Ishipa 141

Vishipa vu Dawuda.

1Vuzavaguɗu, n ɗeke wu ta̱,

ta̱wa̱ gogoꞋo vu ɓa̱nka̱ mu,

pana ka̱la̱ka̱tsu ka̱ va̱

a makyan ma na baci n yaꞋin meɗevile.

2YaꞋan avasa a̱ va̱ okpo

ci ili i ma̱gula̱ni wa̱ nu,

uɗa̱ngushi we ekiye u va̱ tsa alyuka a̱ kulivi.

3Vuzavaguɗu, zuwa mu n ka̱na̱ una̱ u va̱,

vu la̱na̱ nla̱ba̱ mu una̱ n va̱.

4Ka̱ta̱ vu ka̱sukpa̱ ka̱ɗu ka̱ va̱ ka yaꞋan mali,

ma ka gbani-gbani ba,

ko n gbaɓa kaci a ka gbani-gbani ke le ba

vu zuwa mu n yongo n ele a̱ ka̱ɗiva̱ ke le ba.

5YaꞋan vuza vu usuɓi u ɓarangu mu,

u dansuka mu n kasingai,

wi ta̱ o ku okpo mu a danshi a putala ta̱ maniꞋin a kaci ka̱ va̱,

adama a na makyan dem mi ta̱ avasa

adama a ka gbani-gbani.

6A ayin a na baci a ɓasangi

azafada e le a katali,

uma a gbani-gbani i ta̱ e kuyeve

a na kadanshi ka̱ va̱ mayun ɗa.

7Tsu katali ka na vuma u ɓosoi,

ɗa u wacuwai kaꞋa a iɗika,

ta a̱ kutsuwa̱n etele e le,

nannai a̱ una̱ u kasaun.

8Ama n zuwa ta̱ a̱shi a̱ va̱ wa̱ nu,

Vuzavaguɗu MalaꞋimili,

wa̱ nu ɗa n la̱nsa̱i ubuta̱ u kusheɗeku,

ka̱ta̱ vu ka̱sukpa̱ mu n takacika ba.

9Ere mu a maza ma na a zuwakai mu,

a maza ma na aza a gbani-gbani azuki.

10Zuwa uma a gbani-gbani a̱ yikpa̱ a maza me le,

ama yaꞋan mpa n wala m ma̱ta̱na̱.