2 Samaila 22

Vishipa vu Dawuda adama a kucikpa Vuzavaguɗu

(Ishp 18:1-50)

1A kanna ka na Vuzavaguɗu wu isai Dawuda e kukiye ku Shawulu n irala i na i buwai dem, ɗa Dawuda u yaꞋin vishipa vu nampa u Vuzavaguɗu. U danai,

2<<Vuzavaguɗu, katali ke kusheɗeku ka̱ va̱,

mashilya ma̱ va̱ n kishi ka̱ va̱,

3Ka̱shile ka̱ va̱, ubuta̱ Kusheɗeku ka̱ va̱,

wa̱ a̱ nu ɗa n tsu sheɗeku.

Ma̱ra̱ga̱ ma̱ va̱, n utsura u wishi u va̱,

mashilya ma̱ va̱, n ubuta̱ u kusheɗeku u va̱,

kishi ka̱ va̱, vu isai mu a̱ ubuta̱ u vishili.

4N tsu ɗeke ta̱ Vuzavaguɗu,

a̱yi na u yotsoi kucikpa,

kpamu u tsu wawa mu ta̱ ekiye a irala i va̱.

5<<Mayu a aɓau a munuka a pala mu ta̱,

wayi u mala u laꞋa ta̱ utsura u va̱.

6Kasaun ka shiya mu ta̱ n awin a̱ ni,

ukpa̱ u zuwaka mu ta̱ maza.

7<<A makyan ma na mi a una̱mgbi u ka̱tsuma̱ n tsu ɗekushe ta̱ Vuzavaguɗu,

ɗa kpamu n ɗekushi Ka̱shile ka̱ va̱.

Ɗe a̱Ꞌisa̱ a̱ ni u panai ka̱la̱ka̱tsu ka̱ va̱,

ɗa kpamu ma̱shi ma̱ va̱ ma yawai atsuvu a̱ ni.

8<<Aduniyan a̱ gba̱ɗa̱i,

ɗa kumiꞋi ku zuva ku jeꞋi,

adama a na wi ta̱ a wupa.

9Ka̱nga̱ ka̱ ka̱na̱i ku uta̱ a̱ vunu vi ni,

melentsu ma akina, n a̱ga̱ruwa̱shi a̱ ku uta̱ a̱ una̱ u ni.

10Ɗa u ɓa̱yuwa̱i gaɗi u cipa̱i a iɗika,

eleshu a̱ lima̱ ka̱u a ɗaka vu ene a̱ ni.

11Ɗa u kumbai Corobi ɗa u imkpai zuva,

a gaɗi ve evelyu a ɗa enei ni tsu manunu.

12U bonokoi ka̱yimbi ko okpoi kapalatsu ka̱ ni,

n eleshu a̱ lima̱ ka̱u a na a̱ tsu tuka̱ m mini.

13Ɗa ulaɗi u gbayin wu akanai ni,

ɗa kpamu a̱ga̱ruwa̱shi uta̱i wu a̱ ni.

14Vuzavaguɗu u lapai ɗe kakpanga gaɗi,

ɗa a panai ka̱la̱ka̱tsu ka MalaꞋimili.

15U tawai ayaꞋa a̱ ni u wacuwai irala,

ɗa u suꞋuki le n ulaɗi, ɗa u lokoi le.

16Uɓarangi u Vuzavaguɗu,

n utsura wa ayinviki a̱ vunu vi ni,

ɗa a̱ ɓa̱yuwa̱i a̱shi a mala,

ɗa kumiꞋi ka aduniyan ku okpoi e keteshe.

17<<Ɗe gaɗi Vuzavaguɗu u ba̱rukpa̱i kukiye ku ni ɗa u ɗikai mu,

a̱ ubuta̱ u mini mu uga̱vi ɗa wu utuka̱i mu.

18Ɗa wi isai mu a̱ ubuta̱ wi irala i va̱ aza a utsura,

a̱ ubuta̱ wa aza na a iwain mu, adama a na a laꞋa mu ta̱ utsura.

19A̱ gba̱nga̱ra̱ngi mu a kanna ka atakaci ka̱ va̱,

ama ɗa Vuzavaguɗu u ɓa̱nka̱i mu.

20Ɗa u tuka̱i mu a̱ ubuta̱ u na wi isai mu,

ɗa kpamu wu isai mu adama a na wi ta̱ a kupana uyoꞋo uva̱.

21<<Vuzavaguɗu u tsupa mu ta̱ adama a usuɓi u va̱,

ɗa u zuwakai mu una̱singai adama a na mi n unushi ba.

22Adama a na n tono ta̱ uye u Vuzavaguɗu,

n ka̱sukpa̱ uye u Ka̱shile ka̱ va̱ ɗa n yaꞋin ka gbani-gbani ba.

23N tono ta̱ wila̱ u ni ra̱ka̱,

n kpa̱ɗa̱ kutono ili i na u dansai ba.

24Ɗa mo okpoi vuza vu babu unushi a̱ ubuta̱ ni.

Ɗa kpamu me erei ka̱ci ka̱ va̱ a̱ ubuta̱ u kuyaꞋan unushi.

25Vuzavaguɗu u neke mu ta̱ katsupa mu ta̱ adama a usuɓi u va̱,

adama a na mi nu unushi a̱ a̱shi a̱ ni ba.

