Hosiya 13

Wupa u Vuzavaguɗu wa aza a Isaraila

1Ana Ifirayimu u yaꞋin kadanshi, ɗa uma a̱ ka̱na̱i kujeꞋeke ikyamba,

a cikpa yi ta̱ a̱ ka̱tsuma̱ ki Isaraila.

Ama u yaꞋan ta̱ unushi a̱ ubuta̱ u kutono ka̱ma̱li ka Balu, ɗa u kuwa̱i.

2Ali n anana i ta̱ a kulyaꞋa kelime n kuyaꞋan unushi,

ɗa u yaꞋankai ka̱ci ka̱ ni ka̱ma̱li,

ayimi a na a fuɗai ɗa a ci yaꞋan ka̱ma̱li ka azurufa.

a̱ma̱li a ra̱ka̱ ulinga we ekiye u ɗa.

u tsu dana ta̱ uma e neke le alyuka,

<<Oɓongu iyoci i kobomburon ka.>>

3Adama a nannai i ta̱ o ko okpo tsu egele a usana,

tsu ciza tsu na tsu laza gogo lo,

tsu kopo ka na wunla̱i u tsu pura̱ a̱ ubuta̱ wu ulanga u kulapu ki ishina.

tsu ka̱nga̱ e kenle.

4Ama mpa ɗa Vuzavaguɗu Ka̱shila̱ ka̱ ɗa̱,

ili i na i ɗikai a iɗika i masar.

I yeve Ka̱shile koyoku ba sai mpa,

mpa ɗa kishi koci babu koyoku.

5Mpa ɗa n la̱na̱i ɗa̱ e meremune,

a iɗika i na yi n mini ba.

6Ama a na i ciya̱i uciyi wi ili i kuzuwa,

i lyaꞋi ɗa i cuwa̱i, wuma u ɗa̱ u panai uyoꞋo,

ɗa i yaꞋin a̱ra̱ɗi,

i cinukpai nu mpa.

7Mi ta̱ a̱ kuta̱wa̱ ɗa̱ tsu kawu,

m puta̱ ɗa̱ tsu mesheꞋe ma kakamba.

8Mi ta̱ a̱ kuta̱wa̱ le tsu Ka̱kunzu,

ka na a̱ pura̱i muku n ni.

mi ta̱ a ku saza nka̱nga̱ n le, n takuma le tsu kawu,

tsu manama ma kakamba mi ta̱ a ku sazasa le.

9A̱ɗa̱ uma a Isaraila, mi ta̱ a ku una ɗa̱,

Yayi wi a kufuɗa kuɓa̱nka̱ ɗa̱?

10Gogo na teɗai mogono ma̱ ɗa̱?

Ɗekei ni adama a na u ɓa̱nka̱ ɗa̱,

Te ɗai aza e kelime a̱ likuci i ɗa̱?

Aza a na i folonoi mu n neke ɗa̱,

<<YaꞋan ele a̱ ɓa̱nka̱ ɗa̱.>>

11N wupa u ɗa n nekei ɗa̱ mogono,

ɗa mu n takpai ni n asuvusuɗukpi.

12O ɓolongu ta̱ unushi wa aza a Ifirayimu,

a zuwai unushi u le o mopon.

13atakaci a̱ ta̱wa̱ yi ta̱ tsu vuka vu limata,

ama wi ta̱ tsu maku ma na mi n ugboji ba,

vuza na u iwain a matsai yi a makyan ma na ma gaꞋin.

14M shiba̱ le a̱ ubuta̱ wu utsura wu ukpa̱

N wawa le a̱ ubuta̱ wu ukpa̱

Avu ukpa̱ teɗai ma̱dukpa̱ ma̱ nu?

Kasaun teɗai munuka ma̱ nu mi?

Mpa mi o kudoku kupana asuvayali e le kpamu ba.

15Ko a na wo okpoi aza a Isaraila i ta̱ a kuyimkpa tsu mita̱,

wunla̱i u kasana wi ta̱ a̱ kuzuwa le e ɗekpe.

Wunla̱i u Vuzavaguɗu u ɗa u kulapa ɗe a kakamba.

a̱shi a̱ mini i ta̱ e kuɗekpe,

ayinva e le i ta̱ e kuɗekpe.

wunla̱i wa wi ta̱ a̱ kupura̱ ucanuku u kuzuwa u singai u le ra̱ka̱,

u la̱nga̱sa̱ ili i na i gaꞋin dem.

16Aza a Samariya i ta̱ a ku isa katsupu ku unushi u le,

adama a na yaꞋanka ta̱ Ka̱shila̱ ke le ugbami u kaci.

I ta̱ a kubana ukpa̱ u kotokobi,

i ta̱ a kuɓasangu su aci e nreɓu n le a iɗika,

ka̱ ta̱ kpamu a ɓatsa a̱ma̱ci e le a na i n a̱tsuma̱.