Ishipa 108

Ma̱shi ma̱ kula̱nsa̱ ulyaꞋi adama i irala

Vishipa vu Dawuda.

1Ka̱shile n foɓuso ta̱ ka̱ɗu ka̱ va̱ mayin,

n canana ishipa,

ka̱ta̱ n cikpa wu n utsura u va̱ dem.

2Jimgbai umolu u va̱ n ugogi

tsu jimgbasa kanna.

3Vuzavaguɗu mi ta̱ kucikpa wu

a̱ ka̱tsuma̱ ka uma,

mi ta̱ a ku canana ishipa

a̱ ka̱tsuma̱ ku uduniyan.

4Ucigi u nu u na u tsu sabaꞋa ba u yawa ta̱ gaɗi a̱da̱nga̱shile,

ma̱riki ma̱ nu kpamu u yawa ta̱ a gaɗi ve eleshu.

5Ka̱shile, yaꞋan ene ucikpi u nu a gaɗi ve eleshu,

yaꞋan tsugbayin tsu nu

ci yongo aduniyan dem.

6Wawa tsu vu ɓa̱nka̱ tsu,

n kukiye ku usingai ku nu,

adama a na ncigi n nu n ciya̱ uɓa̱nki.

7Ka̱shile ka yaꞋan ta̱ kadanshi

a̱ ubuta̱ u ciɗa u ni, u danai.

<<N ulyaꞋi mi ta̱ e kupece Shekem,

ka̱ta̱ n gisanku ka̱ra̱Ꞌa̱ ka Sukotu.

8Giliyadu vu va̱ vu ɗa,

Manasa feu vu va̱ vu ɗa.

Ifirayimu ɗa ma̱kuꞋun ma̱ viyum ma̱ va̱.

Yahuda kalangu ko tsugono ka̱ va̱.

9Mi ta̱ o kubonoko Mowabu

tsu kasasu ka̱ kuza̱Ꞌa̱ ka̱ va̱,

Edom wi ta̱ o ko okpo a ɗaka vu ene a̱ va̱,

Ka̱ta̱ n yaꞋan yoroli yi ulyaꞋi wa aza a Filisitiya.>>

10Yayi u kubanka mu a̱ likuci yi u ukanji?

Yayi u kutono nu mpa a kubana a iɗika i Edom?

11Ka̱shile, avu ɗa vu variki tsu,

Vu kpa̱ɗa̱i kudoku kuwala n osoji a̱ tsu ba?

12Ɓa̱nka̱ tsu, tsu shilika̱ ni irala i tsu,

adama a na uɓa̱nki u vuma gbani ɗa.

13N uɓa̱nki u Ka̱shile ci ta̱ a̱ kuciya̱ ulyaꞋi,

wi ta̱ a kulyaꞋa irala i tsu.