Ishipa 5

Avasa a̱ kula̱nsa̱ uɓa̱nki

Kadanshi a kubana u vuza vu kelime vi ishipa: Vishipa vu Dawuda: a kubana u ma̱zuɓi ma kulika̱ igbala.

1Vuzavaguɗu, zuwa atsuvu vu pana kadanshi ka̱ va̱,

Ka̱ta̱ vu la̱na̱ kusheshe ku ka̱ɗu ka̱ va̱.

2Mogono ma̱ va̱ n Ka̱shile ka̱ va̱,

pana ma̱shi ma̱ va̱ ma̱ kula̱nsa̱ uɓa̱nki,

adama a na wa̱ a̱ nu u ɗa mi a kuyaꞋan avasa.

3Mi ta̱ a kuyaꞋan avasa wa̱ a̱ nu Vuzavaguɗu,

m kpasani vi ta̱ a kupana avasa a̱ va̱,

n kanna vi ta̱ a kupana ufolu u va̱,

ka̱ta̱ n vana wu ushuki.

4Adama a na avu Ka̱shile,

vu tsu pana uyoꞋo u ka gbani-gbani ba,

vu tsu ka̱sukpa̱ uma a gbani-gbani a̱ ta̱wa̱ wa̱ a̱ nu ba.

5Aza a̱ra̱ɗi a kushamgba e kelime ka̱ nu ba,

vu tsu iwan ta̱ aza a kuyaꞋan kagbanigbani.

6Vu tsu una ta̱ aza aꞋuwa dem,

vu tsu ene ta̱ unata wa aza a munuka,

n aza o modoruko.

7Ama mpa, adama a ucigi u nu u na u tsu sabaꞋa ba,

mi ta̱ a kuꞋuwa a kpaꞋa ku nu.

n uwa A̱Ꞌisa̱ a gbayin a ciɗa a̱ nu n cikpa wu,

n kuɗa̱ngu e kelime ka̱ nu.

8Vuzavaguɗu, tono nu mpa a uye wu usuɓi u nu,

adama a na irala i va̱ i yimkpa ta̱,

yotsongu mu uye u nu e keteshe ciya̱ n tono.

9I n kamayun a una̱ u le ba,

a̱ɗu e le i ta̱ tukpa n ukuna u munuka,

ogboroli e le asaun a ɗa,

elentsu e le kpamu kadanshi ka aꞋuwa kaꞋa koci.

10Ka̱shile, kece le aza a unushi,

yaꞋan kagbanigbani ke le ko bono a kaci ke le.

Loko le kelime ka̱ nu, adama a unushi wa̱ a̱bunda̱i u le,

adama a na a yaꞋanka wu ta̱ ugbamukaci.

11YaꞋan aza a na e sheɗeki wa̱ a̱ nu, a yaꞋan ma̱za̱nga̱.

yaꞋan a̱ ka̱na̱ kuyaꞋan ishipa adama a̱ ma̱za̱nga̱.

Vu inda le n ka̱ci ka̱ nu,

adama aza a na a cigai kula ku nu dem

a yaꞋan ma̱za̱nga̱ adama a̱ nu.

12Mayun, Vuzavaguɗu vu zuwaka ta̱ aza a usuɓi una̱singai,

kasingai ka̱ nu kaꞋa ka kanzai le tsu ma̱ra̱ga̱.