Ansa 19

1U laꞋa ta̱ n kugaꞋan vuza vu unambi a̱ ka̱tsuma̱ ku unambi u ni n kamayun,

ana a kudana wo okpo ta̱ kalau vuza vu kadanshi ka a uwa.

2U gaꞋan vuma u yongo babu kuyeve ba,

ko kpamu vu okpo vuza na u tsu ci yaꞋan ili gogoꞋo vu la̱nga̱sa̱ uye.

3Ayin a na baci tsulau tsu vuma tsu vakangi vuma,

ka̱ta̱ ka̱ɗu ka̱ ni ka ka̱na̱ wupa n Vuzavaguɗu.

4Uciyi u tsu ɓolongu ta̱ a̱ja̱Ꞌa̱ n a̱bunda̱i,

ama ka̱ja̱Ꞌa̱ ka na vuza vu unambi wi n kaꞋa u tsu iwain ta̱.

5Vuza magaꞋan ma a uwa wi a ku saꞋwa ku laꞋaka a ubuta̱ wa atakaci ba,

ta feu kayaꞋin ka uwa nanai, a̱ yi feu wi a̱ ku ka̱sukpa̱ ba.

6Yaba dem u tsu la̱nsa̱ ta̱ mapasa ma singai a̱ ubuta̱ u vuza na u tsu neke ba̱ri,

yaba dem u ciga ta̱ wo okpo ka̱ja̱Ꞌa̱ ka vuza na u ci neke kuneꞋe ka̱u.

7Ɗa baci a̱ za̱ni a iwain ni adama unambi u ni,

ni ɗai tamkpamu vuma va u ku kotsoꞋo so n a̱ja̱Ꞌa̱ ni?

Ko ni ɗai baci u folonoi le, babu vuza na u kupana ka yi.

8A̱ yi vuzana u ciya̱i ugboji, wuma u ni u ɗa u cigai,

a̱ yi vuzana u we erei kuyeve kpamu wi ta̱ a̱ ku ba̱ruwa̱.

9MagaꞋan ma a uwa mi a ku laꞋaka a ubuta̱ wa atakaci ba,

ta feu nannai kayaꞋin ka a uwa ki ta̱ a̱ ku kuwa̱.

10U gaꞋan kalau ka yaꞋan ida̱shi ma̱za̱nga̱ ba,

nannai kpamu u laꞋa ta̱ n gbani-gbani kagbashi ka lyaꞋa tsugono wu ngono.

11Ugboji u vuma u tsu neke yi ta̱ uka̱ni u ka̱ɗu,

ucikpi u ni uɗa u cinukpa n unushi.

12Wupa u mogono wita̱ tsu yura̱ i kawu,

ama kasingai ka̱ ni ka̱ tsu tuka̱ ta̱ n una̱singai tsu ciza.

13Kalau ka maku ka tsu ronoko ta̱ dada vu ni atakaci,

vuka vu vishili vi ta̱ tsu uɗa̱kpi u mini.

14KpaꞋa n uciyi ili yi uka̱ni i ɗa a ubuta̱ wi isheku,

ama vuka vu ma̱riki a ubuta̱ u Vuzavaguɗu ɗa,

15Wonvoli u tsu zuwa ta̱ vuma alavu a̱bunda̱i,

vuza na u tsu iwan ulinga tamkpamu wita̱ a kutakacika.

16Vuza na u tsu ere kadanshi, wuma u ni u ɗa wi e ku ere,

ama vuza na u tsu kpa̱ɗa̱ ku zuka n uye u ni, wita̱ a̱ ku kuwa̱.

17Vuza na baci de dem u tsu yaꞋan kasingai u vuza vu unambi, Vuzavaguɗu ɗa wi e kuneke kutan,

wi ta̱ kpamu a̱ kuciya̱ katsupu a ili i na u yaꞋin.

18Gbara maku ma̱ nu, adama ana n tsu nannai uzuwi u ka̱ɗu wita̱ punu,

ka̱ ta̱ vu ɓa̱nka̱ una̱mgbi u ni ba.

19Vuza vu usuɗukpi u ka̱ɗu wi ta̱ a ku soꞋo atakaci,

ɗa baci vu utukai ni kute, sai vu doku kpamu vu utuka̱i.

20Zuwa atsuvu vu pana odoki, ka̱ta̱ vu isa kuyotsongusu,

adama ana kanna ko yoku vi ta̱ o ku okpo vuza vu ugboji.

21Kusheshe ku ka̱ɗu ku vuma ki ta̱ n a̱bunda̱i,

ama kusheshe ku Vuzavaguɗu ku ɗa koci ki a kushana.

22I na a cigai u vuma i ɗaɗa ucigi,

u laꞋa ta̱ n ku gaꞋan n vuza vu unambi an vuza na u tsu dansa a uwa.

23Wovon u Vuzavaguɗu u tsu neke ta̱ wuma,

ka̱ ta̱ tana vuza u ciya̱ ku uvuka,

babu ili i na i kuciya̱i.

24Kowonvoni ka tsu uka ta̱ kukiye a̱ mevene ma kusan,

ama wi a kufuɗa wa banka una̱ u ni ba.

25Gbara vuza kugoyi, vuza vu unambi u kusheshe wi ta̱ a kuyaꞋan ugboji,

dansuka keyevi, wita̱ o kudoku n kuyeve.

26Vuza na baci de dem u takacikai Dada ni ɗa kpamu u lokoi a̱na̱ku ni a kpaꞋa,

maku maꞋan mana ma tsu tuka̱ n wono n kugoyi.

27Maku ma̱va̱ ɗa baci vu ka̱sukpa̱i kupana kuyotsongusu,

vita̱ a kucinukpa n ili i na vu yevei ɗe.

28MagaꞋan ma a uwa u tsu yaꞋan ka ta̱ afada a mayun kavama,

vuma gbani-gbani u shatangu ta̱ una̱ u ni n kawuya ci ilikulya.

29A foɓuso ta̱ atakaci adama aza a kavama,

macaka kpamu adama a kalau.