Ishipa 148

YaꞋan ili i na Ka̱shile ka yaꞋin i cikpa yi

1Cikpai Vuzavaguɗu!

Cikpai Vuzavaguɗu na ɗe gaɗi,

cikpai ni a̱ɗa̱ na yi ɗe a̱da̱nga̱shile.

2Cikpai ni a̱ɗa̱ alingata a̱ ni,

cikpai ni ili i wuma i gaɗi.

3Cikpai ni, kanna n wotoi,

cikpai ni a̱ɗa̱ azangata a kutashi ra̱ka̱.

4Cikpai ni, a̱ɗa̱ gaɗi a̱da̱nga̱shile,

Cikpai ni, a̱ɗa̱ mini ma gaɗi a̱da̱nga̱shile.

5YaꞋan a cikpa kula ku Vuzavaguɗu,

tsu na u dansai, ta ka yaꞋin nannai.

6N kadanshi ka̱ ni ɗa a zuwai le,

a̱ ubuta̱ u le ko wannai,

u nekei le kadanshi ka na,

ka̱ kupuwa̱nka̱ ba.

7Cikpai Vuzavaguɗu a aduniyan,

a̱ɗa̱ oroꞋo a mala n ili i na yi,

a mala mu uga̱vi,

8ulaɗi, m mini ma atali,

egele n eleshu, n wunla̱i wu utsura,

u na wi o kutono kadanshi ka̱ ni,

9nsasan n aginda,

nɗanga mu umaci nu nɗanga n sida ra̱ka̱,

10nnama n kakamba nu m kpaꞋa,

ili i wuma i na yi o kurono a̱tsuma̱ nu nnunu,

11ngono ma aduniyan n uduniyan ra̱ka̱,

a̱ɗa̱ nkoshi m gba̱ra̱-gba̱ra̱,

n aza afada aduniyan ra̱ka̱,

12muku mo olobo nu nkere n a̱ma̱ci,

nkoshi m muku.

13YaꞋan ra̱ka̱ vule a cikpa kula ku Vuzavaguɗu,

adama a na kula ku ni ku ɗa koci ku ciya̱i ucikpi.

tsugbayin ci ni tsu laꞋa ta̱ tsa aduniyan n tsu gaɗi.

14U zuwai mogono ma utsura adama a uma a̱ ni,

adama a na uma a na i a kuciga yi ra̱ka̱ a cikpa yi,

uma Isaraila, aza a na i ɗevu n a̱yi.

Cikpai Vuzavaguɗu.