Ishipa 57

Avasa a̱ kula̱nsa̱ uɓa̱nki atakaci

Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka<<Ka̱ta̱ a yaꞋan munuka ba.>> Vishipa vu Dawuda. Ana u sumai u Shawulu u uwai a kaɓatsu.

(Ishp 108:1-5)

1Pana asuvayali a̱ va̱ Ka̱shile, pana asuvayali a̱ va̱,

adama a na wa̱ a̱ nu u ɗa n la̱nsa̱i ubuta̱ u kusheɗeku.

Mi ta̱ e kusheɗeku a ɗaka vu evelyu a̱ nu.

ali mita ra̱ka̱ ma laza.

2Mi ta̱ e kuɗeke Ka̱shile, MalaꞋimili,

a̱yi Ka̱shile ka na ka ci shatangu ku mu ili dem.

3Ɗe gaɗi Ka̱shile ki ta̱ a̱ ku suꞋuku mu n wishi.

o kuloko aza a na i a̱ vishili nu mpa. Kuvuka

Ka̱shile ki ta̱ o ku yotsongu mu ucigi,

u ni u na tsu sabaꞋa ba n usuɓi u ni.

4Wuma u va̱ wi ta̱ e mere ma ikawu,

n vaki e mere ma nnama n na n tsu takuma uma.

anga e le i ta̱ a na osovu n ayaꞋa,

elentsu e le i ta̱ n alyu tsu otokobi.

5Ka̱shile, yaꞋan a cikpa wu a gaɗi vu eleshu,

yaꞋan tsugbayin tsu nu kpamu tsu yongo aduniyan dem.

6Irala i va̱ i zuwaka mu ta̱ maza adama a na aza mu.

atakaci a laꞋa ta̱ utsura u va̱.

A̱ ga̱va̱ka̱i mu kpenle a uye u va̱,

ama ɗa a kucikpa o bono a̱ yikpa̱i punu n ka̱ci ka̱le. Kuvuka

7Ka̱shile, ka̱ɗu ka̱ va̱ ka̱ muɗa̱ ba,

ka̱ɗu ka̱ va̱ ki ta̱ ida̱shi,

mi ta̱ a kuyaꞋan ishipa n cikpa wu.

8Jimgba, wuma u va̱

jimgba umolu u va̱,

mi ta̱ a ku jimgba n usana n ishipa i va̱.

9Vuzavaguɗu, mi ta̱ a kucikpa wu a̱ ka̱tsuma̱ ka uduniyan,

mi ta̱ a kucanana ishipa i kucikpa wu a̱ ka̱tsuma̱ ka uma.

10Ucigi u gbayin u nu u yawa ta̱ gaɗi,

usuɓi u nu u yawa ta̱ eleshu.

11Ka̱shile, yaꞋan a cikpa wu a gaɗi vu eleshu,

yaꞋan tsugbayin tsu nu kpamu tsu yongo aduniyan dem.