1 Tê-sa-lô-ni-ca 5

1Ơ pôp ŏh, sĭq năr yờ bây khây vadâq tât, pôp ŏh đăng câp khananh chêr panh an pôp ŏh. 2Mvăc nơm pôp ŏh gưt dân lŭng pành năr Siđăch tât canŏq caheq èn — dân tamun can'hưn sŭng dŭng măng. 3Lăm vu nhai: “Yăh iên bây yăh ra-ngăp,” en sinlơ tăm tachưt tŭh jưr sưmmrât vlơ khây nĕh, dân ca sinlơ ji lănggưn candưl tât bây khây tamun ur vŭn, en khây nĕh nhâng đăng diêr ntrăch gĕh. 4Cồ canŏq, ơ pôp ŏh, pôp ŏh đăng gŭq sŭng vi jingo chĕq pành năr nŏq tât an pôp ŏh sưmmrât dân ca tamun can'hưn. 5Mvăc pôp ŏh lĕq săq cồ con sinlơ silang bây con dŭng năr de. Vơn đăng sĭq maq dŭng măng ha nhung jingo, 6Payh canŏq, khây vơn vâng vĭq dân ca khây tamun ndây, palâq vlâq, khây vơn căh iêh bây jơ sên. 7Mvăc tamun vĭq nĕh vĭq sŭng dŭng măng, en tamun vanhưl nĕh vanhưl sŭng dŭng măng. 8En mvăc sĭq a maq dŭng năr, nŏq vơn căh jơ nơm, chuq ao loih a sinlơ tôq camvân bây tăm sinđach, bây đuôn loih — cồ sinlơ camvân têch yơt. 9Mvăc Siđăch Trôq đăng sŭmmrăp an vơn wŏq sinlơ hao nuih, en ayh chĕq wŏq sinlơ têch yơt don Cô Voq vơn de, cồ Siđăch Yơt Dưnya Yêsu, 10Candranh cồ gĕh chưt an vơn, chĕq an vơn cồ căh ha vĭq, khây vơn nhâng tăm rĭh simơ bây Siđăch. 11Payh canŏq, căh tăm tacăh ndăng ganai, tamun heq căh jrông jrâng tamun tĭq, dân ca pôp ŏh gât uĕh ôp.

12Ơ khây pôp ŏh, khananh wĭnh pôp ŏh gưt iơq prĭh khây tamun wŏq vrŭq hyoq chŏnh sŭng ndăng khây pôp ŏh, têch iau pôp ŏh sŭng Cô Voq, vuôi tacăh pôp ŏh, 13bây sinâng căh tât khây nĕh nhâng gưt phŭng jơ sŭng sinlơ sinđach sĭq vrŭq ôp khây nĕh de. Căh rĭh tăm la-êr bây ndăng ganai. 14Nŏq ơ pôp ŏh, khananh nchhuch pôp ŏh: căh lăh ca'hya khây tamun cồ đăng tôq iêt, gưt pawal tamun vông nuih, gưt ta-iơq tapơq tamun la-ui, căh gưt mbêr nuih bây ăp ndu. 15Căh jơ nơm, vâng vu lây sŏq viêm chhât trŏh viêm chhât an vu lây, palâq sĭq vlâq, wân lawân dăh ndap vrŭq rom yăh an ndăng ganai bây an ăp ndu. 16Căh wân lawân vui hơn, 17Căh vơu ngwân đăng lu. 18Sŭng ăp vrŭq lây, căh gưt may mo, mvăc sinlơ nŏq cồ nuih cơnh Siđăch Trôq de chĕq ân an pôp ŏh sŭng Siđăch Yơt Dưnya Yêsu. 19Vâng tavŭq tangât Siđăch Wênh. 20Vâng sên dêh khây camvŭm nhai lor. 21Căh poch sên di dân ăp vrŭq. Căh jơ sŏq vrŭq lây cồ yăh sŏng. 22Căh diêr ngai ntrăch ăp vrŭq sinlơ viêm chhât.

23Ngwân wĭnh nơm Siđăch Trôq yăh iên ôp soch jrŏh lĕq an pôp ŏh, bây ngwân an lĕq nuih tôr, wênh nggui, rup swan pôp ŏh de gĕh jơ sên chĕq đăng gĕh gatŭq lây pành chih lăh gĕh lăm Siđăch vơn, cồ Siđăch Yơt Dưnya Yêsu, jưr tât. 24Jơ camvŭm âr cồ Candranh cuôl panh pôp ŏh, khoi cồ Candranh ôp jêng vrŭq nŏq.

25Ơ khây pôp ŏh, khoi căh vơu ngwân an khananh wŏq.

26Wĭnh khwây mơq lĕq săq pôp ŏh a sinlơ phêp gŭn. 27Ănh cuôl săq Cô Voq nhai an pôp ŏh gưt căh chĕq păng sirăq heq gĕh đŏc an lĕq săq pôp ŏh iêt.

28Ngwân wĭnh sinăc yăh Cô Voq vơn de, cồ Siđăch Yơt Dưnya Yêsu, gŭq bây pôp ŏh.