laa wih truh aduq têq iaq. 18Vii adroyq dik, tuôôy oh ay anguk hlê đom tayuup vah, gô tameng truh 'ngưng varơuq aklah vlôh măn đom katul oh ay, ji gô tuôq varơuq nưq phon leq. 19Vii duh pheq e kaluh bing ja đom katul oh ay, xôq ka khơl leq heq chiuq thưh kung hnoq ik kahnoq vlôh ro raang đom katul oh ay. 20Vii anưq, tuôôy oh ay anguk hlê aduq kung muuyq duq, varơuq nưq be aalq laa xôq jưq Waal Vah ku Lôôk. 21Vii đom tuôôy xa, tôôy adro lo xa waal xa ku ni adroyq; lunưq long e adro yôôych pangoot hrah, bơh e adro yôôych vuul weel. 22Be aleq oh ay leh e hnhư xôq xa ji hôôch đom nưq ih? Long oh ay 'yo leh ra kajoq tayuup vah ku Kơy Plêêk ji dơơp kamưưl mot khơl adro be e kajoq? Gô duh đnooy kajoq dii oh ay? Duh vado oh ay truh varơuq neq be? Gô be vado oh ay 'leq! 23Vii gô heq nhonq xing Lôôk varơuq gô kung heq pato hlê ka oh ay, nưq laa Lôôk Jê-xu, đom klôôy đơu Kadraq biq rôp, heq xok tôôp, 24yôôch atêq tuôôy kuh kway, Kadraq pleh ni vlôh ji đnooy: “Neq laa xăk xamơk ku thơy thay ka oh ay. Dayh dơơp varơuq neq đom varơuq biit văch truh thơy.” 25Kung muuyq trôôk nưq đôôyq dii dooy atêq tuôôy xa, đaneq: “Dooy neq laa apok tavek đơơu đom vahaap thơy. Long tuôôy leq oh ay hôôch dooy, dayh dơơp varơuq neq đom varơuq biit văch truh thơy.” 26Vii atoh tuôôy leq oh ay xa tôôp neq ji hôôch dooy neq, yôôych oh ay đnooy vlôh varơuq kaxêêt ku Lôôk dong truh tuôôy Kadraq truh. 27Lunưq, paq kê kơyq xa tôôp long hôôch dooy ku Lôôk muuyq kach leh taxưngq yôôych hnoq e kadrôôp dii xăk ji vahaap ku Lôôk. 28Wih hlê, tôôy adro pheq kadih 'yo hlê xăk, yôôch đom varơuq nưq dayh xa tôôp ji hôôch dooy. 29Vii adro xa ji hôôch đơu leh kahra xăk Lôôk laa xa ji hôôch varơuq xưh xadrah ka xăk. 30Vii kakơq nưq, 'ngưng adro đom oh ay jiq jiêh, bingq tâk ji 'ngưng adro vik. 31Bơh atoh haay kadih 'yo hlê xăk, yôôych dik haay leh biq xưh xadrah. 32Măn tuôôy biq Lôôk xưh xadrah, haay biq 'meq dook xôq klơlh biq xưh xadrah achung dii dêh araak. 33Lunưq, oh ay ku gô lơơy, tuôôy anguk hlê xôq xa, dayh takôô mamuuyq. 34Atoh adro leq pangoot, yôôych dayh xa ma hnhư, xôq oh ay leh anguk tagumq măn đom varơuq xưh xadrah. Măn truh kaluh varơuq kadrơy, gô hnoq đnooy vlôh apok pato jarooy hloay tuôôy leq gô truh.