Ansa 26

1Uteku tsu mini mu uta̱ni a ayin a kpandari,

ta tsugbayin tsu kpa̱ɗi kugaꞋan n kalau nanai.

2Una̱wuya wi a kulya vuza babu unushi ba.

wi ta tsu nnu n na n tsu imkpa gaɗi,

an nwalu babu kucipa̱ iɗika.

3A yaꞋan ta̱ mashashau a dama majaki, iryangama kpamu adama odoku,

ama kalangu adama alau.

4Ka̱ta̱ vu ushuku kalau n kadanshi ka tsulau tsu ni ba,

ta lo va ta̱wa̱ vo okpo tsu ni.

5Ushuku kalau, derere n tsulau tsu ni,

ta lo wa ta̱wa̱ we ene ka̱cika̱ni vuza vu ugboji.

6Ya ba dem vu na u tsu neke kalau a kaka

u gbatya ta̱ njuvu n ene a̱ ni, kpamu ɗa u la̱nsa̱ka̱i kaci ka̱ ni atakaci.

7Uteku tsu na ene a ma̱kuta̱ i upinda̱ri

ta ansa i una̱ u kalau nannai,

8Uteku tsu na a tsu kpa̱ɗa̱ kushiya katali a ka̱vimgba̱tsu,

nanai ɗa feu a tsu kpa̱ɗa̱ ku neke kalau tsugbayin nannai.

9Ansa a una̱ u kalau,

i ta̱ tsu kawana a kukiye, ka na ko soꞋi ki a ku yaꞋanka ugulani.

10Uteku tsu katain ka na ka tsu yaꞋan matawuka babu ku zuwaka, ali ka̱ta̱ u yaꞋanka uma n a̱bunda̱i muna,

nannai ɗa vuza na u ɗikai kalau ulinga wi, ta feu vuza na u ɗikai ka̱ka̱ra̱shi wi nannai.

11Uteku tsu na meshe ma tsu shama ka̱ta̱ u bono u peɗe,

ta kalau ka tsu doku su tsulau tsu ni nannai.

12Vu ene baci vuza na we enei ka̱cika̱ni vuza vu ugboji ɗa,

kalau ki ta̱ n a̱pa̱ a na a laꞋi ni.

13Korogo ka tsu dana ta̱, <<Mi a̱ ku uta̱ ba, Kawu wi ta̱ lo uye.

Ka̱di ki ta̱ lo a uye u gbayin.>>

14Uteku tsu na ka̱kpa̱ga̱ ka tsu ka̱na̱ kukpatala n ko obonoi utsutsu,

ta korogo ka tsu ka̱na̱ ku baꞋinkpusa a kajiba ka̱ ni nannai.

15Korogo ka tsu uka ta̱ kukiye a mevene ma kusan,

ama ka̱ta̱ u kpa̱ɗa̱ kufuɗa ku banka una̱.

16Korogo ka ce ene ta̱ ka̱cika̱ni,

vuza vu ugboji ɗa ali u laꞋa uma e cindere usuɓi.

17A̱yi na u cinai vishili vu na vu burai ni ba ɗa u ukai una̱,

wita̱ tsu vuma na u tsu reme mesheꞋe a kutsuvu.

18Tsu kajarishi ka na ka tsuyaꞋan ugulani n akina n aya koɓolo n ukpa̱,

19ta a̱yi vuma na u doroi vutoku ni,

ɗa udanai, <<Ai, mpa ugulani u ɗa koci mi a kuyaꞋan.>>

20Nɗanga mi lo baci ba, ɗa akina a tsu kima̱,

kpamu vuza kuyun wi lo baci ba, vishili vu feu vu tsu kotso ta̱.

21Tsu na cikina tsu yongo n a̱ga̱ruwa̱shi usuɗukpi wa akina, n tsu na nɗanga kpamu n tsu yongo akina,

ta vuza kula̱nsa̱ ku vishili u tsu yongo nanai.

22Kadanshi ka vuza kuyun ci ilikulya yi uyoꞋo ɗa ki,

ka tsu laza ta̱, ka̱ta̱ ka uwa a ka̱tsuma̱ ki ikyamba.

23Una̱ wu uyoꞋo koɓolo n ka̱ɗu ka gbani-gbani,

ki ta̱ tsu mogbodo ma ciꞋin mana a paɗarai n azurufa.

24Vuza cisheꞋe u tsu sokongu ta̱ cisheꞋe tsu ni n una̱ wu uyo,

ama ka̱ɗu ka̱ni ki ta̱ ushani tukpa n ka gbani-gbani.

25A makyan ma na baci udansai kadanshi ka singai,

ka̱ ta̱ vu ushuku n a̱yi ba,

adama ana ka̱ɗu ka̱ ni tukpa ɗa ka ki n kusheshe ki ili yi unata.

26Ko ana wo okpoi wi ta̱ a kusokongu tsurala ci ni n ugboji,

ama ka gbani-gbani ka̱ ni ki ta̱ a̱ ku uta̱ e keteshe a̱ ka̱tsuma̱ ko oɓolo a u uma.

27Ya ba dem vu na u ga̱va̱i kpenle adama a ka gbani-gbani, wi ta̱ a ku yikpa̱ punu a ku ɗa,

a̱yi vuza na kpamu u gindalukpai katali, a̱yi ɗa ka ka ku tsugba.

28KayaꞋin ka uwa ka ci iwan ta̱ vuza na u yaꞋankai a uwa,

ka̱ta̱ vuza vu una̱ uyoꞋo tamkpamu u yaꞋan ta̱ koli.