Ansa 31

Kadanshi ka mogono Lemuwelu

1Na ɗa kadanshi ka mogono Lemuwelu. Kana a̱na̱ku a̱ ni o yotsongi ni.

2Yiɗa̱i vi a kuyaꞋan maku ma̱ va̱? Yiɗa̱i vi a kuyaꞋan maku ma̱ va̱, maku ma̱ va̱ ma na n matsai?

Yiɗa̱i vi a kuyaꞋan, maku ma a kucina ma va̱?

3Ka̱ta̱ vu neke katsura ka̱ nu ubuta̱ wa a̱ma̱ci ba,

ko kpamu vu bonoko ugboji u nu wa aza na a tsu takacika ngono.

4Ugain u ɗa a vu Lemuwelu,

Ugan mogono ma soꞋo ma̱ra̱ ba,

ko ngono n soꞋo ma̱ra̱ mu utsura ba,

5ta lo a ta̱wa̱ a cinukpa n wila̱ u na o tonoi,

ka̱ta̱ a iwan kamayun ka uma a na o doroi.

6Neke vuza na wi a ku kuwa̱ ma̱ra̱ mu utsura,

ma̱kya̱n tamkpamu wa aza na i nu una̱mgbi u ka̱tsuma̱,

7ka̱sukpa̱i le o soꞋo ka̱ta̱ a cinukpa n unambi u le

a̱ kpa̱ɗa̱ ku ciɓa n atakaci e le kpamu.

8YaꞋan kadanshi adama ebebe a na a tsu dansa ba,

na aza na i na a̱ɓa̱nki ba.

9Ɓa̱yuwa̱ una̱ adama na vu dansa afada asingai,

ɓa̱nka̱ aza unambi n ofoloni.

Vuka vu na vu tsu pana wovon u Ka̱shile

10Yayi wa kufuɗa ku ciya̱ vuka vu usuɓi?

U lata̱ kazanariya ugain.

11Vali ni u tsu ushuku ta̱ n a̱yi,

ka̱ta̱ tana u ciya̱ ili ra̱ka̱ i na u cigai.

12U tsu yaꞋankai ta̱ kasingai, ba ka gbani-gbani ba,

a ayin a wuma a̱ ni dem.

13U tsu la̱nsa̱ ta̱ tsugbere tsu tsuzogu ka̱ta̱ u yaꞋan kuca n ekiye a̱ ni n ma̱ta̱na̱.

14Wi ta̱ an kpantsu ka aza tsulaga,

u tsu tuka̱ ta̱ n ilikulya i ni dangi.

15U tsu ɗa̱nga̱ ta̱ n kpasani

ka̱ta̱ u yaꞋanka aza a kpaꞋa ilikulya

ka̱ta̱ u buka kpamu abara a̱ ni.

16U tsu la̱na̱ ta̱ kashina mayin kafu u tsula,

n atakaci ulinga a̱ ni a ɗa u tsu shikpa̱ kashina ka nɗanga.

17U tsu zuwa ta̱ ka̱ɗu

ka̱ta̱ u yaꞋan ulinga n utsura.

18U tsu yeve ta̱, ɗa baci kodokpotsu ka uwa ni.

ma̱kuni ma̱ ni ma tsu yongo ta̱ a kutasa ali kayin washi.

19Na ekiye a̱ ni a ɗa u tsu ka̱na̱ tsugbere

na ekiye a̱ ni a ɗa kpamu u tsu yaꞋan kucaꞋa.

20U tsu neke ta̱ aza unambi ba̱ri,

koɓolo n ofoloni feu nanai.

21U tsu pana wovon u a yaꞋan uta̱ni ba,

adama na muku n ni ra̱ka̱ mita̱ ntogu mu uta̱ni.

22U tsu caꞋa ka ta̱ ka̱cika̱ni mayaga ma a̱ga̱da̱,

aminya a̱ ni tsugbere tsu ɗa tsu singai tsu mini ma garula.

23Vali ni vuza vu uyevi ɗa o koɓolo ka uma

ɗa baci u da̱sa̱ngi koɓolo n tsugbayin tsu likuci.

24U tsu caꞋa ta̱ aminya a tsugbere ka̱ta̱ u denge.

U tsu denke ta̱ a za tsulaga aɗambura.

25Uciyi koɓolo n usuɓi u ɗa aminya a̱ ni,

wi ta̱ o ku zoꞋoso a a yaꞋan e kelime.

26U tsu yaꞋan ta̱ kadanshi n ugboji,

kuyotsongu ku ni ku singai ku ɗa.

27U tsu la̱na̱ ta̱ muku ni mayin,

a̱ yi ili bura yi n wonvoli ba.

28Muku ni n tsu ɗa̱ngu ta̱ ka̱ta̱ a cikpai

vali ni feu u tsu cikpai ta̱.

29U tsu dana ta̱, <<A̱ma̱ci n a̱bunda̱i a tsu yaꞋan ta̱ i na a cikpa le,

ama avu vu laꞋa le ta̱ dem.>>

30KuyaꞋan ku gaye u kuna u gbani u ɗa,

ama vuka vu na vu tsu pana wovon u Ka̱shile, a̱ yi ɗa ili ku cikpa.

31Neke ni katsupu ka atakaci ulinga a̱ ni,

ka̱ta̱ ugain wu ulinga u ni kpamu wu utuka̱i e keteshe.