26<<Vuzavaguɗu avu vuza vu uneki u ka̱ɗu ɗa, wa aza a na e nekei u a̱ɗu,

vuza vu ma̱riki ɗa kpamu wa aza a̱ ma̱riki,

27Wa aza a ciɗa, vu tsu yotsongu ta̱ ka̱ci ka̱ nu vi ta̱ ciɗa,

ama wa aza a gbani-gbani vu tsu yotsongu ta̱ ka̱ci ka̱ nu an vu laꞋi le.

28Vu ci isa ta̱ aza a na o goyoi ka̱ci ka le,

ama vu tsu goyo ta̱ aza a̱ra̱ɗi.

29Vuzavaguɗu, avu ɗa kutashi ku va̱,

avu ɗa vu lokoi ka̱yimbi ka̱ va̱.

30N utsura u nu mi ta̱ a ku una ka̱tsura̱ ko osoji,

n utsura u Ka̱shile ka̱ va̱ mi ta̱ a kupasa mashilya dem.

31Uye u Ka̱shile wi ta̱ derere!

Kadanshi ka Vuzavaguɗu mayun ɗa.

Wi ta̱ tsu ma̱ra̱ga̱,

a u vuza na dem u la̱nsa̱i ubuta̱ u kusheɗeku wa̱ a̱ ni.

32<<Vuzavaguɗu a̱yi ɗa Ka̱shile koci,

Ka̱shile kaꞋa koci ubuta̱ u kusheɗeku u tsu.

33Ka̱shile kaꞋa vuza na u tsu neke mu utsura,

u tsu zuwa ta̱ kpamu uye u va̱ wo okpo derere.

34Ana n walai a gaɗi vu n sansan,

ɗa n walai mayin babu ma̱ta̱ɗa̱ tsu na mesheun ma tsu suma.

35Ɗa kpamu u gbarai e kiye a̱ va̱ adama a kuvon,

ciya̱ n fuɗa n ka̱nza̱ utan u vuyum vishili.

36Vuzavaguɗu vu ere mu ta̱, ɗa vu isai mu,

uɓa̱nki u nu u zuwa mu ta̱ mo okpoi vuzagbayin. 37Ɗa vu zuwai mu a uye u singai,

n saꞋwa kpamu kuyikpa̱ ba.

38Ɗa n guvai irala i va̱ n lyaꞋi le,

n shamgba ba sai na mu unai le ra̱ka̱.

39Ɗa n lapai le ali a iɗika, a fuɗa a̱ ɗa̱nga̱ ba,

a̱ yikpa̱i a ɗaka vu ene a̱ va̱.

40Vu neke mu ta̱ utsura adama o kuvon,

ɗa vu zuwai irala i va̱ a ɗaka vu ene a̱ va̱.

41Vu zuwai irala i va̱ a kpatalai a sumai,

ɗa mu unai aza a na a iwain mu.

42Ɗa a̱ la̱nsa̱i uɓa̱nki, ama babu vuza na wa ku isa le,

ɗa e ɗekushei Vuzavaguɗu, ama ɗa u iwain ku ushuku le.

43Ɗa n lapai le luɓa̱ luɓa̱ ali okpoi tsu kubuta̱,

n dasai le uteku tsu kolyoꞋo ka uye.

44<<Vu isai mu e ekiye a uma a̱ va̱ aza a ugbamukaci,

ɗa vu zuwai mu mo okpoi vuza kelime ku uduniyan,

aza a na n yevei ba, ɗa okpoi aza a ulinga a̱ va̱.

45Ɗa omoci a̱ ka̱na̱i kuta̱wa̱ n a̱ kuɗa̱nki mu,

ɗa baci de a panai ukuna u va̱ o tsu tono mu ta̱.

46A̱ɗu e le a̱ gusa̱i

ɗa uta̱i a̱ ubuta̱ u na ishi usheɗeki a̱ ta̱wa̱i n kujeꞋe ki ikyamba.

47<<Vuzavaguɗu wi ta̱ n wuma. Ucikpi a kubana a katali ke kusheɗeku ka̱ va̱.

Ucikpi a kubana u Ka̱shile ka̱ va̱, katali ka wishi ka̱ va̱.

48A̱yi ɗa Ka̱shile ka na ka kutsupaka mu,

vuza na u zuwai kumaci ku uduniyan ɗaka vu va̱,

49u tsu isa mu ta̱ a̱ ubuta̱ wa aza a na i a kuꞋiwan mu.

U tsu neke mu ta̱ tsugbayin wa aza a na i a tsurala nu mpa,

u tsu isa mu ta̱ a̱ ubuta̱ wa aza a a̱ɗu a̱ vishili.

50<<Adama a nannai Vuzavaguɗu, mi ta̱ a kucikpa wu a̱ ka̱tsuma̱ ku uduniyan,

mi ta̱ a kuyaꞋan ishipa i kucikpa kula ku nu.

51U neke ta̱ ulyaꞋi u gbayin u mogono ma na u zagbai,

ɗa kpamu u yotsongi ucigi u na u tsu sabaꞋa ba u mazagbi ma̱ ni,

u Dawuda nu ntsukaya n ni ali ayin babu uteku.>>