Sam 137

Zion la

Kathutkung: Panuekhoeh

1Kaimouh teh Babilon palang teng ka tahung awh teh,

Zion ka pouk awh dawkvah, ka ka awh.

2Kaimae ratoungnaw hah

sumpakung dawk ka bang awh.

3Bangkongtetpawiteh, hote hmuen koe maimouh na ka man niteh,

na kahrawinaw ni kai koe la a hei awh.

Kaimouh karektapnaw ni hai amamouh nawm nahanelah

Zion la kaimouh hanlah sak haw ati awh.

4Kaimouh ni Jentelnaw e ram dawk bangtelamaw

BAWIPA pholennae la ka sak thai awh han vaw.

5Oe Jerusalem, nang hah kai ni na pahnim pawiteh,

kama e aranglae kut ni a tawksak thai e hah pahnim naseh.

6Nang hah na pouk hoeh boilah,

Jerusalem hah ka lunghawinae

lathueng ka hrueng hoeh pawiteh,

ka lai teh ka dangka dawk kâbet naseh.

7Oe BAWIPA, Jerusalem a rawp nah hnin vah,

raphoe awh, khomdu totouh raphoe awh telah

kahram awh e Edomnaw hah pouk haw.

8Oe Babilon canu, raphoe lah na o han toe.

Kaimouh koe na sak e patetlah,

nang koe ka patho e teh a lunghawi naseh.

9Nange camonaw hah kaman niteh,

talung dawk rekrek ka suk e teh a lunghawi naseh.