Sam 2

Messiah tânae hoi uknae

Kathutkung: Devit

1Miphunnaw teh bangkongmaw ruengruengti awh.

Tamimaya teh bangkongmaw ayawmyin hno a sak awh.

2BAWIPA hoi Messiah taran lahoi, talai bawinaw cungtalah a kamkhueng awh teh,

lawkcengkungnaw cungtalah kho a khang awh.

3Tho awh. A kâkateknae naw hah ratham pouh sei.

Kâkateknae rui hah tâkhawng pouh sei.

4Kalvan ka tahung e ni panuikhai vaiteh,

Bawipa ni panuilai lah a sak han.

5Hahoi, lungkhuek laihoi ahnimouh koe lawk dei vaiteh,

puenghoi a lungrei a thaisak han.

6Hateiteh, kaie mon kathoung Zion vah,

ka siangpahrang ka ta toe.

7BAWIPA ni nang teh ka Capa doeh.

Sahnin vah na khe telah kai koe a dei e hah ka pâpho han .

8Kai koe het haw. Râw lah miphunnaw na poe vaiteh,

talai pout ditouh na coe hanelah na poe han.

9Sumtaboung hoi na uk vaiteh,

talai hlaamkabokung ni a hem e patetlah rek na hem han.

10Hatdawkvah, Oe siangpahrangnaw, na lungang awh leih.

Talai lawkcengkungnaw yuenae kâhmo awh haw.

11Taki laihoi BAWIPA thaw tawk awh haw.

Pâyaw laihoi konawm awh.

12Capa teh pahnuem awh.

Hoehpawiteh, a lungkhuek payon vaih.

Dongdeng a lungphuen toteh, lam vah koung na kahmat payon vaih.

Ama kâuep e pueng teh tami yawkahawi e doeh.