Ishaya 3

Afada adama a Urishelima n Yahuda

1Indana, Vuzavaguɗu,

Ka̱shile ko osoji a gaɗi,

wi ta̱ a kuciga kutakpa Urushelima n Yahuda ili ra̱ka̱ i na a zuwakai katsura.

Wi ta̱ a kutakpa ubuta̱ u na a̱ ci ciya̱ ilikulya

n ubuta̱ u na a̱ ci ciya̱ mini dem a Urishelima koɓolo n Yahuda,

2kovonshi koɓolo n kosoji,

kayaꞋinkafada n keneki,

aza a kindana koɓolo nu nkoshi m gba̱ra̱-gba̱ra̱,

3vuza kelime vu kinda osoji amangerenkupa n vuza vu tsugbayin,

aza o odoki, eyevi koɓolo n aza a kindana.

4Mi ta̱ a kuzuwa a̱ɗa̱nga̱ni okpo aza gbagbaꞋin e le,

muku tamkpamu n lyaꞋaka le tsugono.

5Uma i ta̱ a kutakacikanai,

yaba dem n vuza ni, yaba dem kpamu n vuza na i ida̱shi ɗeɗevu.

A̱ɗa̱nga̱ni i ta̱ o kugoyo nkoshi,

ka̱ta̱ aza a na i ili i yoku ba o goyo aza a na i n tsugbayin.

6Vuza wi ta̱ a̱ kuka̱na̱ vuza ni

a kpaꞋa ke esheku a̱ ni ka̱ta̱ u dana,

<<Vi ta̱ n kuminya, okpo vuza kelime vu tsu,

la̱na̱ ka̱kiza̱ ka agali ka nampa ka.>>

7Ama a kanna ka nanlo wi ta̱ a̱ kushika̱ n ka̱la̱ka̱tsu ka̱u a kudana,

<<Mi n a̱guma̱ ba.

Mi n tsuwaꞋa ko akashi a kpaꞋa ku va̱ ba,

ka̱ta̱ vu zuwa mu mo okpo vuza kelime vu uma ba.>>

8Adama a na Urushelima wi ta̱ a̱ kuta̱ɗa̱tsa̱,

Yahuda wi ta̱ a̱ kuyikpa̱,

kadanshi ke le n ulinga u le ka̱ uta̱ u Vuzavaguɗu ba,

a kushika tsugbayin ci ni a̱yi e kene.

9Kindi ku a̱shi ku le kuyotsongu ta̱ tsu na i,

a̱ uta̱i e keteshe a̱ ubuta̱ u kuyaꞋan ku unushi u le tsu Sodom

babu usokongi.

Ili ya atakaci i ɗa a kubana we le,

o ronoko ta̱ ka̱ci ke le kadama.

10Danai aza a usuɓi e le i n kadama ko yoku ba,

a kupana ta̱ uyoꞋo wu ulinga wu usuɓi u na a yaꞋin.

11Ili ya atakaci i ɗa a kubana wa aza a kawuya, kagbanigbani ki ta̱ a kaci ke le,

i ta̱ a kutsupa le adama a ili i na ekiye e le a yaꞋin.

12A̱ɗa̱nga̱ni takacikai uma a̱ va̱,

a̱ma̱ci lyaꞋi tsugono we le.

A̱ɗa̱ uma a̱ va̱, aza e kelime a̱ ɗa̱ a uka ɗa̱ ta̱ a kakamba,

a ɓatsai n a̱ɗa̱ i ka̱sukpa̱i uye.

13Vuzavaguɗu u da̱sa̱ngu ta̱ a kakuba ka afada ka̱ ni,

u ɗa̱nga̱ ta̱ adama a na u yaꞋanka uma a̱ ni afada.

14Vuzavaguɗu wi ta̱ a kuyaꞋan afada,

aza e kelime n aza gbagbaꞋin a uma a̱ ni, u danai,

<<A̱ɗa̱ ɗa i la̱nga̱sa̱i kashina ki itacishi ka̱ va̱,

i ɓolongi a iꞋuwa i ɗa̱ ili i na i pura̱i a ubuta̱ wa aza a unambi.

15Vuzavaguɗu vo osoji a gaɗi u danai, yiɗa̱i vi cigai n kuminjarangu uma a̱ va̱

ɗa kpamu vi iyai a̱shi a aza a unambi?>>

16Vuzavaguɗu u danai,

a̱ma̱ci a Sihiyona i ta̱ n kadanshi ka̱ a̱ra̱ɗi,

a kuwala n lelei eɗeku ci ishakau,

a kuyaꞋan kuyun n a̱shi e le,

ɗa kpamu i a kudasa n adyangi ɗeɗevu,

n nshingi m gba̱ra̱-gba̱ra̱ u uki a asangulu e le.

17Adama a nannai, Vuzavaguɗu wi ta̱ a kuzuwa usa̱n a aci a̱ a̱ma̱ci a Sihiyona,

u zuwa aci e le o okpo n kukpani.

18A kanna ka nanlo Vuzavaguɗu wi ta̱ a kisa ili dem i na i ci neke yi ugaꞋin, ilikuɗeku, nshingi ma asangulu, n vutali vu kaci, 19ili ya atsuvu, m mawaru ma̱ kuyun, koɓolo n ka̱ka̱la̱bi, 20ogoni a kaci, ni nshingi ma asangulu i n kazuwatsu, n kuluba vu maniꞋin ma̱ ma̱gula̱ni koɓolo n alaꞋwin, 21nkawani mu urotu u ka̱ta̱mba̱ri nu nkawani n vunu, 22n aminya a singai, nu ntogu, n a̱bu koɓolo n azuwatsu, 23m mindatsu, koɓolo n kuminya ku urumbuki n vutali vu kaci koɓolo m kalaba.

24A na wa yaꞋan ma̱gula̱ni vi ta̱ o kubono ushami,

a na wa yaꞋan kaɗambura wi ta̱ o kubono kawin,

a na wa yaꞋan ka̱nji ka na a lapulai sa̱wu wi ta̱ o kubono kukpani,

a na wa yaꞋan kuminya ku singai wi ta̱ o kubono kakashi,

a na wa yaꞋan n tsuloboi wi ta̱ o kubono ili i wono.

25Ali a̱ ɗa̱ i ta̱ a kubana ukpa̱ u kotokobi,

osoji a̱ ɗa̱ i ta̱ a̱ kukuwa̱ a ubuta̱ u kuvon.

26Utsutsu u Sihiyona wi ta̱ a̱ kushika̱ ka̱ta̱ kpamu u yongo n una̱mgbuka̱tsuma̱,

wi ta̱ a̱ kuda̱sa̱ngu a iɗika koshomboɗi.