Ansa 25

Ansa o yoku a Sulemanu

1Nava feu ansa a Sulemanu a ɗa a na uma Hizekiya mogono ma Yahuda ma pura̱i.

2U Ka̱shile tsugbayin tsu ni tsu ɗa a pala ka kuna,

ama u mogono tsugbayin tsu ni tsu ɗa u palakpusa ka kuna.

3U teku tsu na gaɗi wi daꞋangi n iɗika,

ta a̱ɗu an ngono i na atakaci a ku palakpusa nanai.

4Utuka̱ unata u azurufa wa,

ka̱ta̱ kawakana tamkpamu ka ciya̱ azurufa ana wa ku yaꞋanka u linga,

5u tuka̱ n vuza gbanigbani e kelime ka mogono,

ka̱ta̱ kakuba ka tsugono ka̱ ni ka ciya̱ ushikpi wu usuɓi.

6Ka̱ta̱ vu utuka̱ kacika̱nu e keteshe e kelime ko mogono

ko a ubuta̱ wa za a gbagbaꞋin ba,

7adama ana u ku lata̱ n ugaꞋin e ɗeke wu, <<Avu ta̱wa̱ gaɗi na,>>

an a ku neke wu wono ubuta̱ wa aza a̱ gba̱ra̱-gba̱ra̱.

I na a̱shi a̱ nu enei,

8ka̱ta̱ vu yaꞋan moloko ma ku banka ubuta̱ wa afada ba,

adama a na ka̱ta̱ a ukocishi vu namba ili i na va ku yaꞋan ba,

ɗa baci vutoku nu u nekei nu wono.

9Da̱sa̱ngi i panakpanai n tovu,

kpamu ka̱ta̱ vu utuka̱ vutoku nu e keteshe ba,

10adama ana ka̱ta̱ aza ana i a kupana ka̱ɗa̱ a zuwa ɗa̱ yo okpo n wono ba,

ta lo tsugbayin tsu nu tsa yikpa̱.

11Kadanshi kana ka̱ uta̱i ɗe, derere ɗa ka ki,

tsu ugaꞋin u kazanariya a gaɗi va azurufa.

12Kupana ko odoki a vuza vu ugboji,

u laꞋa ta̱ ucanuku u tsuloboi u na a kalai n azanari koci.

13Kalingata ku usuɓi,

ka tsu zuwa ta̱ ka̱ɗu ka aza u suki a̱ ni ma̱za̱nga̱,

u teku tsu katali ku uta̱ni a ayin usuɗukpi.

14Vuma na u yaꞋin uzuwukpani u na wa ku neke kuneꞋe, kpamu u ciya̱ u neke ba,

wi ta̱ tsu wunla̱i n eleshu a babu mini.

15N uka̱ni u ka̱ɗu u ɗa a tsu fuɗa a lyaꞋa vuza vu utsura,

kelentsu kasingai kpamu ka tsu ɓoso ta̱ etele.

16vu ciya̱ baci ishigi, lyaꞋa i ɗa u teku wu u tsura u nu,

ta lo i ɗa ya laꞋa wu a̱bunda̱i ka̱ta̱ vu shama i ɗa.

17Ka̱ta̱ vu dakaka kubana a kpaꞋa ku tovu ba,

ta lo wa koꞋo n avu ka̱ta̱ u iwan wu.

18Vuma na dem wu ushuki ku okpo magan ma a uwa u vutoku ni

wi ta̱ o ku okpo an kalangu ka kuvon ko kotokobi, ko kaya ka alyu.

19Ku ushuku kutono vuza babu usuɓi a ayin atakaci

wi ta̱ a ku okpo an kanga ka na ka shamai, ko kpamu nwalu n kune kuna ku koɗoi.

20Vuza na baci de dem u yaꞋankai vuza vu una̱mgbi u ka̱tsa̱ma̱ vishipa

wi ta̱ an vuza na o foɗoi motogu a ayin uta̱ni,

ko kpamu tsu mini ma kalam ko kakpaɗi a̱ kuntsu.

21Ɗa baci vu enei vurala nu a kambulu, neke yi ilikulya u lyaꞋa n mini kpamu u soꞋo,

22nanai ɗa va ku dyaɓa a̱ga̱ruwa̱shi akina a kaci ka̱ ni,

ka̱ta̱ Vuzavaguɗu tana u zuwa ka wu una̱singai.

23Tsu na wunla̱ u kasana u tsu tuka̱ n mini,

ta feu una̱ u vuza gbani-gbani u tsu ka̱ra̱ka̱ n wupa nanai.

24U ku laꞋa ta̱ n ugaꞋin vu da̱sa̱ngu a kunu ku kenu pulai vu kpaꞋa,

ana va da̱sa̱ngu a kpaꞋa n vuka vu vishili.

25Tsu mini ma̱ ta̱ku a ka̱ɗu ka vu za kakuli,

ta kadanshi kasingai ki iɗika i daꞋangi ki nanai.

26Vuza vu usuɓi na u ka̱sukpa̱i ka gbani-gbani ka lyai ni,

wi ta̱ an ka̱shi ka mini ma na ma̱ na̱mgba̱i, ko kayinva ka mini ma tsukono.

27U gaꞋan vu lyaꞋa ishigi n a̱bunda̱i ba,

ta feu kula̱nsa̱ ku tsugbayin ki nanai.

28Vuma na baci u fuɗa u remei ka̱cika̱ni ba,

wi ta̱ an likuci i na o ɓosoi mashilya ma̱ ni.