Skip to content
BibleKenya

Chrau Bible Literal Text

1 Tê-sa-lô-ni-ca 4

Payh canŏq, alưr lĕq, ơ pôp ŏh, khananh côt wĭnh bây tacăh pân pôp ŏh sŭng Siđăch, cồ Siđăch Yêsu, dân ca pôp ŏh gĕh đom wŏq a khananh canŏq caheq cồ vrŭq nhâng wŏq sŏq an pôp ŏh chĕq hôm mrĭh bây ôp rom nuih Siđăch Trôq, khoi ca vrŭq pôp ŏh gĕh rĭh bây, chĕq an pôp ŏh lih măq yăh dông nŏq wŏq. Mvăc pôp ŏh gưt khây sinlơ pađau tămti lây cồ khananh gĕh nhai an pôp ŏh payh ơ Siđăch Yêsu. Mvăc heq cồ nuih cơnh Siđăch Trôq de, nŏq cồ sinlơ jêng jrŏh soch pôp ŏh de: căh jơ nơm plĕh ngai a sinlơ cani camăn; ăp ndu sŭng pôp ŏh căh gưt deng sên rup swan nơm sŭng sinlơ soch jrŏh bây iơq prĭh, đăng vông bây nuih cơnh viêm can'hir (dân ca văl aling cồ tamun đăng gưt Siđăch Trôq); chĕq đăng gĕh vu lây ôp tĭh bap bây sưmvŏh chĕq têch iau pôp ŏh nơm sŭng khây vrŭq heq, mvăc Cô Voq cồ Candranh trŏh daq sĭq ăp vrŭq nŏq, dân ca khananh gĕh nhai lor nggâm bây nhâng bâng pân ca'hya pôp ŏh. Mvăc Siđăch Trôq đăng cuôl vơn tât sinlơ chhŭq chhau, ayh cuôl lăp sŭng sinlơ jrŏh soch. Payh canŏq, vu lây đăng wŏq sinlơ pađau heq nŏq đăng gal ayh đăng wŏq con tamun, nŏq cồ đăng wŏq Siđăch Trôq, cồ Candranh paq Siđăch Wênh Nĕh de an pôp ŏh.

En hôm sĭq nuih talaq sŭng pôp ŏh tăm sinđach, pôp ŏh đăng câp tât khananh chêr an pôp ŏh wŏq, mvăc nơm pôp ŏh gĕh Siđăch Trôq pađau căh gưt tăm sinđach ndăng ganai en. Mvăc nhâng, pôp ŏh gĕh ôp canŏq bây lĕq săq khây pôp ŏh lam lĕq sŭng vaniêng Ma-sê-đwan. Cồ canŏq ơ pôp ŏh, khananh wĭnh pân tacăh pôp ŏh cơ tao măq dông wŏq, en căh lĕq prơn rĭh yăh la-êr, uĕh vrawŏq ôp vrŭq nơm de, sŏq ti nơm ôp vrŭq, dân ca khananh gĕh pân pađau pôp ŏh, chĕq pôp ŏh gŭq saq yăh dip u vôq măt tamun aling bây đăng gĕh pŏh păt du sinlơ lây lĕq.

Ơ khây pôp ŏh, khananh đăng cơnh pôp ŏh đăng gưt păch lây sĭq khây tamun cồ vĭq, chĕq pôp ŏh đăng ji nuih dân ca khây tamun ndây cồ khây tamun đăng gĕh sinlơ camvân. Mvăc hê vơn tôq pành Siđăch Yêsu gĕh chưt en tao rĭh sĭq vlâq, nŏq Siđăch Trôq khoi văt sĭq khây tamun vĭq tât bây Nĕh don ju Siđăch Yêsu. Don u camvŭm Cô Voq de, khananh nhai vrŭq heq an pôp ŏh, pành khây vơn, cồ tamun hôm mrĭh heq, cồ khây tamun hôm gŭq sĭq vlâq di tât lăm Siđăch sĭq vlâq, nŏq nhâng đăng gĕh vu lây saq lor a khây tamun cồ vĭq. Mvăc nơm Siđăch a vlơ trôq rŏh jưr bây camvŭm cuôl tayh, bây camvŭm con gŭn măq, nggâm bây camvŭm panŭng Siđăch Trôq de, en khây tamun cồ chưt sŭng Siđăch Yơt Dưnya gĕh tao rĭh lor lĕq. En tât, khây vơn, cồ khây tamun hôm mrĭh, khây tamun cồ hôm gŭq sĭq vlâq, gĕh văt tăn'hao bây khây nĕh sŭng lawang tŭq chĕq vlam Cô Voq vlơ galwang trôq, en canŏq, vơn gĕh gŭq bây Cô Voq wân lawân. Payh canŏq, căh tăm pawal nuih ndăng ganai a khây camvŭm heq.

Chrau Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.