Ishipa 58

Avasa adama a na a takacika uma a gbani-gbani

Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu <<Ka̱ta̱ a yaꞋan munuka ba.>> Vishipa vu Dawuda.

1A̱ɗa̱ aza o tsugono yi ta̱ e kuneke kadanshi ka mayun?

Yi ta̱ a kuyaꞋanka uma afada a singai?

2A̱Ꞌa̱, a̱ɗu a̱ ɗa̱ kusheshe ku gbani-gbani ku ɗa koci yi a kuyaꞋan.

yi a kuyaꞋan unushi u kuɗa̱ngusa̱ vishili a iɗika.

3Ili i na i ɗikai ele punu a̱ ka̱tsuma̱, uma a gbani-gbani a̱ ka̱sukpa̱i uye,

babu a matsai le ɗa aza aꞋuwa a̱ ka̱sukpa̱i uye.

4I ta̱ tukpa n tsukono a na tsu koko,

o tsu votsuku ta̱ atsuvu e le tsu kagulani ka kagbaturu,

5ka na ka tsu pana ka̱la̱ka̱tsu ka vuza vu a̱da̱bu ba.

Ko u panaka ma̱zuɓi ma̱ a̱da̱bu ba.

6Ka̱shile, koɗoso anga e le ana i a malumuka n aɗa.

koɗoso anga i muku mi ikawu ma, Vuzavaguɗu,

7YaꞋan a̱ puwa̱nka̱ tsu na mini me ci yene a kulaza.

yaꞋan o koɗoso ayaꞋa e le, ayin a na baci a katsuki a utan u le.

8YaꞋan e derikpe tsu na kokoto ke tsu wala u ka̱sukpa̱ kederi,

yaꞋan okpo tsu mereɓu ma na a matsai ukpa̱,

ma na u saꞋwai kene kanna ba.

9Babu uyevi u le Ka̱shile ki ta̱ a̱ kupura̱ngu le tsu mita̱,

a̱ ka̱tsuma̱ ka wupa wu usuɗukpi u ni,

Ka̱shile ki ta̱ a̱ kupura̱ngu le ele biꞋi n wuma.

10Aza a usuɓi i ta̱ a̱ kuyaꞋan ma̱za̱nga̱,

ayin a na baci enei a takacikai uma a gbani-gbani.

i ta̱ a kuyaꞋan ma̱za̱nga̱

ayin a na baci a unai irala i le ra̱ka̱.

11Ka̱ ta̱ uma a dana,

<<Mayun katsupu ki ta̱ lo a vuza vu usuɓi,

mayun Ka̱shile ki ta̱ lo ka na ki a kuyaꞋanka aduniyan afada.>>