Sam 46:10

Kânguenae Cathut

Kathutkung: Korah capanaw

1Cathut teh ka kânguenae hoi ka thaonae doeh.

Runae tueng navah kabawmkung kahnai poung e doeh.

2Hatdawkvah, talai heh kampuen niteh,

monnaw teh talî dawk ka bawt nakunghai, ka taket mahoeh.

3Tuinaw teh hramki laihoi ka phuen nakunghai,

tuicapa ni mon totouh ka thaw nakunghai, ka taket mahoeh.

4Palang buet touh ao teh, a cakang teh Cathut khopui,

Lathueng Poung onae koe totouh, ka konawmsakkung lah ao.

5Cathut teh a thung vah ao teh, kâhuen mahoeh.

Khodai toteh Cathut ni a kabawp han.

6Miphun pueng teh a hramki awh.

Uknae pueng teh a kâhuet.

Ahni ni a lawk a tho boteh, talai teh a kamyawt.

7Ransahu BAWIPA teh, maimouh koe ao teh,

Jakop Cathut teh kânguenae doeh.

8Tho awh haw, BAWIPA ni a sak e naw hoi

talai van e hno a raphoe e naw pueng hah khenhaw.

9Ama ni tarantuknae hah talai pout totouh a roum sak teh,

licung hah a khoe.

Tahroe hah a tâtueng teh, lengnaw hah hmai hoi koung a sawi.

10Duem awm awh nateh, Cathut lah ka o e heh panuek awh.

Miphunnaw koe tawm lah ka o vaiteh,

talai van vah tawm lah ka o han.

11Ransahu BAWIPA teh, maimouh koe ao.

Jakop Cathut teh kânguenae doeh,