Ishipa 6

Avasa a̱ kula̱nsa̱ uɓa̱nki a makyan ma atakaci

Kadanshi a kubana u vuza vu kelime vi ishipa: A yaꞋan vu ɗa n aꞋin a umolu. A yaꞋan vu ɗa n ka̱la̱ka̱tsu ka Shimenitu. Vishipa vu Dawuda.

1Vuzavaguɗu ka̱ta̱ vu ɓarangu mu a̱ ka̱tsuma̱ ka wupa u nu ba,

ka̱ta̱ vu gbara mu a̱ ka̱tsuma̱ ka wupa wu usuɗukpi u nu ba.

2Pana asuvayali a̱ va̱ adama a na mo oꞋwo ta̱ ka̱u,

neke mu utsura adama a na mo okpo ta̱ luɓa̱.

3Vuzavaguɗu, ka̱ɗu ka̱ va̱ ko voɗotso ta̱ ka̱u,

ali wannai ɗai n kuka̱na̱ kuvana wu?

4Ta̱wa̱, Vuzavaguɗu vu isa mu,

isa mu adama ucigi u nu u na u tsu sabaꞋa ba.

5A̱ ka̱tsuma̱ ka̱ a̱kpisa̱ yayi u kuciɓa n avu?

Ko vuza u kucikpa wu a kasaun ba.

6Mo oꞋwo ta̱ ka̱u adama una̱mgbi u ka̱tsuma̱,

Kayin dem ivaꞋamkpatsu i va̱ i tsu ta̱na̱ ta̱ adama a̱ ma̱shi,

ubuta̱ u ku gbasatangu kaci ka̱ va̱ u ta̱na̱i adama a kujilya.

7A̱shi a̱ va̱ a shitasa ta̱ adama a̱ ma̱shi ma̱ a̱bunda̱i,

ali a̱shi a̱ va̱ o doku ene uye ba, adama a irala i va̱.

8Ka̱sukpa̱i mu, a̱ɗa̱ aza a ka gbani-gbani,

adama a na Vuzavaguɗu u pana ta̱ ma̱shi ma̱ va̱.

9Vuzavaguɗu u pana ta̱ ufolu u va̱,

wu isa ta̱ avasa a̱ va̱.

10Irala i va̱ ra̱ka̱ i ta̱ a kupana wono ali e jeꞋeke ikyamba.

I ta̱ a kukpatala n kafura, adama o wono wa̱ a̱bunda̱i.