Ishaya 17

Kene ku wuya adama a iɗika i Dimaska

1A kaka adama a Dimaska,

La̱na̱, Dimaska wo kokpo likuci kpamu ba,

ama wi ta̱ o kubono agali.

2Likuci n a̱bunda̱i ya aza a Aro yi ta̱ o kokpo ukuna u gbani,

ka̱ta̱ wo okpo ubuta̱ u kalina ku ushiga wu nlala,

ka̱ta̱ a vaku lo babu vuza na u kuneke le wovon.

3Vuzavaguɗu MalaꞋimili u danai, Likuci yu ukanji i Ifirayimu yi ta̱ o kukotso,

ka̱ta̱ tsugbayin tsu tsugono tsu Dimaska,

n aza a na a buwai a Siriya tsu puwa̱nka̱

an tsugbayin tsu muku mi Isaraila.

4A kanna ka nanlo tsugbayin tsu Yakubu ci ta̱ a̱ kuyikpa̱,

ka̱ta̱ ugbonguri wi ikyamba u ni u yamba.

5Wi ta̱ o kokpo tsu na kacimbi ka tsu kapa ilikulya,

ka̱ta̱ kpamu u kyaꞋa n ekiye a̱ ni,

n uteku tsu na kpamu vuza u ci yaꞋan kuɗayu

a̱ ka̱ra̱Ꞌa̱ ka Rafi.

6Vuzavaguɗu Ka̱shile ki Isaraila u danai, ko n nannai ili i kuɗayu yi ta̱ a kubuwa,

uteku tsu na a tsu lapa maɗanga ma zaitu

ka̱ta̱ a nusa umaci u re ko u tatsu

ko u na̱shi ko u tawun

ɗe a acaka a na a laꞋi

n daꞋin n kumatsa ka̱u.

7A ayin a nanlo uma i ta̱ a kinda kayaꞋin ke le, ka̱ta̱ o bonoko a̱shi e le a ubuta̱ u vuza ciɗa va aza a Isaraila. 8I o kudoku a kinda atali alyuka a na a yaꞋin n ekiye e le ba, i kpamu o kudoku a cikpa ili i na a yaꞋin n ekiye e le ba, ko Asherimi ko atali alyuka a ili i ma̱gula̱ni.

9A kanna ka nanlo likuci i gbagbaꞋin i le, i na a̱ ka̱sukpa̱i adama a aza a Isaraila yi ta̱ o kokpo tsu ubuta̱ u na a̱ ka̱sukpa̱i ɗa wo okpoi mura̱ta̱i n a̱vuku. Ra̱ka̱ wi ta̱ o kokpo agali.

10Adama a na avu vi cinukpa ta̱ n Ka̱shile ka na ki isai nu,

vi ciɓa n kakpanlai ka na ko sokongi nu va ba.

Adama a nannai, vi ca̱Ꞌi icuꞋu i na vi cigai,

ɗa vi ca̱Ꞌi icuꞋu yi itacishi i yoku i na yu uta̱i a̱ ubuta̱ u yoku.

11Vi ta̱ a kufuɗa va zuwa le o gbonguro a kanna ka na vi ca̱Ꞌi le,

ka̱ta̱ kpamu vu zuwa le a yaꞋan a̱pa̱lu n usana u na vi ca̱Ꞌi le.

Ko n nannai vikyaꞋa vu nu vi ta̱ o kokpo ukuna u gbani

a kanna ka̱ mɓa̱la̱ nu mɓa̱la̱ n na n kukpa̱ɗa̱ kuta̱na̱.

12Panai osoji a aduniyan n a̱bunda̱i

a̱ yura̱ tsu yura̱ i mala,

panai akpanga a gbagbaꞋin o osoji

a̱ kushida̱ m moloko uteku tsa aɓau a utsura.

13Aduniyan n a̱bunda̱i a̱ yura̱ uteku tsu yura̱ i mini ma̱ a̱bunda̱i,

ama Ka̱shile ki ta̱ a kudansika le, ka̱ta̱ ele a imkpa a bana daꞋangi

o kutono wunla̱i an kopo a gaɗi vu nsasan

tsu na wunla̱i u kabatalikpau u tsu shida̱ n kubuta̱.

14M makyan ma̱ kulivi, ka̱ta̱ wovon u gbayin u ta̱wa̱,

ama kafu usana ka̱ta̱ u ɗa u kotso.

Na ɗa u kokpo ugboku wa aza a na i o kudoro tsu,

koɓolo n katsupu ka aza a na i a̱ kupura̱ ucanuku u tsu.